Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi (Tshia kulonga)  |  Ngondo wa 10 2017

Jozefe wa ku Alimataya udi usungula luseke ludiye

Jozefe wa ku Alimataya udi usungula luseke ludiye

JOZEFE WA KU ALIMATAYA kavua wela meji ne: uvua ne dikima dia kuyukila ne nguvena wa bena Lomo to. Ponto Pilato uvua mumanyike bu muntu wa mutu mukole wa dikema. Kadi bikalabi ne: bavua ne bua kujika Yezu ne lumu, bivua bikengela muntu alombe Pilato tshitalu tshiende. Malu avua menzeke adi aleja ne: Jozefe ne Pilato bavua bayukile bipepele kupita muvua Jozefe mua kuikala wela meji. Mfumu wa basalayi mumane kujadikila Pilato ne: Yezu ukavua mufue, Pilato wakitaba dilomba dia Jozefe. Nansha mutshivua Jozefe ne kanyinganyinga ku muoyo, wakaya lubilu muaba uvuabu bashipele Yezu.—Mâko 15:42-45.

  • Jozefe wa ku Alimataya eu uvua nganyi?

  • Mmalanda kayi avua pankatshi pende ne Yezu?

  • Ntshinyi tshidi tshivuija muyuki wende ne mushinga kuudi?

 MUENA KU TSHILUMBULUIDI TSHINENE

Badi babikila Jozefe mu Evanjeliyo wa Mâko mufundisha ku nyuma wa Nzambi ne: “muntu munene wa mu Tshipangu tshinene.” Mu muyuki emu Tshipangu tshinene tshidi ne bua kuikala anu Tshilumbuluidi Tshinene, mmumue ne: kabadi kanene ka bena Yuda ne kasumbu ka balombodi banene ba bantu. (Mâko 15:1, 43) Nunku Jozefe uvua umue wa ku balombodi banene ba bantu, ke bualu kayi uvua mua kupeta mushindu wa kuyukila bipepele ne nguvena wa bena Lomo. Kabiena bikemesha bua muvua Jozefe muikale kabidi mubanji to.—Mat. 27:57.

Udiku ne dikima dia kuitaba Yezu kumpala kua bantu bu Mukalenge webe anyi?

Mu tshibungi, bena ku Tshilumbuluidi Tshinene bavua bakine Yezu. Bavua bele tshifufu bua kumushipa. Kadi badi babikila Jozefe ne: “muntu muimpe wa malu makane.” (Luka 23:50) Jozefe uvua mushilangane ne bena diende ba bungi ba ku Tshilumbuluidi Tshinene, bualu uvua muena bululame wa bikadilu bimpe ne wakenza muende muonso bua kutumikila mikenji ya Nzambi. Uvua kabidi “muindile Bukalenge bua Nzambi,” ke bualu kayi wakalua muyidi wa Yezu. (Mâko 15:43; Mat. 27:57) Malu avua Yezu ulongesha avua pamuapa mamukoke bualu uvua munange bulelela ne buakane.

MUYIDI WA MU MUSOKOKO

Yone 19:38 udi wamba ne: Jozefe “uvua muyidi wa Yezu wa mu musokoko bualu uvua utshina bena Yuda.” Jozefe uvua utshina tshinyi? Uvua mumanye muvua bena Yuda bapepeja Yezu, ne mumanye kabidi dipangadika diabu dia kuipata muntu yonso uvua umuitabuja mu nsunagoga. (Yone 7:45-49; 9:22) Pavuabu bipata muntu mu nsunagoga bivua bileja ne: bavua bamupepeja, bamubenga ne bavua bamuenzela malu bu muntu mudiombola kudi bana babu bena Yuda. Nunku, Jozefe wakatshina bua kuleja patoke ne: uvua muitabuje Yezu. Bu yeye muenza nanku, uvua ujimija muanzu wende ne lumu luvuaye nalu.

