Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 6 2016

Kasonga nyunyi

Malongesha atudi tupetela kudi nyunyi ya muulu

Malongesha atudi tupetela kudi nyunyi ya muulu

‘Wanji kukonka nyama ne nyunyi, nebikulongeshe. Munkatshi mua bifukibua bionso ebi, tshidi katshiyi tshimanye ne: [Yehowa] ke udi muenze bionso ebi, tshidiku anyi?’Yobo 12:7, 9MMV.

KUKADI bidimu bipite pa 3 000, Yobo muntu wa kale wakamona ne: nyunyi ya muulu idi ne malu a bungi a kutulongesha pa bidi bitangila bufuki bua Nzambi. Kadi mushindu udiyi yenza malu udi kabidi wambuluisha bua kuenza nayi mudimu bua kufuanyikija malu ne kufila bilejilu. Mvese ya bungi ya mu Bible idi yakula bua nyunyi ya muulu, idi itulongesha malu a mushinga mukole a mu nsombelu ne malanda etu ne Nzambi. Tuangatayi bilejilu bikese.

MUABA UDI TUNDINDI TUENZA MASUA ATU

Kandindi

Bena mu Yelushalema bavua bamanye bimpe tundindi, tuvua ne tshibidilu tshia kuenza masua atu mu mbalanda ya nzubu. Tumue tuvua tuenze masua atu mu ntempelo wa Solomo. Bidi bimueneka ne: tundindi tuvua tuenza masua atu mu lupangu lua ntempelo tshidimu tshionso, tuvua tumona muaba eu muikale muaba wa bukubi, uvuatu mua kukolesha bana batu kakuyi lutatu.

Mufundi wa Musambu wa 84, tuambe ne: umue wa ku bana ba Kola uvua wenza mudimu ku ntempelo lumingu lumue payima pa ngondo isambombo, wakamona masua au mu lupangu lua ntempelo. Uvua musue kuikala bu kandindi kadi kasombele anu mu nzubu wa Yehowa bua kashidi. Wakakema wakamba ne: ‘Yehowa wa misumba, ke mudi muaba webe uudi mushikame mulengele nunku! Mutshima wanyi udi ujinga, e, udi mupange ne dijinga dia biendedi bia mu tshitendelelu tshia Yehowa. E, mushamusha wakudisanganyina nzubu, ne kandindi kakadisanganyina disua dia kutekamu bana baku; bidi pepi ne bioshelu biebe, Yehowa wa misumba, Mukelenge wanyi ne Nzambi wanyi.’ (Misambu 84:1-3) Tuetu ne bana betu tutuku tuleja dijinga dia muomumue ne tuleja dianyisha dîba dionso bua kudisangisha ne bantu ba Nzambi anyi?Musambu 26:8, 12.

TUSONGA NYUNYI TUDI TUMANYE BIKONDO BIATU

Muprofete Yelemiya wakafunda ne: ‘Tusonga nyunyi tua mu diulu, tudi tumanye bikondo biatu.’ Kakuyi mpata uvua mumanye bimpe pavua tusonga nyunyi tuenza luendu luatu tupitshila mu Buloba Bulaya. Mu muvu wa luya, tusonga nyunyi tutoke tupite pa 300 000 tutu tuenza luetu tumbuka mu Afrike tupitshila mu tshibandabanda tshia Yadene tufika ku Nord kua Europe. Dîba didi mu mubidi watu didi ditusaka bua kupingana muaba watu padi tshikondo tshikumbana. Anu bu nyunyi mikuabu itu yenza ngendu, tusonga nyunyi “tudi tumanye bikondo biatu.”Yelemiya 8:7.

Mukanda kampanda udi wamba ne: “Bualu budi bukemesha bikole mbua ne: nyunyi idi yenza ngendu eyi ku diambuluisha dia tshingenyingenyi.” (Collins Atlas of Bird Migration) Yehowa Nzambi mmupeshe nyunyi idi yenza ngendu tshingenyingenyi, kadi mmupeshe muntu bukokeshi bua kujingulula bikondo ne mivu. (Luka 12:54-56) Bishilangane ne tshingenyingenyi tshia tusonga nyunyi, dimanya dia Nzambi ke didi diambuluisha muntu bua kujingulula malu adi enzeka matuku etu  aa. Bena Isalele ba mu tshikondo tshia Yelemiya bavua bapua muoyo bimanyinu bia nunku. Nzambi wakumvuija patoke tshilumbu pakambaye ne: ‘Bakapetula dîyi dia Yehowa; mmeji kayi adi munda muabu?’Yelemiya 8:9.

