Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 6 2016

 TSHIENA-BUALU TSHINENE | BIKENA KUMONA BIDI BIUMVUIJA MALU A MIABA YA MU NYUMA

Bikena kumona bidi bitangila badi mu diulu

Bikena kumona bidi bitangila badi mu diulu

Mu Bible mudi bikena kumona bia bungi bidi bituambuluisha bua kujingilula muaba wa mu nyuma udi kawuyi umueneka. Tudi tukulomba bua kubitangila ne ntema yonso. Nansha mudi malu onso adi mamba mu bikena kumona ebi kaayi a kuangata anu mudiwu amu, bikena kumona ebi bidi mua kukuambuluisha bua kumona mu lungenyi bantu badi basombe mu miaba ya mu nyuma ne kabidi bua kumanya tshidibu mua kukuenzela.

YEHOWA UDI KU MUTU KUA BIONSO

“Nkuasa wa bukalenge uvua mu diulu, ne muntu uvua musombe mu nkuasa eu. Muntu uvua musombamu uvua ne tshimuenekelu bu tshia dibue dia yaspe ne tshia dibue dia mushinga mukole dia dikala dikunze, ne muanza-nkongolo uvua munyunguluke nkuasa wa bukalenge muikale bu dibue dia emerode.”—Buakabuluibua 4:2, 3.

‘Tshintu bu kapia katua nsese nseke yonso, tshifuane muanzankongolo udi umueneka mu matutu mu dituku didi mvula uloka; ke muakadi tshimfuanyi tshia kukenka kukole kuakamunyunguluka. Etshi tshiakadi tshimfuanyi tshia butumbi bua Yehowa tshiakamueneka kundi.’—Yehezekele 1:27, 28.

Bikena kumona bivuabu baleje mupostolo Yone ne muprofete Yehezekele ebi, bidi bileja bunene bua Yehowa Nzambi Mutambe Bunene ku diambuluisha dia bintu bitudi mua kumvua bipepele bu mudi: mabue a mushinga mukole adi atua nsesa, muanza-nkongolo ne bunene bua nkuasa wa butumbi. Bikena kumona ebi bidi bituleja ne: muaba udi Yehowa udi ukemesha bikole, mmuimpe kumona ne mmuaba wa ditalala dia bungi.

Mushindu udibu bumvuija Nzambi eu udi upetangana ne mêyi a mufundi wa misambu wakafunda ne: ‘Bualu bua Yehowa udi munene, budiye nabu mbua kutumbishibua bikole; budiye nabu mbua kunemeshibua pa mutu pa nzambi yonso ya patupu. Bualu bua nzambi yonso ya bantu ba bende idi bintu bia patupu; kadi Yehowa wakafuka bia mu diulu. Butumbi ne buneme bidi kumpala kuende; bukole ne bulengele bidi mu tshitendelelu tshiende.’—Misambu 96:4-6.

Nansha mudi Yehowa ku mutu kua bionso, udi utubikila bua kusemena nende pabuipi mu disambila ne udi utujadikila ne: udi ututeleja. (Misambu 65:2) Nzambi mmutunange ne udi ututabalela bikole ke bualu kayi mupostolo Yone wakafunda ne dishindika dionso ne: “Nzambi udi dinanga.”—1 Yone 4:8.

YEZU UDI NE NZAMBI

“Kadi yeye [Muyidi muena Kristo Stefano], muwujibue tente ne nyuma muimpe, wakatangila mu diulu, kumonaye butumbi bua Nzambi, ne Yezu muimane ku tshianza tshia balume tshia Nzambi; yeye kuamba ne: ‘Tangilayi, ndi mmona diulu dibululuke ne Muana wa muntu muimane ku tshianza tshia balume tshia Nzambi.’”—Bienzedi 7:55, 56.

Matuku makese kumpala kua Stefano kupeta tshikena kumona etshi, bantu bavuaye uyukila nabu aba  bakavua bashipeshe Yezu, tuambe ne: bamfumu ba bena Yuda. Tshikena kumona etshi tshiakajadika ne: Yezu uvua ne muoyo, kabidi ne: bavua bamubishe ku lufu ne bamupe muaba wa butumbi. Mupostolo Paulo wakafunda bua bualu ebu ne: Yehowa uvua “mubishe Kristo ku lufu ne mumusombeshe ku tshianza tshiende tshia balume mu miaba ya mu diulu, ku mutu menemene kua mbulamatadi yonso ne bukokeshi buonso ne bukole buonso ne bumfumu buonso ne dîna dionso didibu mua kutela, kabiyi anu mu ndongoluelu wa malu eu, kadi ne mu ndongoluelu wa malu udi ulua kabidi.”—Efeso 1:20, 21.

