“Bikopelo” bya Yehova Bitompanga Bonso
“Bikopelo” bya Yehova Bitompanga Bonso
‘Bikopelo bya Yehova bitompanga bana ba bantu.’—MIT. 11:4.
1. Lelo tuloelelwanga kuyuka bantu ba muswelo’ka?
LELO umonanga namani boba bakutele mutyima binebine? Shi wibepangule, bakulombola pampikwa kafinda mobakumwenanga. Kitatyi kyosakilwa bukwashi, bakukwasha na mutyima tō. Kadi shi wibalombe madingi, bakupa’o na buswe. (Mit. 141:5; Ngat. 6:1) Mwene uloelelwe kuyuka bano bantu? Bine, Yehova ne wandi Mwana i bantu ba uno muswelo. Kadi, bakutele mutyima kutabuka muntu ye-yense, ne kyobafwila, ke kamwenopo kabo, ehe; ino basaka kukukwasha ‘ukwatyije ku būmi nabo i būmi bulumbuluke.’—1 Tem. 6:19; Kus. 3:19.
2. Lelo Yehova utele bengidi bandi mutyima muswelo’ka?
2 Davida mulembi wa mitōto wālombwele amba Yehova witutele mutyima bininge paānene amba: ‘Bikopelo bya Yehova bitompanga bana ba bantu.’ (Mit. 11:4) I amo, Leza ketutalangapo bitupu; ino witutompanga. Kadi Davida wāsonekele amba: “Ubantompa wami mutyima; ubampempula bufuku . . . [ku]mwenepo nansha kamo.” (Mit. 17:3) I kimweke patōka amba Davida wādi ujingulwile amba Yehova umutele mutyima bininge. Wāyukile amba shi alame milangwe ya bubi ne kwikala na kabi nansha kamo mu mutyima, nabya ukasanshija Yehova mutyima, nandi ukamufityilwa. Lelo Yehova i wa bine kodi na mwaādi wikadile kudi Davida?
Yehova Utalanga Mutyima
3. Yehova ulombolanga namani amba kemaninangapo pa tubilubo twetu tutyetutye?
3 Kintu kibajinji kitele’ko Yehova mutyima i muntu wa munda—mwine mwikadile mutyima wetu binebine. (Mit. 19:14; 26:2) Shako, i kiyampe’po kashā, mwanda Leza kemaninangapo pa tubilubo tutyetutye. Kimfwa, Sala, mukaja Abalahama, pa kutuna byānene mwikeulu muvwale ngitu ya bu muntu, mwikeulu wāmwene amba wākwata moyo ne kukakilwa, o mwanda kāmufuninepo paāmudingile. (Ngal. 18:12-15) Mukulutuba Yoba nandi pa kwibingija “aye mwine pakatampe, Leza patyetye,” Yehova kālekelepo kumwesela, mwanda wāyukile amba kineneja Yoba i masusu makatampe amususula Satana. (Yoba 32:2; 42:12) Mo monka, Yehova kāfityilwepo mwana-mukaji wa kishala wa mu Zelefata pa mwanda wa binenwa bilupuka ku mutyima byaānene mupolofeto Ediya. Leza wāivwanije amba mutyima umupēpanga mwanda wa mwana umo kete wamufwilwa.—1 Bal. 17:8-24.
4, 5. I muswelo’ka wālombwele Yehova mutyima wandi wa kulangila bantu kukwatañana na byaālongēle Abimeleke?
4 Yehova utompanga mutyima, o mwanda ulangilanga’nka ne bantu bakubulwa kwitabija. Ivwana byaālongēle Abimeleke, mulopwe wa Ngelala, kibundi kya Bene Fidishitia. Kumeso kwa Abimeleke kufwena Sala, Yehova wāmunena mu kilotwa’mba: “Binebine mo monka, ami ndyukile mo walongele kino ne mutyima moloke’tu, ino ami nami nakukankaja abe kumpya mambo, po pa mwanda o nkikulekele na’mba umutenge. Nanshi pano lubula mukaja muntu’uno’u, mwanda aye i mupolofeto, kadi ukakulombelela nobe ukamona bumi.”—Ngal. 20:1-7.
5 Kunena na bubine, Yehova wādi wa kusanshija Abimeleke, mutōtyi wa bilezaleza. Inoko, wāmwene amba pano walonga kino kintu na mutyima moloke. Yehova pa kulangila pa kino, wālombwele mulopwe kya aye kulonga pa kusaka amba alekelwe ne ‘amone būmi.’ Mwene ye Leza wa uno muswelo osaka kutōta?
