Ndaku munda

Ndaku ku menu makese

Ndaku ku tshikebelu

Bantemu ba Yehowa

Tshiluba

Tshibumba tshia Nsentedi  |  No 2 2016

Nnganyi uvua muele nshapita ne mvese mu Bible?

Nnganyi uvua muele nshapita ne mvese mu Bible?

FUANYIKIJABI ne: udi muena Kristo wa mu bidimu lukama bia kumpala. Tshisumbu tshienu tshidi tshifuma ku dipeta mukanda udi ufumina kudi mupostolo Paulo. Padibu baubala udi uteleja, umvua ne: Misangu ya bungi mupostolo Paulo uvua mmutele mêyi a mu “Mifundu Minsantu” tuambe ne: mifundu ya mu tshiena Ebelu. (2 Timote 3:15) Udi mua kudiambila ne: ‘Ndi musue bushuwa kumona muaba udiye mutele au.’ Kadi kabivua bualu butekete to. Bua tshinyi?

KAKUVUA NSHAPITA ANYI MVESE TO

Tukonkononayi muvua mivungu ya “Mifundu Misantu” ivuaku tshikondo tshia mupostolo Paulo mua kuikala. Mbaleje umue muaba eu, ntshitupa tshia mukanda wa Yeshaya tshia mu mivungu ivuabu bangule mu Mbuu Mufue. Ntshinyi tshiudi umona? Mmiaku mikuatakane! Kakuyi bimanyinu bia mu mfundilu. Ne kabidi kakuena nomba nansha umue bua kutapulula nshapita ne mvese bu mutudi nayi matuku aa to.

Bafundi ba Bible kabavua batapulule malu adi mu Bible mu nshapita ne mvese to. Bavua bafunde anu malu onso avua Nzambi mubambile, bua ne: babadi kababadi anu tutupa tua malu to, kadi bumvue malu onso mu kabujima. Ki ntshiutu musue pautu upeta mukanda wa kudi muntu uutu munange anyi? Udi ubala mukanda mujima, kadi kutu ubala bimue bikoso ulekela bikuabu to.

Kadi bu muvuaku kakuyi nshapita ne mvese, kuvua lutatu. Bua kuamba muaba uvuaye muangatshile mêyi au, Paulo uvua mua kuamba anu ne: “anu bu muakafundabu” ne: peshi “anu bu muakamba Yeshaya.” (Lomo 3:10; 9:29) Bushuwa bivua bikole bua kupeta muaba uvuaye mutele au, anu biwikala udi muibidilangane bikole ne “Mifundu Misantu” yonso.

Bualu bukuabu, “mifundu misantu” ayi kayivua anu mukenji wa kudi Nzambi tshianana to. Ku ndekelu kua bidimu lukama bia kumpala, yakalua mikanda ya bungi misambakaja kaba kamue mitue ku 66. Ke bua tshinyi babadi ba Bible badi basanka bua mudibu bamukosolole mu nshapita ne mvese bidi bibambuluisha bua kupeta malu masunguluke, bu mudi mêyi a bungi adi Paulo mutele mu mikanda yende.

Mpindieu udi mua kuebeja ne: ‘Nnganyi uvua mukosolole Bible mu nshapita ne mvese?’

NNGANYI UVUA MUELE NSHAPITA?

Stephen Langton mpasata wa mu Engleterre, wakalua pashishe arsheveke mu Canterbury, ke uvua mutapulule Bible mu nshapita. Wakamutapulula ku ntuadijilu kua siekle wa 13 panyima pa Yezu, pavuaye mulongeshi mu Iniversite wa mu Paris mu France.

Kumpala kua Langton, bamanyi ba mukanda bakuabu bakavua batete kukosolola Bible mu bitupa anyi mu nshapita, bavua batambe kuenza nanku ne tshipatshila tshia kuledila. Udi mua kumona muvuabi bipepele bua bobu kupeta muaba kampanda wa kubala bobu bakeba anu nshapita umue pamutu pa mukanda mujima, tshilejilu bu mudi mukanda wa Yeshaya udi ne nshapita 66.