Bible udi uleja mudi Yezu ne muaba wa butumbi, udi kabidi uleja ne: anu bu Yehowa, Yezu udi pende utabalela bantu bikole. Pavua Yezu pa buloba, wakondopa masama, balema, kubishaye ne bafue. Pakatufuilaye, wakaleja muvuaye munange Nzambi ne bantu bikole. (Efeso 2:4, 5) Bu mudi Yezu musombe ku diboko dia balume dia Nzambi, mu katupa kîpi emu neabeneshe bikole kukokesha ne neatuadile bantu ba miaba yonso badi batumikila Nzambi.

BANJELU BADI BAKUATSHILA NZAMBI MUDIMU

‘Pangakadi ntangila, bakateka nkuasa ya bukalenge. Wa Kale wa Matuku a Bungi wakashikamapu. Banjelu binunu ne binunu bakamukuatshila mudimu, banjelu binunu dikumi misangu binunu dikumi bakimana kumpala kuende.’—Danyele 7:9, 10.

Mu tshikena kumona tshia mu diulu etshi, Danyele kakamona anu muanjelu umuepele to, kadi wakabamona binunu ne binunu. Tshivua bushuwa tshikena kumona tshivua tshikemesha bikole menemene! Banjelu mbantu ba mu nyuma ba butumbi, badi ne meji ne bukole bia bungi. Mu milongo yabu mudi baselafima ne bakeluba. Bible udi utela banjelu misangu mipite pa 250.

Banjelu ki mbantu bavua ne muoyo kuonso eku pa buloba to. Nzambi wakafuka banjelu bidimu bia bungi kumpala kua kufukaye bantu. Pakafuka Nzambi buloba, banjelu bavuaku ne bavua bela mbila ya disanka.—Yobo 38:4-7.

Mushindu umue udi banjelu ba lulamatu bakuatshila Nzambi mudimu mpadibu benza mudimu wa mushinga mukole udi wenzeka lelu pa buloba, ke dimanyisha dia lumu luimpe lua Bukalenge bua Nzambi. (Matayi 24:14) Mupostolo Yone wakamona mu tshikena kumona didibueja dia banjelu mu mudimu eu. Wakafunda ne: “Ngakamona muanjelu mukuabu upapala munkatshi mua diulu, uvua ne lumu luimpe lua tshiendelele lua kumanyisha badi basombe pa buloba,  kudi ditunga dionso, tshisamba tshionso, muakulu wonso ne bantu bonso.” (Buakabuluibua 14:6) Nansha mudi banjelu kabayi kabidi bakula ne bantu lelu muvuabu benza imue misangu kale, badi baludika aba bonso badi bayisha lumu luimpe kudi bantu ba muoyo muimpe.

SATANA UDI UPAMBUISHA BANTU BA BUNGI

“Mvita yakajuka mu diulu: Mikaele ne banjelu bende bakaluangana ne dragon, ne dragon ne banjelu bende bakaluangana nabu kadi kakatshimuna to, ne kabatshivua kabidi ne muaba mu diulu nansha. Nunku, bakela dragon munene au panshi, nyoka wa kale au, udibu babikila ne: Diabolo ne Satana, udi upambuisha ba pa buloba bujima; bakamuimansha panshi pa buloba, bakamuimansha pamue ne banjelu bende.”—Buakabuluibua 12:7-9.

Mu diulu kamuvua ditalala kuonso eku to. Tshikondo tshiakafuka Nzambi bantu, muanjelu umue wakapeta dijinga dia ne: bamutendelele, yeye kutombokela Yehowa, kudienzaye Satana, dîna didi diumvuija ne: “Muluishi.” Pashishe, banjelu bakuabu kudituabu ku tshiende ne kutombokelabu pabu Nzambi, kutuadijabu kubabikila ne: bademon. Bu mudibu bantu babi, mbaluishi banene ba Yehowa, ne badi basaka bantu ku dienza malu adi abengangana ne mikenji idi Yehowa utupesha ne dinanga dionso.

