Enda ku bidi'mo

Enda ku kifunka

Le Myanda Miyampe Itala Kipwilo I Myanda’ka?

Le Myanda Miyampe Itala Kipwilo I Myanda’ka?

Wifunde mu Kinenwa kya Leza

Le Myanda Miyampe Itala Kipwilo I Myanda’ka?

Kino kishinte kisambila pa bipangujo byokodi padi mwiipangule ne kukulombola kwine kokokeja kutanga malondololo mu obe Bible. Batumoni ba Yehova bakasangela kwisambila nobe pa ano malondololo.

1. Lelo bipwilo byonso i biyampe?

Mu bipwilo bivule mudi bantu babinebine basaka kusangaja Leza. Leza umwene bano bantu kadi wibatele mutyima. Ino i kyabulanda, mwanda bantu bamo bengidijanga kipwilo na bitungo bibi. Pa kala, bendeji ba bipwilo bāmwesheshe balwana nabo malwa. (2 Kodinda 4:3, 4; 11:13-15) Dyalelo nadyo, mungya malapolo a panopano, bendeji bamo ba bipwilo bakankamikanga butumbula, kukwatakanya divita, nansha kona bana batyetye.—Tanga Mateo 24:3-5, 11, 12.

Bible ufundija amba kudi bipwilo bya miswelo ibidi—kipwilo kya bine ne kya bubela. Kipwilo kya bubela kekifundijangapo bubinebine butala padi Leza. Inoko, Yehova Leza usakanga bantu bayuke bubinebine bumutala.—Tanga 1 Temote 2:3-5.

2. Le myanda miyampe itala kipwilo i myanda’ka?

Leza kasakangapo bantu batyumunwe mityima na bipwilo bitēla bu bimusenswe ino abyo bimufutulwile. Na bubine, boba balamete ku bino bipwilo basenswe kwikala balunda na ntanda mine yendejibwa na Satana Dyabola. (Yakoba 4:4; 1 Yoano 5:19) Kinenwa kya Leza kilombola amba, bipwilo bikwatakanya imbikalo ya bantu pa kyaba kya kutumbija Leza bidi pamo bwa wabwitwa. Bible utela uno wabwitwa bu “Babiloni Mukatakata,” dijina dya kibundi kya kala mwāshilwile mutōtelo wa bubela kupwa kwa Dilobe dya mu mafuku a Noa. Panopano ponka, Leza usa kufudija mu kitulumukila bipwilo bityumuna bantu mityima ne kwibasusula.—Tanga Kusokwelwa 17:1, 2, 5, 17; 18:8, 23, 24.

3. Le Leza usa kuletela ntanda yonso nsangaji namani?

Butyibi bwiya’ko busa kutyibilwa bipwilo bya bubela, i mwanda muyampe. Busa kusenga bantu bonso basusuka kujokoloka ntanda yonso. Bipwilo bya bubela kebikongolapo bantu dikwabo nansha kwibakalañanya. Muntu yense ukekala’ko mūmi ukelunga mu mutōtelo wa Leza umo kete wa bine.—Tanga Isaya 11:9; Kusokwelwa 18:20, 21; 21:3, 4.

4. Le bantu bampikwa budimbidimbi bafwaninwe kulonga bika?

Yehova kedilwepo bantu bampikwa budimbidimbi bazambalele mu bipwilo bya bubela bidi pano pa ntanda ponso. Pano ukongakenyanga bano bantu pamo na kwibafundija bubinebine.—Tanga Mika 4:2, 5.

Yehova utambulanga mu kisaka kyandi boba bonso basaka kumwingidila. Nansha shi balunda netu ne babutule abafitwa kitatyi kyotushilula kwingidila Yehova, ino tukamwena’mo bivule. Twikalanga mu kipwano na Leza, kwikala mu “kisaka” kipya kadi kya buswe, ne na kyepelo kya kumona būmi bwa nyeke.—Tanga Mako 10:29, 30; 2 Kodinda 6:17, 18.

Shi usaka kuyukila’ko myanda mivule, tala shapita 15 ne 16 wa dino dibuku, Lelo I Bika Bine Bifundija Bible?, dilupwilwe na Batumoni ba Yehova.

[Kutambile Kifwatulo pa paje 26]

The Complete Encyclopedia of Illustration/J. G. Heck