Bionso abi biakalela anu ntatu kampanda. Bamanyi ba mukanda bakamutapulula mu mishindu mishilashilangane. Tshilejilu, bavua batapulule mukanda wa Mâko mu nshapita mipite pa 50, ki 16 itudi nayi lelu eu to. Mu matuku a Langton mu Paris, muvua balongi ba bungi bafumine mu matunga a bungi,  nunku bakalua ne Bible ya mu matunga abu. Kadi, babadi ne balongi kabavua mua kumvuijangana bipepele miaba ivuabu baledila to. Bua tshinyi? Bualu mushindu uvuabu batapulule mivungu mu nshapita kauvua anu upetangana to.

Nanku Langton wakakosolola nshapita mu mushindu mupiamupia. Mukanda kampanda udi wamba ne: Mushindu wende eu “wakasankisha babadi ne bafundi bikole be, ne wakatangalaka ne lukasa ku Mputu.” Wakatupesha nomba ya nshapita idi mu Bible ya bungi lelu eu.—The Book A History of the Bible (Angl.)

NNGANYI UVUA MUELE MVESE?

Bidimu bitue ku 300 pashishe, munkatshi mua siekle wa 16, Robert Estienne mumanyi wa mukanda ne muyipatudi wa mu France wakapepeja malu. Tshipatshila tshiende tshivua tshia ne: bantu bonso balonge Bible. Wakamona ne: bivua bikengela kuikala mushindu umue wa nomba ya nshapita ne mvese.

Estienne ki nguakalua ne lungenyi lua kutapulula Bible mu mvese to. Bantu bakuabu bakavua batapulule. Tshilejilu, bidimu bia bungi kumpala, bafundi bena Yuda bakavua batapulule Bible wa tshiena Ebelu mujima, peshi tshitupa tshia Bible tshidi bantu babikila lelu ne: dipungila dikulukulu, mu mvese kadi ki mu nshapita to. Tuambulule ne: mishindu ivuabu batapulule Bible mu nshapita ivua mishilangane.

Estienne wakatapulula Mifundu ya bena Kristo idi mu tshiena Greke, peshi idibu babikila lelu ne: dipungila dipiadipia mu nomba ya mvese, kusambakaja ne ikavuaku ya Bible wa mu tshiena Ebelu. Mu 1553, wakapatula Bible wa kumpala mujima (mu Mfualasa) muikale ne nshapita ne mvese idi mu Bible ya bungi lelu. Bamue bantu bakabenga, bamba ne: mvese idi itapulula Bible tupese tupese, imuenza bu tutupa tutapuluke ne tuikale pa luseke. Kadi bapatudi ba mikanda pa mabeji bakanyisha mushindu eu ne lukasa.

BIDI BIAMBULUISHA BALONGI BA BIBLE

Kutapulula Bible mu nshapita ne mu mvese kudi kumueneka bualu buimpe. Bidi bipesha mvese yonso wa mu Bible “muaba” musunguluke, bienze anu bu mutu kode postale kampanda. Bushuwa, kutapulula Bible mu nshapita ne mu mvese ki nkuenzeke ku bukole bua nyuma muimpe wa Nzambi to, ne badi imue misangu bateke mêyi kampanda a mvese pa muaba udi kauyi muakumbanyine to. Kadi bidi bipepeja mushindu wa tuetu kupeta mêyi kampanda matela, kupeta muaba utudi nawu dijinga anyi kupesha muntu mvese kampanda utudi tukeba bua kumubadila udi ne diumvuija kampanda, anu bu biambilu anyi miaku itudi basue kuvuluka mu mukanda kampanda.

Nansha mudibu batapulule Bible mu nshapita ne mvese, mbimpe tumanye ne: bidi ne mushinga bua kumvua mukenji mujima udi ufuma kudi Nzambi. Ikala ubala bualu bujima mudibu babulonde pamutu pa kubala anu imue mvese. Wewe wenza nanku, newibidilangane bikole menemene ne “mifundu ya tshijila, idi mua kukuvuija muena meji bua kupeta lupandu.”—2 Timote 3:15.