6. Yesu wāiwile Shandi mu bika ne bika?
6 Yesu wādi ukimba biyampe mu bandi bana ba bwanga ne kwibalekela bukidi bonka bilubo byabo mwanda wādi wiula Shandi mu byonso. (Mako 10:35-45; 14:66-72; Luka 22:31, 32; Yoa. 15:15) Mumweno wa Yesu i mukwatañane na byaānene mu Yoano 3:17 amba: “Leza katuminepo Mwana wandi panopantanda aponeje panopantanda mhm, poso’mba bapanopantanda bapandile kudi aye.” Bine, Yehova ne Yesu betuswele buswe bukatampe kadi bwa nyeke. Ne kino i kimweke mu muswelo obetusakila būmi. (Yoba 14:15) Buno buswe bo bulengeje Yehova etutompe, etumone mwaitumwena, ne kwitulongela bintu mwamwenine.—Tanga 1 Yoano 4:8, 19.
Utompanga na Meso a Buswe
7. Le i kika kine kitutompelanga Yehova?
7 Nanshi i bibi kulanga amba Yehova i mpulushi wa mūlu witubenza pano panshi mwa kwitukwatyila shi tubalonga bubi! Satana ye udi na diso dibi, dya kujingulula bakwabo. (Kus. 12:10) Kadi wibafwatakenyanga ne bya bubela! (Yoba 1:9-11; 2:4, 5) Ino mulembi wa mitōto wāsonekele padi Leza amba: “Shi abe, Yehova, ubangile mambo nankyo le i ani, a Mfumwami, ukēmananga?” (Mit. 130:3) Tubwanya kulondolola’mba, I kutupu nansha umo! (Mus. 7:20) Yehova aye witutalanga bu mbutwile wa kilelo, udi na meso a lusa ne kanye, usaka kukinga bandi bana ku bibi. Divule witudyumunanga ku kubulwa kubwaninina ne ku buzoze bwetu kutyina’mba twakesanshija batwe bene.—Mit. 103:10-14; Mat. 26:41.
8. Le Yehova upanga bengidi bandi bulombodi ne kwibadingila muswelo’ka?
8 Buswe bwa Leza i bumweke mu bulombodi ne madingi aetudingila kupityila ku Bisonekwa ne ku bidibwa bya ku mushipiditu biletwa na “umpika wa binebine, udi na manwa.” (Mat. 24:45; Bah. 12:5, 6) Kadi Yehova witukwashanga kupityila ku kipwilo kya Bwine Kidishitu ne ku “byabuntu ku bantu” bakyo. (Ef. 4:8) Kupityidila Yehova utalanga muswelo otwitaba ku bufundiji bwandi bwa bumbutwile, kadi usakanga kwitukwasha. Mitōto 32:8 inena’mba: “Nkakulombolanga ñeni, ne kukufundija mu dishinda dyōkendanga: Nkakupanga ñeni ne dīso dyami ponka padi abe.” Bine, nanshi i kipite buya tuteje nyeke Yehova! Tufwaninwe kwityepeja ku meso andi ne kuyuka amba aye ye Mufundiji ne Tata wetu wa buswe.—Tanga Mateo 18:4.
9. Lelo i tuto’ka totufwaninwe kwepuka, ne mwanda waka?
9 Ku mutamba mukwabo, ketufwaninwepo kūmija mutyima mwanda wa mitatulo, kubulwa lwitabijo, nansha mwanda wa “kongolwa kwa bubi.” (Bah. 3:13; Yak. 4:6) Divule, tuno tuto tushilulanga kitatyi kitamija muntu milangwe imbi nansha bilokoloko. Pakwabo wafikila’nka ne pa kupela madingi mayampe a mu Bisonekwa. Kibi kutabuka, ubwanya’nka ne kwendelela mu mwikadila nansha mu mashinda andi mabi, amutwala ku kwikala walwana na Leza—ngikadilo ilenga moyo! (Nk. 1:22-31) Tala kimfwa kya Kena, mwana umbedi wa ba Adama ne Eva.
Yehova Utalanga Byonso ne Kulongela Monka
10. Mwanda waka Yehova wāpelele kyakwela kya Kena, ne Kena nandi wālongele’po namani?
10 Ba Kena ne Abele pobālambwile byakwela kudi Yehova, Yehova kātelepo mutyima’nka ku byabuntu byabo, ino wātadile ne mu mityima yabo. O mwanda Leza wāitabije kyakwela kya Abele kyāelele na lwitabijo, ino wāpela kya Kena mwanda kāelele’kyopo na lwitabijo. (Ngal. 4:4, 5; Bah. 11:4) Kena, pa kyaba kuboila ñeni ku kino ne kushinta mumweno wandi, ino aye wākalabela mwanabo.—Ngal. 4:6.
