Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 5 2017

 TSHIENA-BUALU TSHINENE | BANJELU BATUKU ANYI? BUA TSHINYI KUMANYA MALU ABU?

Mudi banjelu mua kukuambuluisha

Mudi banjelu mua kukuambuluisha

Banjelu ba lulamatu badi batabalela malu a bantu bikole ne mbadifile mu dikumbaja disua dia Yehowa. Pavua Nzambi mufuke buloba, banjelu ‘bakimba misambu diatshimue ne bana balume bonso ba Nzambi bakela mbila bua disanka diabu.’ (Yobo 38:4, 7) Katshia anu ku kale banjelu badi bajinga ‘kutangila’ mu mêyi a buprofete adi atangila malu enzeka pa buloba.—1 Petelo 1:11, 12.

Bible udi uleja ne: bua kukumbaja disua dia Nzambi, banjelu batu imue misangu bakuba batendeledi balelela ba Nzambi mu mushindu kampanda. (Misambu 34:7) Tumonayi bimue bilejilu:

  • Pavua Yehowa muambe bua kubutula tshimenga tshibi tshia Sodoma ne tshia Amola, banjelu bavua bambuluishe muntu muakane Lota ne dîku diende bua kunyema.—Genese 19:1, 15-26.

  • Mu Babilona wa kale, pavuabu bele bansongalume basatu bena Ebelu mu tshikutu tshia kapia bua kubashipa, Nzambi ‘wakatuma muanjelu wende bua kupandisha bantu bende.’—Danyele 3:19-28.

  • Panyima pa muntu muakane Danyele mumane kuenza butuku bujima mu buina bua ntambue ivua ne nzala, wakamba ne: uvua mupanduke bualu ‘Nzambi wakatuma muanjelu wende, wakasuika mbanga ya ntambue.’—Danyele 6:16, 22.

Banjelu mbambuluishe bena lulamatu katshia ku kale

BANJELU BAVUA BAMBULUISHE TSHISUMBU TSHIA BENA KRISTO BA KUMPALA

Kuvua misangu ivua banjelu ba Nzambi bela dîyi mu malu a tshisumbu tshia bena Kristo ba kumpala pavuabi bikengela bua kukumbaja disua dia Yehowa. Tumonayi bimue bilejilu:

  • Muanjelu mukuabu wakakangula biibi bia buloko, kuambilaye bapostolo bavua mu buloko amu bua kutungunuka ne kuyisha mu ntempelo.—Bienzedi 5:17-21.

  • Muanjelu kampanda wakambila muambi Filipo bua kuya mu njila wa mu tshipela uvua umbukila ku Yelushalema uya ku Gaza bua kuyisha muena Etshiopi uvua muye ku Yelushalema bua kutendelela.—Bienzedi 8:26-33.

  • Pavua tshikondo tshivua Nzambi mulongolole bua bantu bavua kabayi bena Yuda kuluabu bena Kristo tshikumbane, muanjelu wakamuenekela Kôneliyo, munene wa basalayi muena Lomo, mu tshikena kumona, kumuambilaye bua abikidishe mupostolo Petelo kuende.—Bienzedi 10:3-5.

  • Pavuabu bele mupostolo Petelo mu buloko, muanjelu wakamumuenekela, kumupatulaye mu buloko amu.—Bienzedi 12:1-11.

 MUDI BANJELU MUA KUKUAMBULUISHA

Kakuena bijadiki bidi bileja ne: Nzambi utshidi anu utuma banjelu bua kuambuluisha bantu mu tshishima mu mishindu idibu baleje mu Bible eyi to. Kadi Yezu wakamba bua tshikondo tshietu etshi ne: “Nebayishe lumu luimpe elu lua Bukalenge pa buloba bujima budi bantu basombe bua luikale bujadiki kudi bisamba bionso, pashishe, nshikidilu nealue.” (Matayi 24:14) Udi mumanye ne: bayidi ba Kristo badi benza mudimu eu ku bulombodi bua banjelu anyi?

Banjelu badi bambuluisha bua kumanyisha lumu luimpe pa buloba bujima

Mukanda wa Buakabuluibua udi uleja ne: banjelu bavua ne bua kuambuluisha bantu pa buloba bujima bua kumanya Yehowa Nzambi ne tshidiye mulongoluele bantu. Mupostolo Yone wakafunda ne: “Ngakamona muanjelu mukuabu upapala munkatshi mua diulu, uvua ne lumu luimpe lua tshiendelele lua kumanyisha badi basombe pa buloba, kudi ditunga dionso, tshisamba tshionso, muakulu wonso ne bantu bonso, wamba ne dîyi dikole ne: ‘Tshinayi Nzambi, mutumbishayi, bualu dîba dia dilumbuluisha diende diakumbanyi; nunku tendelelayi Yeye uvua muenze diulu ne buloba ne mbuu ne mpokolo ya mâyi.’” (Buakabuluibua 14:6, 7) Malu a bungi adi enzeka matuku etu aa adi aleja ne: banjelu badi bambuluisha mudimu wa diyisha Bukalenge udi wenzeka pa buloba bujima. Bushuwa, padi muena mpekatu nansha umue unyingala, uya kudi Yehowa, “banjelu ba Nzambi badi basanka.”—Luka 15:10.

Ntshinyi tshienzeka pajika mudimu wa diyisha? “Biluilu bia mu diulu” bia banjelu nebiambuluishe Yezu Kristo, Mukalenge wa bakalenge, mu “mvita ya dituku dinene dia Nzambi Wa Bukole Buonso,” ku Armagedone. (Buakabuluibua 16:14-16; 19:14-16) Banjelu ba bukole nebakumbaje dilumbuluisha dia Nzambi padi Mukalenge Yezu “usombuela bantu badi . . . kabayi batumikila lumu luimpe lua bualu bua Mukalenge wetu Yezu.”—2 Tesalonike 1:7, 8.

Nanku ikala mumanye ne: banjelu badi bakutabalela wewe. Badi baditatshisha bikole bua diakalenga dia bantu badi basue kuenzela Nzambi mudimu, ne Yehowa ukadi mubatume misangu ne misangu bua kukolesha bantu bende badi bamulamate pa buloba ne kubalama.—Ebelu 1:14.

Nunku yonso wa kutudi udi ne disungula dinene dia kuenza. Netuteleje lumu luimpe ludibu bayisha pa buloba bujima ne netulutumikile anyi? Bantemu ba Yehowa ba muaba uudi musombele nebikale ne disanka dia kukuambuluisha bua upete diambuluisha dimpe dia kudi banjelu ba Nzambi ba bukole.