Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 10 2017

Tshienzedi tshia bulenga tshia buena Kristo

Tshienzedi tshia bulenga tshia buena Kristo

TATUENDE wa John wakabatijibua bu Ntemu wa Yehowa mu tshimenga kampanda tshikese tshia mu Gujarati, mu Inde, ku ndekelu kua bidimu bia 1950. John ne bana babu batanu ba balume ne ba bakaji ne mamuabu bavua bena Katolike ba kalanda musenga, nunku bavua babenga ditabuja dia tatuabu bikole.

Dimue dituku, tatuende wa John wakamulomba bua aye kumufidila mukanda kudi mulunda wende kampanda wa mu tshisumbu. Kadi mu dinda adi, John wakaditapa mputa munene ku munu pavuaye ukosa mushiku wa ntuku. Nansha nanku, bu muvuaye musue kutumikila tatuende, wakasuika mukusu ku munu wende uvua upatuka mashi, ne kuasaye luende bua kuyaye kufila mukanda.

Pakafika John kuvuabu bamutume, mukaji wa uvuabu batumine mukanda uvua pende Ntemu wa Yehowa wakangata mukanda au. Wakamona mputa uvua ku munu wa John ne kumulombaye bua amuondope. Wakapatula kashete kende ka manga, kusukulaye mputa ne buanga bua kushipa nabu tuishi tua masama, ne kumusuikaye bandaje ku munu. Pashishe wakenzela John tshiayi, ne uvua wenda uyukila nende malu a mu Bible mu mushindu muimpe.

Bua musangu eu, John wakatuadija kumbusha meji mabi avuaye nawu bua Bantemu ba Yehowa, nunku wakamuebeja bua kumanya bikala Yezu uvua Nzambi ne bikala bena Kristo ne bua kutendelela Mariya, malu abidi avua enza bua ditabuja diende dishilangane ne dia tatuende. Bu muvua Ntemu eu mumanye muakulu wa ku dibele wa John wa Gujarati, wakamuandamuna ne Bible ne kumupesha kakanda kavua ne tshiena-bualu tshia ne: “Lumu luimpe elu lua Bukalenge.”

Panyima pa matuku, pakabala John kakanda aku, wakumvua ne: uvua ubala bulelela bua mu Bible bua musangu wa kumpala. Wakaya kudi Abé ne kumuelaye pende nkonko ibidi ayi. Abé wakafiika munda, kumuasaye Bible umusamina wamba ne: “Udi mulue Satana! Ndeja muaba udi Bible wamba ne: Yezu ki nNzambi to. Ndeja muaba udibu bambe ne: kuena ne bua kutendelela Mariya. Ndeja!” Tshivua Abé muenze etshi tshiakatonda John bikole, ke kumuambilaye ne: “Tshiakudiata kabidi mu tshitendelelu tshia Katolike to.” Kakamudiata kabidi to!

John wakatuadija kulonga Bible ne Bantemu ba Yehowa, kulamataye ntendelelu mulelela, ne kutuadijaye kuenzela Yehowa mudimu. Mu kupita kua matuku, bamue bena mu dîku diabu bakenza bia muomumue. Lelu, John utshidi anu ne tshibangu ku munu udi mulondele munu wa tshiala wa ku tshianza tshiende tshia balume tshia mputa uvuaye muditape kukadi bidimu 60. Udi uvuluka ne disanka tshienzedi tshia bulenga tshia buena Kristo tshivua tshimukoke mu ntendelelu mukezuke.—2 Kol. 6:4, 6.