Malu a ntendelelu adi Bible ulongesha ke adi asaka Bantemu ba Yehowa bua kubenga kubuelakana mu malu a tshididi. Katutu tusaka bena tshididi bua kuenza malu kampanda to, katutu tuelela bisumbu bia tshididi anyi bantu tukanda nansha. Katutu tukeba bua kupeta muanzu mu mbulamatadi, ne katutu tubuelakana mu malu a bantu badi bakeba kushintulula mbulamatadi to. Tudi tumona ne: Bible udi ufila bijadiki bimpe bidi bitusaka bua kuenza malu mushindu au.

•   Tudi tulonda tshilejilu tshia Yezu uvua mubenge bua kuikala mfumu wa tshididi. (Yone 6:15) Wakalongesha bayidi bende bua kabikadi “ba pa buloba” to; wakabaleja patoke ne: kabena ne bua kulamata luseke kampanda mu malu a tshididi to.​​—Yone 17:14, 16; 18:36; Mâko 12:13-17.

•   Tudi tulamata Bukalenge bua Nzambi buvua Yezu muakuile pakambaye ne: “Nebayishe lumu luimpe elu lua Bukalenge pa buloba bujima budi bantu basombele.” (Matayi 24:14) Tudi baleji mpala ba Bukalenge bua Nzambi ne mbatupeshe mudimu wa kumanyisha dilua diabu. Ke bualu kayi katuena tubuelakana mu malu a tshididi a mu matunga onso, nansha a mu ditunga ditudi basombele to.​—2 Kolinto 5:20; Efeso 6:20.

•   Bu mutudi katuyi tubuelakana mu malu a tshididi, tudi mua kuambila bena tshididi bonso lumu luimpe lua Bukalenge bua Nzambi badilekelele. Tudi basue kuleja mu mêyi ne mu bienzedi bietu ne: Bukalenge bua Nzambi ke butudi beyemene bua kujikija ntatu ya bukua bantu.​​—Misambu 56:11.

•   Bu mutudi tubenga matapuluka a malu a tshididi, tudi mu buobumue pa buloba bujima bu bena muntu. (Kolosayi 3:14; 1 Petelo 2:17) Kadi bitendelelu bidi bibuelakana mu malu a tshididi bidi bikebesha matapuluka munkatshi mua benamu.​​—1 Kolinto 1:10.

 Tudi tunemeka mbulamatadi. Nansha mutudi katuyi tubuelakana mu malu a tshididi, tudi tunemeka mfumu wa mbulamatadi udi ukokesha ditunga ditudi basombele. Bualu ebu budi bupetangana ne mukenji wa mu Bible wa ne: “Muntu yonso akokele bakokeshi badi ku mutu.” (Lomo 13:1) Tudi tutumikila mikenji, tufuta bitadi, ne tueleshangana diboko ne bionso bidi bamfumu ba mbulamatadi benza bua diakalenga dia bena ditunga. Katutu tukeba bua kutonkola mbulamatadi to, kadi tutu tulonda mubelu wa mu Bible wa kusambila bua “bakalenge ne bonso badi ne bukokeshi,” nangananga padibu bangata mapangadika adi atangila budikadidi bua ntendelelu.​—1 Timote 2:1, 2, dimanyisha.

 Tudi tunemeka kabidi bukenji budi nabu bakuabu bua kudiangatshila mapangadika mu malu a tshididi. Tshilejilu, katutu tunyangakaja masungulangana anyi tupangisha bantu badi bakeba kuelelangana tukanda to.

 Dibenga kubuelakana mu malu a tshididi mbualu bupiabupia anyi? Tòo. Bapostolo ne bena Kristo bakuabu ba mu bidimu lukama bia kumpala bakabenga pabu bua kubuelakana mu malu a tshididi. Mukanda mukuabu udi uleja ne: “Nansha muvua bena Kristo ba kumpala benzejibue bua kunemeka bakokeshi ba mbulamatadi, kabakitaba bua kubuelakana mu malu a tshididi to.” (Good Intentions) Bia muomumue, mukanda mukuabu kabidi udi uleja pawu ne: bena Kristo ba kumpala “kabavua bitaba mianzu anyi midimu mu malu a tshididi to.”​—On the Road to Civilization.

 Dibenga kubuelakana mu malu a tshididi didi dikebela ditunga njiwu anyi? Tòo. Tutu banange ditalala ne bakokeshi ba mbulamatadi kabena ne bualu bua kutshinyina to. Mu 2001, luapolo luvuabu bapatule kudi bena mu tshibambalu tshia Académie nationale des sciences d’Ukraine luakamba bua dibenga kubuelakana dietu mu malu a tshididi ne: “Lelu eu bamue bantu ki mbanange dipangadika dia Bantemu ba Yehowa adi to; ke bualu bunene bumue bumue abu buvuabu babashiminyina kudi bena bukalenge bua tshikokesha nkaya bua bena Nazi ne ba koministe ba kale.” Nansha muvua bena Union Soviétique bakengesha Bantemu, “bavua anu batumikila mikenji ya mbulamatadi. Bakenza mudimu mu madimi ne mu biapu ne muoyo wabu wonso wa munda. Kabakakebela bukokeshi bua ba koministe njiwu to.” Bia muomumue lelu, luapolo alu ludi lujikija luamba ne: malu adi Bantemu ba Yehowa bitabuja ne benza kaena “anyanga bukubi ne ditalala bia ditunga nansha dimue to.”