Satana ne bademon bende mbantu babi ba tshikisu. Mbaluishi betu ne bobu ke badi bakebesha ntatu ya bungi idi pa buloba. Tshilejilu, Satana wakashipa bimuna bia muntu wa lulamatu Yobo ne bena mudimu bende. Kabidi, pavua bana bonso dikumi ba Yobo mu nzubu, Satana wakabashipa pakatumaye ‘tshipepele tshikole’ tshiakupula nzubu au. Pashishe, Satana wakasamisha Yobo ne “biuja binene pambidi ponso, munda mua makasa too ne ku lubombo lua mutu wende.”—Yobo 1:7-19; 2:7.

Nansha nanku, mu katupa kîpi emu nebashipe Satana. Bu mukadibu bakupe Satana pa buloba, mmumanye ne: “udi ne tshikondo tshîpi.” (Buakabuluibua 12:12) Satana mmuindile kabutu, ne bualu ebu budi butusankisha bikole!

BANTU BADI BAFUMINA PA BULOBA

“Udi [Yezu] musumbile Nzambi bantu mu tshisamba tshionso ne mu muakulu wonso ne mu bantu bonso ne mu ditunga dionso, ne udi mubavuije bukalenge ne bakuidi kudi Nzambi wetu, ne badi ne bua kukokesha bu bakalenge pa buloba.”—Buakabuluibua 5:9, 10.

Anu muvuabu babisha Yezu ku lufu pa buloba bua kuikalaye ne muoyo mu diulu, bantu bakuabu nebabishibue pabu bua kuya mu diulu. Yezu wakambila bapostolo bende ba lulamatu ne: “Ndi nya bua kunulongoluela muaba. Nempingane kabidi, bua meme nnuakidile kuanyi, bua muaba undi, nuenu penu nuikalapu.”—Yone 14:2, 3.

 Bantu badi baya mu diulu badi ne tshidibu bayilamu. Bobu popamue ne Yezu, nebenze Bukalenge bualua kukokesha bantu bonso badi pa buloba ne buabatuadila masanka a katshia. Ebu ke bukalenge buvua Yezu muambile bayidi bende bua kulomba mu disambila dia tshilejilu dia ne: “Tatu wetu udi mu diulu, dîna diebe ditumbishibue. Bukalenge buebe bulue. Disua diebe dienzeke kabidi pa buloba muomumue ne mu diulu.”—Matayi 6:9, 10.

MALU ENZA BANTU BADI MU DIULU

“Ke meme kumvua dîyi dikole difuma ku nkuasa wa bukalenge diamba ne: ‘Tangilayi! Ntenta wa Nzambi udi ne bantu. Yeye neakupule tshinsonji tshionso ku mêsu kuabu, ne lufu kaluakuikalaku kabidi, nansha madilu, nansha miadi, nansha bisama kabiakuikalaku kabidi. Malu a kale ajiminyi.’”—Buakabuluibua 21:3, 4.

Tshikena kumona tshia buprofete etshi tshidi tshileja tshikondo tshikala Bukalenge bua Nzambi, buenza kudi Yezu ne bantu badibu babisha pa buloba, mua kujikija bukokeshi bua Diabolo ne kuvuija buloba mparadizu. Bintu bivua bikebele bantu ntatu ne tunyinganyinga kabiakuikalaku kabidi to. Nansha lufu luine kaluakuikalaku kabidi to.

Kadi ntshinyi tshienzekela bantu miliyo ne miliyo badi bafue ne kabayi babishibue bua kuya mu diulu? Mu matuku adi alua kumpala, nebapetulule muoyo ne ditekemena dia kusomba bua kashidi mu buloba bukudimuna mparadizu abu.—Luka 23:43.

Bikena kumona ebi bidi bitujadikila ne: Yehowa Nzambi ne Muanende Yezu Kristo, popamue ne banjelu ba lulamatu ne aba bavua basumbibue mu ba pa buloba, bonso buabu badi baditatshisha bikole bua bualu buetu ne badi bakeba diakalenga dietu. Bua kumanya malu a bungi bua tshikalabu ne bua kuenza, tudi tukulomba bua kukeba Bantemu ba Yehowa ba muaba uudi musombele anyi buela mu site wetu wa www.jw.org, ne ambula mukanda wa Bible utu ulongesha tshinyi menemene?