Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 2 2017

Yezu wakaya kutangila mamuende muenu wa Petelo ne kumondopa.—Matayi 8:14, 15; Mâko 1:29-31.

Budiambike mmukenji muela bua kulua muambi wa Nzambi anyi?

Budiambike mmukenji muela bua kulua muambi wa Nzambi anyi?

BITENDELELU bia pa buloba bujima bu mudi tshia Katolike ka bena Lomo, tshia bena Ortodokse, tshia bena Buda ne bikuabu bitu bilomba balombodi ne bamfumu babi bua kushala badiambike. Ku lukuabu luseke, bantu ba bungi batu bamona ne: tshilele etshi ntshifikishe bamfumu ba bitendelelu bishilashilangane ku tshiendenda tshia bungi tshia masandi matuku etu aa.

Ke bua tshinyi mbia meji bua kudiebeja ne: budiambike mmukenji wa mu Bible bua bantu kuluabu bambi ba Nzambi anyi? Bua kuandamuna lukonko elu, tuanji kumanya kudi tshilele etshi tshifumine, muditshi tshitangalake ne mudi Nzambi utshimona.

BUDIAMBIKE MU MALU A NTENDELELU

Mukanda kampanda udi umvuija ne: budiambike “ndibenga kuikala mu dibaka, dibenga kusangila ne mukaji anyi ne mulume, misangu ya bungi bua mudimu kampanda wa mu tshitendelelu anyi bua kudifila bikole mu malu a ntendelelu.” (Encyclopædia Britannica) Mu muyuki uvua Pape Benoît XVI muenzele mu lupangu lunene lua mu Lomo mu 2006, wakaleja muvua budiambike buikale “tshilele tshivuaku kale menemene pabuipi ne tshikondo tshia bapostolo.”

Kadi budiambike kabuvua tshilele tshia malu a ntendelelu tshivua natshi bena Kristo ba mu bidimu lukama bia kumpala to. Mupostolo Paulo uvua ne muoyo mu bidimu lukama bia kumpala wakambila bena kuitabuja bua badimukile bantu balume bavua mua kuamba “mêyi adi apambuisha mamba kudi nyuma mibi” ne ‘bakandika bantu bua kuselangana.’—1 Timote 4:1-3.

Tshilele tshia budiambike etshi tshiakatuadija kubuela mu bitendelelu bia “bukua buena Kristo” bia mu matunga a ku mputu mu bidimu bia lukama. Bilondeshile mukanda mukuabu, “tshilele etshi tshivua tshipetangana ne mukenji mupiamupia uvuabu bele bua kukandika disangila dia mulume ne mukaji divua  ditue ntanga tshibue mu bukalenge bua Lomo.”—Celibacy and Religious Traditions.

Mu bidimu lukama biakalonda, bamfumu ba bitendelelu ne bantu bavua badiamba muvuabu batatu ba ekeleziya bakazangika tshilele tshia budiambike. Bakela meji ne: Disangila ne mulume anyi ne mukaji divua dinyanga midimu ya budiambike ne kadivua dipetangana nayi to. Nansha nanku, mukanda kampanda wakaleja ne: “Ku ndekelu kua bidimu bia 900 basaserdose ba bungi too ne bamue bepiskopo bavua ne bakaji.”—Encyclopædia Britannica.

Mu tshipangu tshia Latran tshia mu 1123 ne tshia mu 1139 tshivua tshienzeke mu Lomo, bakakolesha mukenji wa budiambike, ne mmushale tshilele tshimanyike mu ekeleziya wa Katolike ka bena Lomo too ne lelu. Bavua bakoleshe mukenji eu, bualu basaserdose bobu basele ne balele, bavua mua kuikala bakadi bangata bintu bia ekeleziya bua kubipesha bana babu, bifikisha ekeliziya ku dijimija bukokeshi ne bubanji buende.

