Kudi ntatu mikuabu itu kayiyi ijika lukasa, pamuapa yenza bidimu bia bungi; idi mua kuela miji kumpala kua tuetu kuyijingulula bimpe menemene. Bible udiku utupesha meji bua kujikija ntatu ya buena eyi idi itutekesha mu maboko anyi? Tukonkononayi bimue bilejilu.

KUDIABAKENA BIKOLE

Rosie udi wamba ne: “Ntu nshala ndiabakena bua ntatu kampanda pa kukolesha malu mu lungenyi luanyi anyi pa kudifuanyikijila mudi malu mua kunyanguka bikole pamutu pa kumona tshidiwu menemene.” Mvese kayi ya mu Bible ivua mimuambuluishe? Umue wa kudiyi ngua Matayi 6:34 udi wamba ne: “Kanuditatshishi bua dituku didi dilonda nansha, bualu dituku didi dilonda nedikale ne yadi ntatu. Dituku ne dituku didi ne yadi ntatu idi midikumbanyine.” Rosie udi wamba mpindieu ne: mêyi a Yezu aa akamuambuluisha bua kulekela kuditatshisha bua tshidi mua kuenzeka malaba. Udi wamba kabidi ne: “Nkavua ne ntatu ya bungi, ne kabivua bikengela kukumbaja tunyinganyinga tukuabu bua malu avua kaayi manji kuenzeka ne imue misangu kaayi mua kuenzeka nansha.”

Yasmine pende wakamona ne: tunyinganyinga tukavua tukeba kumuzengela panshi. Udi wamba ne: “Mvua ndila matuku nansha abidi ku lumingu, ne tshivua ndala butuku amue matuku. Mvua nguvua ne: ngenyi mibi ivua india mujima.” Mvese kayi uvua mumuambuluishe? Udi wakula bua 1 Petelo 5:7 udi wamba ne: ‘Nupuile Nzambi ntatu yenu yonso, bualu yeye udi unutabalela.’ Yasmine udi wamba ne: “Pavua matuku enda apita, ngakatungunuka ne kusambila Yehowa, ne wakandamuna masambila anyi. Ngakumvua anu bu ne: bavua bangumbushe bujitu bua bungi pa makaya. Ngenyi yanyi mibi itu ipingana ku musangu ne ku musangu, kadi mpindieu ndi mumanye mua kupita nayi.”

 DILADIKIJA MALU

Nsongakaji kampanda diende Isabella udi wamba ne: “Ndi ngela meji ne: diladikija malu ditu mu mashi bualu papa wanyi utu wenza pende nanku. Ntu ndadikija malu a mushinga bua tshikadi ne tshia kuenza to, anu bua kuikisha anyi kutangila televizion. Ntshibidilu tshibi bualu tshidi tshivudija bia kuenza ne tshifikisha muntu ku dienza mudimu udi kawuyi muimpe.” Dîyi dinene ditu dimuambuluishe didi mu 2 Timote 2:15 udi wamba ne: “Enza muebe muonso bua kumueneka kumpala kua Nzambi bu muntu muanyishibue, muena mudimu udi kayi ne bualu bua kumvuila bundu.” Isabella udi wamba ne: “Tshivua musue bua Yehowa afuishibue bundu bua mudimu wanyi bualu mvua ndadikija malu to.” Mmushintuluke bikole.

Kelsey udi wamba pende ne: “Mvua mua kuikala ne mudimu wa kujikija dîba kampanda dikosa, kadi mvua nguladikija too ne mu minite ya ndekelu. Mvua ndila, mpangila tulu, ne nsamisha mutu. Kabivua bimpe buanyi meme to.” Kelsey wakapeta diambuluisha mu Nsumuinu 13:16 udi wamba ne: “Muntu mudimuke udi wenza malu ne dimanya, kadi mutshimbakane yeye udi uleja butshimbakane buende patoke.” Kelsey udi umvuija muvua dielangana meji pa mvese eu dimulongeshe wamba ne: “Mbimpe kudifila mu dienza mudimu ne kudianjila kulongolola malu. Mpindieu ntu mfunda bionso bindi ne bua kuenza bua kulongolola mudimu udi ulua kumpala, ne bidi bingambuluisha bua kudilongolola, tshiyi ndadikija mudimu too ne mu minite ya ndekelu.”