11. Lelo Kena wādimbilwe namani na mutyima wandi, ne i ñeni’ka yotuboila’ko?
11 Yehova wāmwene kyaka kidi’po, penepa wēsamba na Kena na mutyima mutūke, ne kumulombola amba shi ulonge biyampe nabya ukatambulwa. Ino yō, Kena wāfutulula madingi a Umpangi wandi ne kwipaya wāipaya mwanabo. Mutyima umbi wa Kena wāmwekele kadi ne mu mulondolwelo wa kibengo waālondolwele Leza wāmwipangwile amba: “Le Abele mwanenu udi kwepi?” Kena kishima-tentu amba: “Nkiyuka. Lelo amiwa ne mulami wa mwanetu’ni?” (Ngal. 4:7-9) Bine, mutyima utabukile kudimbañana—kufika’nka ne kufutulula madingi aleta Leza aye mwine! (Yel. 17:9) Shi ke pano, tuboilei ñeni ku ino nsekununi ne kusumbula na kampeja-bukidi milangwe mibi ne bilokoloko. (Tanga Yakoba 1:14, 15.) Shi tubapebwa madingi a mu Bisonekwa, tufwijei’ko ne kwiamona bu kilomboji kya buswe bwa Yehova.
I Kutupu Bubi Bufyame
12. Lelo Yehova utyibilanga babi mambo muswelo’ka?
12 Bamo balañanga amba shi kekudipo muntu umumwene palonga bubi, nabya wapande. (Mit. 19:12) Na bubine, i kutupu bubi bufyame nansha bumo. “Bintu byonsololo bidi patōka tō, bisokwelwe mu meso a aye o tudi nandi.” (Bah. 4:13) Yehova i Mutyibi utompa bidi mu mityima yetu, ne kwitutyibila mambo mungya boloke bwandi bubwaninine. Aye i “Leza! muyule lusa ne buntu, wija pakufuna bulobo, kadi i wa kanye ka ntanda ne ntanda, ne binebinepo.” Inoko “kakatombolapo” boba bakubulwa kwisāsa, bapya “mambo a mu lupata,” badi na milangwe ne bakuta nkuku minyengakane. (Div. 34:6, 7; Bah. 10:26) Kino kyāmwekele mu byālongēle Yehova ba Akana, Ananaisa ne Safaila.
13. Lelo milangwe imbi yāfikidije Akana muswelo’ka ku kulonga kilongwa kibi?
13 Akana wājilwile kijila kya Leza kya patōkelela, pa kuyata kitutwe kya mu kibundi kya Yediko ne kufya’kyo mu dipema dyandi, kadi bimweka amba kisaka kyonso kyādi kiyukile. Pāyukene bubi bwandi, Akana wāmwene amba kilubo kyandi i kikatampe, penepa wānena’mba: “I bine napi mambo padi Yehova.” (Yos. 7:20) Pamo bwa Kena, Akana wātamije mutyima umbi. Mu mwanda wa Akana, makomwa-meso o amutonwene, amufikija ku kudimbañana. Bitutwe byonso bya mu Yediko byādi bya Yehova, nanshi Akana wāibile Leza, ne kino kyāmufikije ku lufu pamo ne kisaka kyandi.—Yos. 7:25.
14, 15. Mwanda waka kyādi kyendele’mo Leza apele ba Ananaisa ne Safaila, ne i ñeni’ka yotuboila’ko?
14 Ino ba Ananaisa ne Safaila mukajandi bādi mu kipwilo kibajinji kya Bwine Kidishitu kya mu Yelusalema. Kupwa’tu kwa Pentekosa wa 33 K.K., kwāikele mukongo wa kukwasha nao betabije bapya bafudile, bātambile mu matanda a kulampe ne kushikata mafuku mu Yelusalema. Uno mukongo wādi mukwatakanibwe na byabuntu bya kwisakila. Ananaisa wāpoteje budimi, ino kākatūdilepo lupeto lonso ku uno mukongo. Inoko, wēmwekeja amba wātūla lupeto lonso, ne wandi mukaji nandi wādi uyukile’kyo. Na bubine, bano ba mulume ne mukaji bādi bafwila ntumbo ya pa bula mu kipwilo. Inoko kilongwa kyabo i budimbañani. Penepa Yehova wāsokwela mu kingelengele buno budimbañani kudi mutumibwa Petelo, nandi wātuluja Ananaisa kilubo kyandi. Pa kino, Ananaisa wāpona panshi, wāfwididila. Kepaijijepo Safaila nandi wāfwa fwē.—Bil. 5:1-11.
15 Ba Ananaisa ne Safaila kebāponenepo’tu mu bukōkekōke bwa kitatyi kityetye. Nkuku yabo yādi ya kubepela ne kongola batumibwa. Kibi kutabuka, ‘bābepele mushipiditu sandu ne Leza.’ Byālongele Yehova bilombola patōkelela amba i mwiteakanye kukinga kipwilo ku banzazangi. “Yō, i byamalwa ne malwa pa kuponena monka mu makasa a Leza wa būmi”!—Bah. 10:31.
