Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 2 2017

Disumbisha bapika pankatshi pa Afrike ne Amerike divua dipetesha makuta

Dipanduka ku bupika—Kale ne lelu

Dipanduka ku bupika—Kale ne lelu

Blessing * wakafika ku mputu muvuabu bamulaye bua kuenza mudimu wa kulukangana nsuki. Kadi panyima pa matuku dikumi a dimututa pa tshibidilu, eku baluisha bena mu dîku diabu bikole, bakamuenzeja bua kuenza bundumba.

Tshimfuanyi tshia bapika bakuata mu Ejipitu wa kale

Bavua balombe Blessing bua kupeta makuta kubangila ku euro 200 (dolare 220,40) too ne ku euro 300 (dolare 330,60) mu butuku bumue bua kumona mua kufuta dibanza dia euro mipite pa 40 000 (dolare 44 080, 01) divua mfumuende mukaji mumukosele. * Bessing udi wamba ne: “Misangu ya bungi mvua ngela meji a kunyema, kadi mvua ne buôwa bua tshivuabu mua kuenzela bena mu dîku dietu. Ngakapanga tshia kuenza.” Bualu buende ebu ntshimue tshilejilu tshia ku bilejilu bia bantu miliyo inayi bavua mu bupika bua tshiendenda pa buloba bujima.

Kukadi bidimu bitue ku 4000, bivuabu bapanyishe Jozefe, nsonga uvua ne bidimu muinshi mua 19 kudi bana babu ba balume. Wakafika ku dienza mudimu bu mupika mu nzubu muende lumu wa mu Ejipitu. Jozefe uvua mushilangane ne Blessing bualu kumpala mfumuende kavua umuenzela malu mu mushindu mubi to. Kadi pakabengaye bua kulala ne mukaji wa mfumuende, mukaji au wakamushiminyina ne: uvua usua kulala nende. Bakamuela mu buloko, kumuelabu lukanu lua tshiamu tshifike.—Genese 39:1-20; Misambu 105:17, 18.

Jozefe uvua mupika mu tshikondo tshia kale; kadi Blessing udi mupika wa mu bidimu bia 2000. Kadi bonso babidi bavua bangatshibue bu bintu bia bu ngenda, mmumue ne: benda nabu mushinga anu bua kupetesha bakuabu makuta.

MVITA IDI IVUIJA BUPIKA BUNGENDA BUNENE

Mvita ivua mushindu mupepele menemene bua matunga kupetawu bapika. Badi bamba bua mukalenge muena Ejipitu Thoutmosis III ne: wakapingana ne  bena buloko 90 000 panyima pa kampanye kamue ka dikeba bantu mu Kanana bua balue basalayi. Bena Ejipitu bakabateka bua kumbula mbongo, kuibaka ntempelo, ne bua kuenza minkoloji.

Mu bukokeshi bua bena Lomo, mvita ivua kabidi mipeteshe bapika ba bungi, ne dilomba dia kupeta bapika divua imue misangu dikebesha mvita. Badi batshinka ne: mu bidimu lukama bia kumpala, bena Lomo, pabuipi ne tshia bibidi bavua bapika. Bavua bakengesha bikole bapika ba bungi bena Ejipitu ne bena Lomo. Mu miaba ivuabu bumbula mbongo ya mu Lomo, bidimu bia muoyo wa bapika bivua bitue ku 30 patupu.

Mu kupita kua matuku, bupika buvua anu buenda buvula. Kumbukila mu bidimu bia 1500 too ne mu bia 1800, dipanyisha bapika pankatshi pa Afrike ne Amerike divua bungenda buvua bufuta bikole menemene. Bilondeshile luapolo lua UNESCO ‘badi batshinka ne: bavua bakuate ku bukole ne basumbe balume ne bakaji ne bana miliyo kutuadijila ku 25 too ne ku 30.’ Badi bamba ne: bantu binunu nkama ya bungi mbafue pavuabu basabuka mbuu wa Atlantike. Olaudah Equiano, mupika uvua mushale ne muoyo wakamba ne: “Miadi ya bakaji ne ya bantu bavua benda bafua biakenza buôwa bua bungi, kuyi mua kuitaba to.”

Bia dibungama, bupika kabuena anu bualu budi bushipesha bantu to. Bilondeshile bulongolodi bua OIT (Organisation internationale du travail), balume, bakaji ne bana batue ku miliyo 21 batshidi benza mudimu bu bapika, bupika bua babafuta tukuta kukese anyi kabayi nansha babafuta. Bapika ba matuku etu aa badi benza mudimu mu miaba ya diumbula mbongo, mu biapu bia kadifutu kakese, mu miaba ya dienzela tushola, mu nzubu ya diendela bundumba, ne kumbelu ya bantu. Nansha mudi bupika ebu kabuyi bumanyike kudi mbulamatadi, bidi bimueneka ne: budi anu buenda buvula.