MUDI NZAMBI UMONA BUDIAMBIKE

Bible udi uleja patoke mudi Nzambi umona budiambike. Tudi tubalamu mêyi a Yezu a ne: ‘mbua Bukalenge bua mu diulu’ budi bamue bantu bashadila bajike anu bu yeye. (Matayi 19:12) Mupostolo Paulo pende wakakula bua bena Kristo bavua basungula bua kulonda tshilejilu tshiende tshia bujike wamba ne: ‘mbua lumu luimpe.’—1 Kolinto 7:37, 38; 9:23.

Kadi Paulo ne Yezu kabavua belele bantu mukenji ne: bua kuluabu bambi bikengela bashale badiambike to. Yezu wakaleja ne: bujike buvua “tshipedi” tshivua bayidi bende bonso kabayi ne bua kuikala natshi to. Pavua Paulo muakule bua “batshidi ne bukamama buabu,” wakaleja patoke ne: “Tshiena ne mukenji wa kudi Mukalenge, kadi ndi ndeja luanyi lungenyi.”—Matayi 19:11; 1 Kolinto 7:25.

Bible udi kabidi uleja ne: bena Kristo ba bungi ba mu bidimu lukama ba kumpala bavua bambi ba Nzambi, kusangisha ne mupostolo Petelo bavua basele. (Matayi 8:14; Mâko 1:29-31; 1 Kolinto 9:5) Bushuwa, bu muvua malu a masandi matangalake bikole mu buloba bua Lomo tshikondo atshi, Paulo wakafunda ne: mutangidi muena Kristo yeye musele, uvua ne bua ‘kuikala ne mukaji umue,’ ne uvua ne bua kuikala ne ‘bana bavua bamukokela.’—1 Timote 3:2, 4.

Mabaka a nunku kaavua a budiambike to, bualu Bible udi uleja patoke ne: “Mulume [udi ne bua] kupesha mukajende tshidi bu tshiende” ne bena dibaka kabena ne bua ‘kubengangana’ anyi kubenga kukumbajilangana majinga a disangila to. (1 Kolinto 7:3-5) Bulelela, budiambike ki mmukenji muela kudi Nzambi, ne ki mmukenji bua bantu kuluabu bambi ba Nzambi to.

BUA LUMU LUIMPE

Bikala budiambike kabuyi mukenji, kadi bua tshinyi Yezu ne Paulo bakakula bimpe bua bujike? Bualu bujike budi mua kupetesha muntu mpunga ya bungi ya kuyisha bantu bakuabu lumu luimpe. Bajike badi mua kudifila bikole, bualu kabena ne tunyinganyinga tutu natu badi mu mabaka to.—1 Kolinto 7:32-35.

Tuangate tshilejilu tshia David uvua mupangadije bua kulekela mudimu uvua ufuta uvuaye wenza mu tshimenga tshia Mexique bua kuya mu musoko kampanda wa mu Costa Rica bua kulongesha bakuabu Bible. David udiku mumone ne: bujike buvua bumuambuluishe bua kuenza nunku anyi? Udi wamba ne: “Mu bulelela, bivua bikole bua kuibidilangana ne bibidilu bipiabipia ne nsombelu mishilangane, kadi anu pangatuadija kudikumbajila majinga anyi, kuibidilanga ne nsombelu kuakalua bualu bupepele.”

Claudia, muena Kristo mujike uvua muye kuyisha miaba ivua bamanyishi bakese udi wamba ne: “Ndi munange mudimu undi ngenzela Nzambi. Ditabuja dianyi ne malanda anyi ne Nzambi adi akola pandi mmona mudiye untabalela.”

“Nansha wewe musele anyi mujike, bionso abi kabiena ne bualu to, newikale ne disanka wewe wenzela Yehowa Nzambi mudimu ne muebe muonso.”—Claudia

Bujike kabuena ne bua kuikala bujitu to. Claudia udi utungunuka wamba ne: “Nansha wewe musele anyi mujike, bionso abi kabiena ne bualu to, newikale ne disanka wewe wenzela Yehowa Nzambi mudimu ne muebe muonso.”—Misambu 119:1, 2.