DISAMA DIA MUNANUNANU ANYI BULEMA BITU BISHINTULULA NSOMBELU BIKOLE. Ulf uvua kumpala ne makanda a mubidi ne muenji wa mudimu. Kadi wakalua kuteketa mubidi. Udi wamba ne: “Biakansamisha mutu bibi be! Makanda anyi ne dikima dianyi ne bukole buanyi biakajika . . . Ngakumvua bu ne: kuanyi kuvua kujike.”

Tshivua tshifikile Ulf tshidi tshituvuluija ne: kakuena muntu udi mua kuenza bua kasami to. Kadi kudi anu mushindu wa kuepuka amue masama. Kadi netuenze tshinyi mubidi wetu wowu wenda uteketa? Bidi bileja ne: tuetu katuakupetaku kabidi disanka anyi? Netumone ne: kabiena nanku to. Kadi tuanji tumonayi amue mêyi manene adi ambuluisha bua kuikala ne makanda a mubidi.

IKALA NE “NKATSHINKATSHI MU BIENZEDI.” (1 Timote 3:2, 11) Tshibidilu tshia kudia kupitshisha anyi kunua kupitshisha tshitu tshikebelangana masama ne tshitudisha makuta a bungi! “Kuikadi munkatshi mua bantu badi banua mvinyo wa bungi, munkatshi mua bantu badi basukumina munyinyi, bualu mukuatshiki wa maluvu ne mudiavi nebabuele mu bupele.”—Nsumuinu 23:20, 21.

KUDINYANGI MUBIDI. “Tudilengeje ku dinyanguka dionso dia mubidi ne dia nyuma.” (2 Kolinto 7:1) Bantu badi badinyanga mibidi padibu badia mfuanka anyi bamunua, anyi padibu ne bunuavi bua maluvu anyi bua manga adi anyungulula mutu. Tshilejilu, tshibambalu kampanda tshia makanda a mubidi tshidi tshiamba ne: kunua makanya “kudi kufikisha ku masama, ku bulema, ne nkufuane kuenzela mubidi wonso bibi.”—U.S. Centers for Disease Control and Prevention.

ANGATA MUBIDI NE MUOYO WEBE BU DIPA DIA MUSHINGA. “Tudi ne muoyo, tudi tuenda, ne tudiku bua bualu [bua Nzambi].” (Bienzedi 17:28) Tuetu tuangata bualu ebu ne mushinga netuepuke njiwu ya patupu patudi ku mudimu, tuendesha, anyi tusungula mushindu wa kupitshisha kapepe. Bisankasanka bia tshitupa tshîpi bidi mua kukushiya mulema kabiena ne bualu bua nsongo to!

DIKANDA KU MEJI MABI. Meji ne mubidi webe bidi bu mukaba ne tshilamba. Nanku epuka tunyinganyinga tua patupu, biji, dialakana, ne meji makuabu a nunku adi mua kukuenzela bibi. Bible udi wamba mu Misambu 37:8 ne: “Umbusha tshiji ne lekela luonji.” Udi  wamba kabidi ne: “Kanuditatshishi bua dituku didi dilonda nansha, bualu dituku didi dilonda nedikale ne yadi ntatu.”—Matayi 6:34.

TUMA MEJI KU MALU MIMPE. Bible udi wamba mu Nsumuinu 14:30 ne: “Muoyo mupole udi upesha mubidi muoyo.” Udi wamba kabidi ne: “Muoyo wa disanka udi buanga buimpe.” (Nsumuinu 17:22) Baminganga batu bamba pabu bualu ebu. Munganga wa mu ditunga dia Écosse wakamba ne: “Wewe ne disanka kuakutamba kusamakana mu matuku adi kumpala mutubi bua bantu badi kabayi ne disanka to.”

ITABA NSOMBELU UUDI NENDE. Anu bu Ulf utukadi batele, tudi mua kudimona benzejibue bua kunanukila lutatu kampanda lua munenganenga, katuyi ne tshikuabu tshia kuenza. Kadi tudi mua kusungula mua kupita nalu. Bamue badi batekeshibua mu mikolo bikole menemene; mbualu budi mua kunyanga kabidi malu bikole. Nsumuinu 24:10 udi wamba ne: “Wewe mutekete mu maboko mu dituku dia dikenga, bukole buebe nebukepe.”

Bakuabu bobu batu bapingana muabu ne kale, imue misangu panyima pa bamane kudiumvua bashikile. Badi bitaba nsombelu udibu nende au. Badi bapeta mishindu ya kupita nende. Ke muvuabi bua Ulf. Wakamba ne: yeye mumane kusambila ne muelangane meji bikole pa mêyi mimpe a mu Bible, “wakatuadija kumona bivuaye mua kuenza pamutu pa kuimanyina anu pa bivuaye kayi mua kuenza.” Anu bu bantu bakuabu badi ne ntatu minene, wakalonga kabidi malu a mushinga adi atangila diumvuilangana luse ne diditeka pa muaba wa bakuabu bivua bimusake bua kuambuluisha bantu bakuabu bua bamanye mukenji wa mu Bible udi ukolesha.

Muntu mukuabu uvua mukenge bikole uvua Steve. Pavuaye ne bidimu 15, wakapeta njiwu ivua mimutekeshe mubidi mujima. Pakakumbajaye bidimu 18, maboko ende akapetulula bukole. Pashishe wakaya ku iniversite kuakayaye kuditua mu dinua dia manga adi anyungulula mutu, maluvu, ne mu tshiendenda tshia masandi. Kavua ne ditekemena nansha dimue too ne pakalongaye Bible uvua muenze bua apete ditekemena bua matuku atshilualua ne alekele bikadilu biende bibi. Wakamba ne: “Munkatshi mua bidimu bia bungi mvua ndiumvua tshiyi ne mushinga nansha mukese, kadi mpindieu kabitshiena nanku to. Ndi ne ditalala ne disanka, ne ndi mmuitabe nsombelu undi nende.”

Malu adi Steve ne Ulf bambe adi atuvuluija mêyi adi mu Misambu 19:7, 8 a ne: “Mukenji wa Yehowa mmupuangane, udi ufilulula bukole. . . . Mêyi matuma a kudi Yehowa mmakane, adi asankisha muoyo; mukenji wa Yehowa mmukezuke, udi ukenkesha mêsu.”