KU TSHIDIMU tshionso bantu bapite pa miliyo 6 batu benza ngendu baya kule mu diitu dia cedar mu tshidila tshia Shima mu Japon. Baya mu muaba munene wa tshijila wa Ise, muvuabu bantendelela Shinto nzambi mukaji dîba (Amaterasu Omikami) kukadi mpindieu bidmu bitue ku 2000. Batendeledi aba batu banji kudikezula pa kuowa bianza ne kusampulula mukana. Pashishe bimana kumpala kua muaba wa tshijila wa haiden (Tshimanu tshia kutendelela), batuadija kuenza malu abu a pa tshibidilu a kuinama, kututa bikashi ne kusambila nzambi muntu mukaji. * Shinto utu wanyishila bantu bende bua kutendelela bintu bikuabu ne bamue bena Buddah badi bitaba bena Kristo ne bantu bakuabu kabatu bamona ne: mbibi bua kuenza bilele bitu batendeledi ba Shinto benza pa muaba wabu wa tshijila eu to.

Bitendelelu binene bia bungi bia pa buloba bidi ne miaba ya tshijila *, ne bantu bungi kabuyi kubala batu baya mu miaba eyi. Mu miaba idi bena Kristo ba bungi, mudi bitanda bia Nzambi bipite ne miaba ya tshijila ya bungi bidibu bibakile Yezu, Mariya ne bansantu. Anu bu biobi, bikuabu mbibakila mu miaba idi bantu bela meji ne: malu anyi “bishima” bia mu bikondo bivuabu bafunda Bible mbienzekelapu anyi miaba ivuabu balamine bishadila bia bansantu. Bantu ba bungi batu baya mu miaba ya tshijila bualu badi bitabuja ne: nebateleje masambila abu bikole menemene bobu baenzele mu muaba wa tshijila. Bua bakuabu, kufika muaba wa tshijila ke bualu bua mushinga menemene budibu benza mu luende luabu lua malu a Nzambi bua kuleja mudibu balamate ntendelelu wabu.

Benyi mu muaba munene wa tshijila wa Ise, Japon ne mu Grotto de Massabielle, Lourdes, France

Nzambi utu utamba kuteleja ne kuandamuna anu masambila ne milombu bidibu benzela mu muaba wa tshijila anyi? Nzambi neasankaku bua bantu badi baleja lulamatu mu dienza ngendu baya mu miaba ya tshijila anyi? Tuambe anu bualu ku bualu, bena Kristo badi ne bua kusambila anu miaba ya tshijila anyi? Mandamuna a nkonko eyi neatuleje mutudi mua kumona kutendelela mu miaba ya tshijila ne kabidi nekutuambuluishe bua kumvua mushindu wa kutendelela udi Nzambi wanyisha.

KUTENDELELA “MU NYUMA NE MU BULELELA”

Pavua Yezu muambe ne: tudi ne bua kutendelela “mu nyuma ne mu bulelela,” uvua usua kuamba tshinyi?

Muyuki wa Yezu ne mukaji wa mu Samaliya udi uleja mudi Nzambi umona dimutendelela mu miaba ya tshijila. Yezu uvua wenza luendu upitshila mu Samaliya, wakimana bua kuikisha ku tshina tshia mâyi tshivua pabuipi ne tshimenga tshia Suka. Wakatuadija kuyukila ne mukaji uvua mulue bua kusuna mâyi ku tshina. Pavuabu bayikila, mukaji au wakaleja dishilangana dinene dia ntendelelu wa bena Yuda ne bena Samaliya. Mukaji wa musamaliya eu wakamba ne: “Bankambua betu bavua batendelela ku mukuna eu, kadi nuenu nudi nuamba ne: ku Yelushalema  ke muaba udi bantu ne bua kutendelela.”—Yone 4:5-9, 20.

Mukaji eu uvua wakula bua mukuna wa Gelizima, udi tanta wa kilometre 50 ne ku nord kua Yelushalema. Kuoku aku ke kuvua ntempelo wa bena Samaliya muaba uvuabu basekelela bibilu bu mudi tshia Pasaka. Kadi, pamutu pa Yezu kuimanyina pa dikokangana didi pankatshi pa bena Samaleya ne bena Yuda, wakambila mukaji ne: “Mukaji, itabuja tshindi nkuambila: dîba didi dilua dikala bantu kabayi mua kutendelela kabidi Tatu ku mukuna eu anyi ku Yelushalema.” (Yone 4:21) Mêyi aa adi akemesha bikole nangananga mudiwu afumina mukana mua muena Yuda. Bua tshinyi kutendelela mu ntempelo wa Nzambi mu Yelushalema kuvua mua kuimana?

Yezu wakatungunuka wamba ne: “Dîba didi dilua, dikadi dikumbane, dikala batendeledi balelela ne bua kutendelela Tatu mu nyuma ne mu bulelela, bualu Tatu udi ukeba bua bantu ba mushindu eu bamutendelele.” (Yone 4:23) Mu nkatshi mua bidimu bia bungi, bena Yuda bavua bamona ntempelo muimpe mutambe wa mu Yulushalema eu bu muaba wabu munene wa kutendelela. Bavua bayaku misangu isatu ku tshidimu bua kulambula Nzambi wabu Yehowa milambu. (Ekesode 23:14-17) Kadi Yezu wakamba ne: malu onso aa avua ne bua kushintuluka, kuambaye kabidi ne: “batendeledi balelela” bavua ne bua kutendelela “mu nyuma ne mu bulelela.”