Lelu eu tudi ne bijadiki bidi bileja ne: tudi mu tshikondo tshidi Bible ubikila ne: “matuku a ku nshikidilu.” (2 Timote 3:1-5) Newidikijaku tusonga nyunyi ne newutabalelaku ‘bikondo’ anyi?

MUKANKU UDI UMONA KULE MENEMENE

Mukanku

Bible udi wakula bua mukanku misangu ya bungi, nyunyi udibu bibidilangane nende mu Buloba Bulaya. Mukanku udi ‘ukeba tshiakudia’ padiwu musombe mu disua diawu pa lubuebue, ‘mêsu au adi amona kule menemene.’ (Yobo 39:27-29) Badi batshinka ne: mukanku udi umona tshiakudia kule menemene, mutantshi wa kilometre mujima.

Anu bu mukanku udi ‘umona kule menemene,’ Yehowa udi umona malu adi alua kumpala. Ke bua tshinyi, Yehowa Nzambi wakamba ne: ‘Ndi ndianjila kuleja bantu nshikidilu wa bualu ku tshibangidilu tshiabu, ne mu bidimu bia kale mubaleje malu akadi kaayi manji kuenjibua.’ (Yeshaya 46:10) Tuetu tuteleja mibelu ya Yehowa, idi mua kutuambuluisha bikole bua kupeta meji ende ne busunguluji.Yeshaya 48:17, 18.

Bible udi kabidi ufuanyikija bantu badi beyemena Nzambi ne nyunyi ya mikanku padiye wamba ne: ‘Badi bindila Yehowa [nebapetulule] bukole buabu; nebabande muulu ne mapuapua bu nyunyi ya mikanku.’ (Yeshaya 40:31) Mukanku udi ubanda muulu ku diambuluisha dia kapepe ka luya katu kabanda muulu. Padi mukanku upeta muamba udi kapepe awu, udi ubulula mapuapua awu bikole ne utuadija kunyuluka mu kapepe aku, bimuambuluisha bua kubanda muulu bikole. Mukanku kawena weyemena bukole buawu bua kubanda muulu mule ne kupueka panshi to. Bia momumue, aba badi beyemena Yehowa badi ne bua kumulomba “bukole budi bupite bua pa tshibidilu” budiye ubalaya.2 Kolinto 4:7, 8.

‘MUSHINDU UDI NZOLO USANGISHA BANA BENDE MU MAPUAPUA’

Nzolo ne tuana tuende

Matuku makese kumpala kua Yezu kufuaye, wakimana bua kutangila tshimenga tshikulu tshia bena Yuda. Wakakema wamba ne: “Wewe Yelushalema, Yelushalema, mushipi wa baprofete ne muashi wa badibu bamutumina mabue! Mmisangu bungi munyi imvua musue kusangisha bana bebe bu mudi nzolo usangisha bana bende mu mapuapua ende! Kadi nuenu kanuvua basue to.”Matayi 23:37.

Tshingenyingenyi tshitambe bukole tshidi natshi nyunyi tshidi tshimuenekela mu dijinga dikole didiyi nadi dia kukuba tuana tuayi. Nyunyi itu yenza masua pa buloba, bu mudi nzolo, idi ne bua kuikala itabalela njiwu. Padi nzolo umona kabemba kanyunguluka muulu, udi wela lubila lukole bua kudimuija ne kubikila tuana tuende bua tubuele ne lukasa mu mapuapua ende. Tuana tutshidi tuasa masala tudi patu tubuelamu bua kupeta bukubi ku munya mukole ne ku mvula. Yezu uvua pende musue kukuba bena mu Yelushalema mu nyuma. Lelu eu, Yezu udi utubikila kudiye bua kutupesha dikisha ne bukubi bua majitu ne tunyinganyinga tua mu nsombelu.Matayi 11:28, 29.

Bushuwa, kudi malu a bungi atudi mua kulongela kudi nyunyi. Paudi ukonkonona mudiyi yenza malu, teta kuvuluka mifuanu ya mu Bible idi yakula bua bualu buayi. Kandindi kakuambuluishaku bua kuanyisha nzubu wa Yehowa. Lomba Nzambi ditekemena didi mua kukuambuluisha bua kubuuka anu bu mukanku. Ndaku kudi Yezu bua kupeta biakudia bia mu nyuma bidi mua kukukuba anu mutu nzolo ukuba tuana tuende. Kasonga nyunyi kakuvuluije bua kushala mutabale bua kujingulula malu adi enzeka matuku etu aa.