BUNKAYA

Kirsten udi wamba ne: “Bayanyi uvua mundekele, munshiye ne bana banayi bapuekele.” Ndîyi kayi dia mu Bible divua dimuambuluishe? Nsumuinu 17:17 udi wamba ne: “Mulunda mulelela udi uleja dinanga mu bikondo bionso ne yeye mmuanetu udi muledibue bua bikondo bia dikenga.” Kirsten wakakeba diambuluisha kudi bantu bavua batendelela Yehowa anu bu yeye. Wakapeta tshinyi? Udi wamba ne: “Balunda banyi bakadisuika tshimuku bua kungambuluisha mu mishindu ya bungi menemene! Kuvua bavua banshila biakudia anyi bilongo ku tshiibi. Kasumbu ka bantu kavua kangambuluishe misangu isatu mijima meme ne bana banyi bua kumuangala ne kubuela mu nzubu mukuabu. Muntu umue uvua mungambuluishe bua kupeta mudimu. Balunda banyi bavua anuku bua kungambuluisha.”

Delphine, utukadi batele mu tshiena-bualu tshikuabu, uvua pende mutuilangane ne bunkaya. Udi uvuluka panyima pa mumane kujimija bionso bivuaye nabi wamba ne: “Mvua ndimona anu bu ne: mvua dia muamua dia dididishi, ntangila muvua nsombelu wa bantu bakuabu wenda uya. Mvua ndimona muntu-nkaya.” Mvese uvua mumuambuluishe uvua wa Musambu wa 68:6 udi wamba ne: “Nzambi udi upesha badi nkayabu nzubu wa kusombelamu.” Delphine udi wamba ne: “Mvua mumanye ne: mvese eu kavua wakula anu bua nzubu wetu eu to. Kadi ngakalua kumvua ne: Nzambi udi utupesha nzubu wa mu nyuma, mmumue ne: muaba wa bukubi bulelela udi utuambuluisha bua kudia bulunda ne bantu bakuabu badi banange Yehowa ne kubananga. Kadi mvua mumanye kabidi ne: tshivua mua kusemena kudi bakuabu meme tshiyi muanji kusemena pabuipi ne Yehowa to. Ke bualu kayi Musambu wa 37:4 wakangambuluisha mu bualu abu. Udi wamba ne: ‘Ikala ne disanka dipite bungi mu Yehowa, yeye neakukumbajile majinga a muoyo webe.’”

Udi ujikija wamba ne: “Ngakalua kumona ne: mvua ne bua kulamata Yehowa bikole. Ku balunda bonso bimpe, yeye mmupite bonso. Pashishe ngakafunda malu amvua mua kujinga kuenza ne bakuabu bua kudia bulunda ne bantu badi banange pabu Yehowa. Ngakalonga mua kumona ngikadilu mimpe ya bakuabu ne kubenzela malu anu bu ne: mvua mmona anu ngikadilu yabu mimpe ayi.”

Bushuwa, balunda badi benzela Nzambi mudimu batshidi anu bapange bupuangane. Bantemu ba Yehowa batu baluangana ne ntatu anu bu bantu bakuabu bonso. Kadi malongesha adi Bible ufila adi asaka bantu bua kuambuluisha bakuabu dîba dionso didiku mushindu. Mbimpe kudia bulunda ne bantu ba mushindu eu. Kadi Bible udiku kabidi mua kuambuluisha muntu mu ntatu idi kayiyi mua kujika mpindieu, bu mudi disama dia munanunanu ne tunyinganyinga tukole anyi?

Kutumikila mibelu ya mu Bible kudi mua kukuambuluisha bua kupeta balunda badi mua kukuambuluisha