“‘Bualu ndi mumanye bimpe meji andi nnuelela,’ ke mudi Yehowa a wamba, ‘meji a ditalala, ki nga dikenga to, bua kunupesha matuku atshilualua mimpe ne ditekemena.’”​—Yelemiya 29:11, Nkundimuinu wa bulongolodi bupiabupia.

 ‘Ndi mumanye meji andi meme munuelele; tshiena ngela meji a kunutumina dikenga, amu a kunupesha ditalala, diakalenga ne ditekemena. Nzambi ke udi wamba nanku.’​—Yelemiya 29:11, Mukanda wa Mvidi Mukulu (Katolike).

Diumvuija dia Yelemiya 29:11

 Yehowa Nzambi mmulaye batendeledi bende ne: neabapeshe ditalala mu matuku atshilualua. Nansha muvuaye mufundile bantu ba kale mêyi au, adi anu aleja meji adi nawu Nzambi lelu eu. Udi “Nzambi udi ufila ditekemena.” (Lomo 15:13) Nunku mmufundishe milayi ya nunku mu Bible bua “tupete ditekemena” dia matuku atshilualua mimpe.​—Lomo 15:4.

Malu adi Yelemiya 29:11 wakuila

 Mêyi au adi mu mukanda uvuabu batumine bena Isalele bavuabu baye nabu mu bupika mu Babilona bafumina mu Yelushalema. b (Yelemiya 29:1) Nzambi uvua muambile bantu bavua mu bupika abu ne: bavua ne bua kushala mu bupika matuku a bungi ne bavua ne bua kuibaka nzubu, kukuna bintu mu madimi, ne kulela bana. (Yelemiya 29:4-9) Nansha nanku, wakamba kabidi ne: “padi bidimu 70 mu Babilona bikumbana, nentume ntema yanyi kunudi, ne nenkumbaje mulayi wanyi pa kunupingaja [mu Yelushalema].” (Yelemiya 29:10) Nzambi wakabajadikila ne: kavua ne bua kubapua muoyo to, ditekemena diabu dia kupingana kuabu divua ne bua kukumbana.​—Yelemiya 31:16, 17.

 Nzambi wakakumbaja mulayi wende bua bena Isalele. Anu bu mukavuaye muambe, bakakuata Babilona kudi mukalenge Kolesha wa mu Pelasa. (Yeshaya 45:1, 2; Yelemiya 51:30-32) Pashishe Kolesha wakalekela bena Yuda bapingana mu ditunga diabu. Panyima pa bidimu 70 bia bupika, bakapingana mu Yelushalema.​—2 Kulondolola 36:20-23; Ezela 3:1.

 Bu muvua Nzambi mukumbaje mulayi wende udi mu Yelemiya 29:11, bidi bikolesha bonso badi batekemene milayi yende lelu. Tshilejilu, mmulaye bua kufila ditalala pa buloba bujima ku diambuluisha dia Bukalenge buende budi Yezu Kristo ukokesha.​—Misambu 37:10, 11, 29; Yeshaya 55:11; Matayi 6:10.

Malu atubu babuejakaja pa bidi bitangila Yelemiya 29:11

 Mudi bamue babuejakaja: Nzambi neatantshishe batendeledi bende ne bubanji bua bintu bia ku mubidi.

 Bulelela bua bualu: Muaku “kutanta” udi mu Yelemiya 29:11 mu imue Bible, mmukudimuna ku muaku wa mu tshiena Ebelu udi umvuija “ditalala, makanda a mubidi, ne nsombelu wa disanka.” Bua tshidibu bakuila muaba eu, Nzambi uvua mulaye bua kupesha bena Isalele bavua mu bupika ditalala ne nsombelu muimpe kadi ki mbubanji to. Tshisamba tshivua anu ne bua kutungunuka ne kuikalaku, ne tshivua ne bua kupingana mu Yelushalema dimue dituku.​—Yelemiya 29:4-10.