Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 10 2017

Utu mumanye anyi?

Utu mumanye anyi?

Ntshilele kayi tshia bena Yuda tshivua tshisake Yezu bua kukandika diditshipa mitshipu?

MITSHIPU ivua ne wayi muaba bilondeshile Mikenji ya Mose. Kadi mu matuku a Yezu, bantu bakavua baditshipa ku dituku ku dituku mu nsombelu wabu bua kuleja ne: bualu kampanda buvuabu bamba mbulelela. Bavua benza tshienzedi tshivua katshiyi ne mushinga etshi bua kupesha mêyi abu bujitu; kadi Yezu wakatshibenga misangu ibidi mijima. Wakalongesha ne: “Panudi nuamba dîyi ne: ‘Eyowa,’ dikale anu eyowa; panudi nuamba ne: ‘Tòo,’ dikale anu tòo.”—Mat. 5:33-37; 23:16-22.

Mukanda kampanda udi uleja ne: “mushindu uvua bena Yuda batamba kuditshipa bua kujadika muvua mêyi onso avuabu bamba malelela,” udi mua kumuenekela mu mêyi avua Talmud muambe adi aleja patoke mitshipu ivuabu bamona ne: mmimpe anyi ne: mmibi.—Theological Dictionary of the New Testament.

Ki nganu Yezu nkayende uvua ukadinka diditshipa dibi dia mushindu eu to. Tshilejilu, mumanyi kampanda wa malu a kale muena Yuda Flavius Josèphe wakamba bua kasumbu kampanda ka bena Yuda ne: “Badi babenga mitshipu, bayimona mibi menemene kupita kushima, bualu badi bamba ne: bikalabi ne: muntu udi ne bua kuditshipa bua kuitababu bidiye wamba, muntu au mmuena dishima.” Mukanda wa bena Yuda wa malu mafuikakaja udibu babikila ne: Meji a Sirake anyi Ecclésiastique, (23:11) udi pawu wamba ne: “Muntu udibu bambile bua kuditshipa kena ulonda mikenji mu muoyo wende to.” Pashishe Yezu wakakandika tshilele tshia kuenza mitshipu tshianana tshianana. Tuetu tuamba bulelela misangu yonso, katuena ne bua kuditshipa bua kujadika mudi mêyi etu melelela to.