Jozefe kavua nkayende mu lutatu elu to. Bilondeshile Yone 12:42, ‘bakokeshi ba bungi bavua bitabuje Yezu bushuwa, kadi kabavua bamuitaba patoke to, bavua batshina bua Bafalese kabalu kubipata mu nsunagoga.’ Muntu mukuabu uvua mu nsombelu wa buena eu ke Nikodemo, uvua pende wa ku Tshilumbuluidi Tshinene.—Yone 3:1-10; 7:50-52.

Kadi Jozefe yeye uvua muyidi, kadi kavua mua kudimanyisha nanku patoke to. Kudimanyisha eku kuvua ne mushinga wa bungi, nangananga bua mêyi a Yezu aa: “Muntu yonso udi uleja kumpala kua bantu mudiye nanyi mu buobumue, meme panyi nendeje mundi nende mu buobumue kumpala kua Tatu wanyi udi mu diulu. Kadi muntu yonso udi umvila kumpala kua bantu, meme panyi nemmuvile kumpala kua Tatu wanyi udi mu diulu.” (Mat. 10:32, 33) Jozefe kavua mu bulelela muvile Yezu to, kadi kavua ne dikima dia kuamba kumpala kua bantu muvuaye muyidi wende to. Kadi wewe?

Jozefe uvua muenze bualu kampanda buimpe, Bible udi uleja ne: kavua mutue ku tshia bena ku Tshilumbuluidi Tshinene pavuabu belela Yezu tshifufu to. (Luka 23:51) Anu mudi bamue  bantu baleja, pamuapa Jozefe kavuaku pavuabu balumbuluisha Yezu to. Nansha malu mikale mushindu kayi, bivua ne bua kuikala bitonde Jozefe bikole bua muvuaku kakuyi dilumbuluisha diakane, kadi kavua ne tshivuaye mua kuenza bua kukanda bualu ebu to!

UDI UTSHIMUNA DIELAKANA

Tshikondo tshivua Yezu mufue, Jozefe uvua bushuwa mutshimune buôwa buvuaye nabu, ne wakangata dipangadika dia kuambuluisha bayidi ba Yezu. Dipangadika edi didi dimuenekela mu mêyi adi mu Mâko 15:43 aa: “Wakakolesha muoyo ne wakabuela kumpala kua Pilato, kulombaye tshitalu tshia Yezu.”—NWT.

Bidi bimueneka ne: Jozefe uvuapu pakafua Yezu. Bushuwa, uvua mumanye bua difua dia Yezu kumpala kua Pilato. Nunku, pavua Jozefe mulombe tshitalu tshia Yezu, nguvena “wakakema, udikonka ni [Yezu] ukavua mufue.” (Mâko 15:44) Bikala Jozefe uvua mudimuenene muvua Yezu ukenga ne muoyo ku mutshi wa makenga, bualu butambe bubi buvuaye umona ebu buvuaku bumusake bua kukonkonona kondo kende ka muoyo ne ndekelu wa bionso kumonaye ne: uvua ne bua kuangata dipangadika dia kulamata bulelela anyi? Bidi mua kuikala nanku. Ndekelu wa bionso, Jozefe uvua mpindieu musakibue bua kuenza bualu kampanda. Kavua ne bua kuikala kabidi muyidi wa mu musokoko to.