Bantu miliyo ya bungi batshidi benza mudimu bu bapika

NYEMENA KUDI BUDIKADIDI

Dienzelangana malu ne tshikisu ndifikishe bapika ba bungi ku diluangana bua kupeta budikadidi. Mu bidimu lukama bia ku mpala K.B.B., nyamanga Spartacus ne bapika batue ku 100 000 bakatombokela bukalenge bua Lomo, kadi kupangilabu. Mu bidimu bia 1700, bapika ba mu tshidiila tshia Antilles tshia mu Hispaniola bakatombokela bamfumu babu. Dikengeshibua dikole divua bapika bapete mu madimi a mienga diakakebesha mvita ya bena ditunga nkayabu, kuenzayi bidimu 13, ndekelu wa bionso kufikishayi ditunga dia Haïti kudipeta dipanda mu 1804.

Kadi diumbuka dia bena Isalele mu Ejipitu diakabadibua bushuwa bu dipanduka dia katshia ne katshia dia ku bupika ditu kadiyi dianji kuenzeka mu malu a bantu. Bavua pamuaba bantu miliyo isatu, mmumue  ne: tshisamba tshijima tshiakumbushibua ku bupika mu Ejipitu. Bavua bushuwa bakumbanyine budikadidi buabu. Bible udi umvuija muvua nsombelu wabu mu Ejipitu wamba ne: ‘Bakabenzeja mudimu mukole’ wa bupika bua mishindu yonso. (Ekesode 1:11-14) Palô kampanda wakenza kampanye ka dishipa bana bua bena Isalele kabavulanganyi.—Ekesode 1:8-22.

Diumbuka dia bena Isalele mu dikenga divuabu nadi mu Ejipitu divua dia pa buadi bualu Nzambi nkayende ke uvua mubapatule. Nzambi wakambila Mose ne: ‘Ndi mumanye makenga abu. Nemfike bua kubapandisha’. (Ekesode 3:7, 8) Lelu, bena Yuda batu basekelela Pasaka muaba wonso udibu tshidimu tshionso bua kuvuluka dipikudibua diabu adi.—Ekesode 12:14.

DIJIKIJA BUPIKA BUA KASHIDI

Bible udi wamba ne: “Kakuena malu mabi kudi Yehowa Nzambi wetu,” ne udi utujadikila ne: ki mmushintuluke to. (2 Kulondolola 19:7; Malaki 3:6) Nzambi wakatuma Yezu ‘bua kuyisha bena lukanu bua dilekedibua diabu, bua kupingaja badi basunsula ne budikadidi.’ (Luka 4:18) Mvese eu udiku wakula bua dipikula bantu ku bupika buena dîna anyi? Tòo. Bavua batume Yezu bua kupikula bantu ku bupika bua mpekatu ne lufu. Wakalua kuamba ne: “Bulelela nebunupeshe budikadidi.” (Yone 8:32) Nansha lelu, bulelela buvua Yezu mulongeshe mbupikule bantu mu mishindu ya bungi.—Tangila kazubu ka ne: “ Panduka ku bupika bua mishindu yonso.”

Bulelela, Nzambi wakambuluisha Jozefe ne Blessing bua kupanduka ku bupika mu mishindu mishilangane. Udi mua kupeta muyuki wa Jozefe wa pa buawu eu mu mukanda wa mu Bible wa Genese nshapita wa 39 too ne wa 41. Dikeba dia Blessing dia budikadidi divua ne mushinga wa bungi.

Pakipatabu Blessing mu dimue ditunga dia ku mputu, wakaya mu Espagne. Kuntu aku, wakatuilangana ne Bantemu ba Yehowa, kutuadijaye kulonga nabu Bible. Bu muvuaye mudisuike bua kuakaja nsombelu wende, wakapeta mudimu ne kujadikilaye mfumuende wa bakaji wa kumpala bua kufuta ku ngondo dibanza diende ku kakese ku kakese. Dimue dituku, mfumuende wa bakaji au kumubikila ku telefone. Uvua musue kumulekeela dibanza ne kumulomba luse. Tshivua tshimusake nanku ntshinyi? Bualu ukavua mutuadije kulonga Bible ne Bantemu ba Yehowa! Blessing udi wamba ne: “Bulelela budi bupesha muntu budikadidi mu mishidnu ya dikema.”

Yehowa Nzambi wakumvua bibi pavuabu bakengesha bena Isalele bu bapika mu Ejipitu; ke mudiye umvua kabidi bua malu mabi adiku lelu. Bulelela, bua kujikija mishindu yonso ya bupika, nebilombe kushintulula malu a bungi mu bantu. Kadi Nzambi mmulaye bua kushintulula malu aa. “Bilondeshile mulayi wende, tudi bindile diulu dipiadipia ne buloba bupiabupia muikala buakane.”—2 Petelo 3:13.

^ tshik. 2 Tudi bashintulule dîna.

^ tshik. 3 Tshikondo atshi, mushinga wa makuta a euro uvua upetangana kakese ne wa dolare.