Ntempelo wa bena Yuda uvua umueneka bimpe ne mu muaba musunguluke. Kadi nyuma ne bulelela kabitu bimueneka to anyi kabiena bisanganyibua muaba kampanda udi umueneka to. Nunku, Yezu uvua umvuija ne: Ntendelelu mulelela wa bena Kristo kavua ne bua kuikala mmuimanyine pa bintu bia ku mubidi anyi muaba udi umueneka, ni mpa Mukuna wa Gelizima ni mmu ntempelo mu Yelushalema anyi muaba kayi mukuabu wa tshijila.

Mu muyiki eu uvuaye wenza ne mukaji wa mu Samaleya, Yezu wakaleja kabidi ne: “dîba” dia dishintuluka mu ntendelelu wa Nzambi dikavua “dienda dilua.” Ndîba kayi adi? Dîba adi diakalua kudiambuluisha dia mulambu wa Yezu uvua muimanyike mushindu uvua bena Yuda bantendelela bilondeshile Mikenji ya Mose. (Lomo 10:4) Kabidi, Yezu wakamba ne: “Dîba dikadiku.” Bua tshinyi? Bualu bu muvuaye Masiyi, ukavua wenda usangisha bayidi bavua mua kutumikila dîyi divuaye mulue kutuma dia ne: “Nzambi udi Nyuma, ne badi bamutendelela badi ne bua kumutendelela mu nyuma ne mu bulelela.” (Yone 4:24) Nunku kutendelela mu nyuma ne mu bulelela kudi kumvuija tshinyi?

Pavua Yezu wamba bua kutendelela mu nyuma, kavua wakula bua nyuma mu mushindu kampanda wa pa buawu, kuikala ne luya anyi kutendelela ne musangelu to. Kadi, uvua wakula bua kulombodibua kudi nyuma muimpe udi ulombola ngumvuilu wetu wa Mifundu. (1 Kolinto 2:9-12) Bulelela buvua Yezu muakuila  ndimanya dijalame dia malongesha a mu Bible. Kadi, pamutu pa kuya mu muaba musunguluke, Nzambi udi wanyisha ntendelelu wetu padiye upetangana ne tshidi Bible ulongesha ne padiye ulombodibua kudi nyuma muimpe.

MUDI BENA KRISTO BAMONA MIABA YA TSHIJILA

Nunku, mmunyi mudi bena Kristo ne bua kumona kuya ne kutendelela mu miaba ya tshijila? Patudi tumona mukenji wa Yezu wa ne: batendeledi balelela badi batendelela Nzambi mu nyuma ne mu bulelela, mbiumvuike patoke ne: kuya bua kutendelela pa muaba kayi onso wa tshijila kakuena ne mushinga nansha mukese kudi Tatu wetu wa mu diulu to. Kabidi, Bible udi utuambila mudi Nzambi umona dinemeka ne ditendelela dia mpingu. Bible udi wamba ne: “Nyemayi ditendelela dia mpingu” ne “nudilame ku mpingu.” (1 Kolinto 10:14; 1 Yone 5:21) Nunku, muena Kristo mulelela kena mua kutendelela pa muaba nansha umue udi bantu bamona ne: anu wowu ke muaba wa tshijila anyi muaba udi usaka bantu kuditendelela dia mpingu to. Ke bualu kayi, bua mushindu utu bantu bamona miaba ya tshijila, bena Kristo balelela kabatu batendelela mu miaba eyi to.

Nansha nanku, kabiena bisua kumvuija ne: Dîyi dia Nzambi didi dikandika kuikala ne muaba kampanda atudi basue kusomba bua kusambila, kulonga anyi kuelangana meji to. Muaba wa bisangilu udi ne bulongame ne muakanyine udi wambuluisha bua kulonga ne kuyukidilangana malu a Nzambi. Ki mbibi nansha bua kuenza tshivulukilu, bu mudi dibua dia pa lukita bua muntu udi mufue. Ebi bidi bileja anu tshianana dinanga dituvua nadi bua muntu udi mufue. Kadi, kumona muaba eu bu muaba wa tshijila anyi bu mpingu ya kunemeka peshi bishadila bia basantu, kakuena kupetangana ne mêyi a Yezu to nansha kakese.

Ke bualu kayi kuena ne bua kuya mu muaba kampanda wa tshijila wela meji ne: Nzambi udi mua kuteleja masambila ebe muaba au to. Nzambi mene kakukuanyisha anyi kukupesha mabenesha a pa buawu bua muudi muye mu muaba wa tshijila to. Bible udi utuambila ne: Yehowa Nzambi “Mukalenge wa diulu ne buloba, kena usombela mu ntempelo mienza ne bianza to.” Kadi bualu ebu kabuena buvuija Nzambi kula netu to. Tudi mua kumusambila ne neatuteleje nansha tuetu muaba kayi bualu ‘kena kule ne yonso wa kutudi’—Bienzedi 17:24-27.

^ tshik. 2 Bilele ebi bidi mua kushilangana bilondeshile muaba ne muaba wa tshijila.

^ tshik. 3 Tangila kazubu ka ne: “Muaba wa tshijila ntshinyi?”