JOZEFE UDI UJIIKA YEZU

Mikenji ya bena Yuda ivua ilomba ne: bavua ne bua kujiika muntu uvuabu bafundile tshibawu tshia lufu kumpala kua dîba kubueladi. (Dut. 21:22, 23) Kadi bua bena Lomo, bavua mua kushiya bitalu bia benzavi bibolela ku mutshi anyi  babijiika mu tshina tshimue. Kadi ki mmeji avua Jozefe nawu bua Yezu to. Jozefe uvua ne lukita lumbula mu dibue dinene pabuipi ne muaba uvuabu bashipela bantu. Bu muvuabu kabayi banji kujiika muntu mu lukita elu, bidi bileja ne: Jozefe utshivua ufikilaku mu Yelushalema ufumina ku Alimataya, * ne uvua mulongolole muaba eu bua wikale muaba wa kujiikila bena mu dîku diende. (Luka 23:53; Yone 19:41) Kujiika Yezu mu lukita luvua ne bua kuikala lua Jozefe kuvua tshienzedi tshivua tshileja muvua Jozefe tshipapayi ne kuvua kukumbaje mulayi wa ne: bavua ne bua kujiika Masiya ‘pamue ne babanji.’—Yesh. 53:5, 8, 9.

Kudiku tshintu tshiudi wangata ne mushinga wa bungi kupita malanda ebe ne Yehowa anyi?

Evanjeliyo yonso inayi idi ileja ne: bobu bamane kumbusha tshitalu tshia Yezu ku mutshi, Jozefe wakatshijingila mu tshilamba tshia line muimpe, kutshitekaye mu lukita luende. (Mat. 27:59-61; Mâko 15:46, 47; Luka 23:53, 55; Yone 19:38-40) Muntu umue udibu baleja muvuaye muambuluishe Jozefe ke Nikodemo, uvua mulue ne bintu bia dipembu bia kujiikangana nabi. Bu muvua bantu aba bikale bantu banene, ki mbobu nkayabu bavua mua kuikala badiambuile tshitalu to. Bidi bimueneka ne: bavua mua kuikala baye ne bena mudimu bua kuambula tshitalu ne kutshijiika. Nansha biobi nanku anyi kabiyi nanku, mudimu uvua bantu babidi aba benze kawuvua mudimu wa bilele to. Muntu yonso uvua ulenga tshitalu uvua ushala mukoya matuku muanda mutekete, ne tshintu tshionso tshivuaye ulenga tshivua tshilua tshikoya. (Nom. 19:11; Hag. 2:13) Kulenga tshitalu kuvua kubalomba bua kubenga kuikala munkatshi mua bantu lumingu luonso lujima lua Pasaka ne kupangila malu onso avuabu benza mu tshibilu etshi. (Nom. 9:6) Pavua Jozefe ulongolola bua kujiika tshitalu tshia Yezu, bavua kabidi mua kumupepeja kudi bena ku kabadi bakuabu. Kadi bua musangu eu, uvua mudiakaje bua kuitaba tshionso tshivua mua kuenzeka pavuaye ujiika Yezu ne lumu, ne kudileja patoke muvuaye muyidi wa Kristo.

NDEKELU WA MUYUKI WA JOZEFE

Pakumbusha mu miyuki ya mu Evanjeliyo idi yakula bua dijiika Yezu, Bible kena utela kabidi Jozefe wa ku Alimataya to, bitufikisha ku didiebeja ne: Tshiakamufikila ntshinyi? Mu bulelela katuena bamanye to. Kadi bilondeshile malu atudi bafume ku dileja, bidi bimueneka patoke ne: uvua mudileje patoke muvuaye muena Kristo. Mu kuamba kuimpe, mu tshikondo tshia mateta ne ntatu, ditabuja diende ne dikima diende biakakola pamutu pa kuteketabi. Tshivua tshimanyinu tshimpe.

Muyuki eu udi ujula lukonko ludi yonso wa kutudi ne bua kuelela meji elu: Kudiku tshintu bu mudi: muanzu, mudimu, bintu, dinanga bena mu mêku, anyi mene budikadidi buetu, tshitudi mua kuangata ne mushinga wa bungi kupita malanda etu ne Yehowa anyi?

^ tshik. 18 Bavua batela Alimataya pamue ne Lama udibu babikila lelu ne: Rentis (Rantis). Muprofete Samuele uvua pende wa mu tshimenga etshi tshivua ntanta wa kilometre 35 ku nord-ouest kua Yelushalema.—1 Sam. 1:19, 20.