Le lufu lutabukile Leza bukomo? Nansha dimo! Le lufu—nansha “walwana” mukwabo ye-yense—ubwanya namani kukomena “Leza Mwinebukomobonso”? (1 Kodinda 15:26; Divilu 6:3) Leza udi na bukomo bwa kutalula’ko lufu kupityila ku lusangukilo, kadi i mulaye kulonga kino mu yandi ntanda mipya. * Le ukafikidija uno mulao namani? Yesu mwana wa bunka wa Leza, witusapwila moukafikidila na binenwa bibwanya kuyuja mu mityima yetu lukulupilo.—Tanga Mateo 22:31, 32.

Yesu wānene Basadusea kebādipo bakulupile mu lusangukilo amba: “Lelo mwendele uno mwanda wa kusanguka dikwabo ku lufu kemwatangilepo po kyanenenwe kudi Leza’mba: Ami ngidi Leza wa Abalahama, ne Leza wa Isake, ne Leza wa Yakoba? Aye Leza kadipo Leza wa bafu, mhm, nanshi i Leza wa bōmi.” Pano Yesu wādi wisambila pa mwisambo wēsambile Leza na Mosesa mu kimuna kitema mudilo mu kintu kya myaka 1514 K.K.K. (Divilu 3:1-6) Mungya Yesu, binenwa bya Yehova byaānene Mosesa amba—“Ami ne Leza wa shobe, ne Leza wa Abalahama, ne Leza wa Isake, ne Leza wa Yakoba”—bilombola’mba mulao wa lusangukilo usa kufikidila binebine. Namani?

Tala buluji bubajinji. Kitatyi kyēsambile Yehova na Mosesa, bakulutuba ba Abalahama, Isake ne Yakoba bādi ke bafwe tamba kala—Abalahama na myaka 329, Isake na myaka 224, Yakoba nandi na myaka 197. Bine, Yehova wānene amba “Ami”—ke ‘nādipo’—Leza wabo. Yehova wēsambile pa bano bakulutuba basatu bādi ke bafwe na abo bakidi bōmi. Mwanda waka?

Yesu wāshintulwile amba: “Aye [Yehova] Leza kadipo Leza wa bafu, mhm, nanshi i Leza wa bōmi.” Langulukila’po bidi bityetye pa mushintulwila bino binenwa. Shi lusangukilo lwādi kutupu’lo, nabya Abalahama, Isake, ne Yakoba bādi bakufwa bwa dikala endelela. Shi byādi uno muswelo, Yehova wādi wa kwikala Leza wa bantu bafwe. Kino kyādi kya kushintulula amba lufu lutabukile Yehova bukomo—enka na aye mukomenwe kunyongolola bengidi basatu ba kikōkeji ku bupika bwa lufu.

Le penepa, tubwanya kufula ku kunena bika pa ba Abalahama, Isake, Yakoba, ne bengidi bonso ba Yehova ba kikōkeji bafwile? Yesu wānene bino binenwa bya bukomo amba: “I konka kudi aye ko bamwena muya bonso’tu.” (Luka 20:38) Na bubine, mpango ya Yehova ya kusangula bengidi bandi ba kikōkeji bafwile isa kufikidila, o mwanda wibamona bwa abo bōmi. (Loma 4:16, 17) Yehova ukalama nyeke bano bonso mu luté lwandi lwampikwa mfulo kufika ne pa kitatyi kyandi kitungwe kya kwibajokejeja ku būmi.

Le kyepelo kya kwilunga monka mu bumo na baswe betu bafwile kibakusangaja? Shi i amo, nabya vuluka’mba Yehova udi na bukomo kebudi mpwilo kutabuka lufu. Kekudipo kintu kibwanya kumukankaja aleke kufikidija mulao wandi wa kusangula bafwe. Penepa ubulwe’po kwifunda bivule pa mulao wa lusangukilo ne padi Leza mwine ukeufikidija? Kulonga namino kukakufwenya bininge kudi Yehova, “Leza . . . wa bōmi.”