Ikala Mululame Kyaba Kyonso
16. (a) Le Satana onanga namani bantu ba Leza? (b) Lelo i makinga’ka atele Dyabola mwanda wa kona bantu ba kwenu?
16 Satana uloñanga bukomo bonso mwanda wa kwitona ne kwitufikija ku kupelwa na Yehova. (Kus. 12:12, 17) Milangwe imbi ya Dyabola i mimweke patōka mu ino ntanda, mitādilwe na busekese ne bupolapola. Pano bibapēla kutala bantu badi mutaka ku makompyuta ne ku matelefone a ku makasa. Ketukikolwa nansha dimo kuponena mu makinga a Satana. Ino nanshi twikalei na mumweno na wādi na Davida mulembi wa mitōto wālembele amba: “Nkēkalanga wa ñeni ya mu mwikadilo mulumbuluke. . . . Nkanañanga mu njibo yami ne mutyima mubwaninine.”—Mit. 101:2.
17. (a) Mwanda waka Yehova usokolanga patōka mwenda mafuku bubi bufyame? (b) Le tufwaninwe kusumininwa kulonga bika?
17 Dyalelo, Yehova kasokolangapo bubi bukatampe ne bongojani mu kingelengele na mwaālongele kyaba kimo pa kala. Nansha nabya, umwene byonso ne mu kitatyi kyatungile ne muswelo wasakile aye mwine ukasokwela patōka byonso bifyame. Polo wānene amba: “Bubi bwa bamobamo i busokokele kala patōka butangile ku kidye; ino bwa bangi bamo bulonda munyuma.” (1 Tem. 5:24) Kine kitononanga Yehova asokwele patōka bilongwa bibi i buswe. Uswele kipwilo kadi usaka kwikilama kitōka. Ne kadi, ufwilanga lusa boba baponena mu bubi ne besāsa binebine. (Nk. 28:13) Shi ke pano, tulongei bukomo bwa kulama mutyima mubwaninine kudi Leza ne kupela byonso bibwanya kwitona.
Lama Mutyima Mubwaninine
18. Mulopwe Davida wādi usaka wandi mwana evwanije bika bitala padi Leza?
18 Mulopwe Davida wālombwele wandi mwana Solomone amba: “Yuka Leza wa shobe ne kumwingidila ne mutyima mubwaninine ne wa mūya uswele; mwanda Yehova usaatanga mityima yonso, wivwanija milangwe yonsololo ya mifwatakanyo.” (1 Bil. 28:9) Davida wādi usaka wandi mwana alonge bipite ne pa kukulupila mudi Leza. Wādi usaka Solomone evwanije amba Yehova utele bengidi bandi mutyima pakatampe pene. Lelo nobe ufwijanga’ko Yehova pa kino?
19, 20. Kukwatañana na Mitōto 19:7-11, i bika byākweshe Davida afwene kudi Leza, ne i muswelo’ka otukokeja kumwiula?
19 Yehova uyukile amba ukakokela bantu ba mityima myoloke kwadi, ne amba shi bayuke ngikadila yandi milumbuluke bakapwana nandi. O mwanda Yehova usakanga tumuyuke ne kuyukidija bumuntu bwandi bwa kutendelwa. Muswelo’ka? Na kwifunda Kinenwa kyandi ne kwimwena madyese andi mu bwetu būmi.—Nk. 10:22; Yoa. 14:9.
20 Lelo utañanga Kinenwa kya Leza difuku ne difuku na mutyima wa kufwija’ko ne kulombela ponka? Lelo umonanga mvubu idi mu kulonda misoñanya ya mu Bible? (Tanga Mitōto 19:7-11.) Shi i amo, lwitabijo lobe mudi Yehova ne buswe bomuswele bikenda bitama. Kadi, aye nandi ukafwena kodi, ne kunanga nobe kakasa kakasa. (Is. 42:6; Yak. 4:8) Bine, Yehova ukakusanswa ne kukwesela madyese, ne kukukinga ku mushipiditu ponso ponangila mu dishinda dityetye ditwala ku būmi.—Mit. 91:1, 2; Mat. 7:13, 14.
Usa Kulondolola Namani?
• Mwanda waka Yehova witutompanga?
• Le i bika bifikijanga bamo ku kwikala balwana na Leza?
• Tukalombola namani amba Yehova i wa bine kotudi?
• Le i muswelo’ka otubwanya kulama mutyima mubwaninine kudi Leza?
[Bipangujo bya Kifundwa]
[Kifwatulo pa paje 9]
Yehova witutalanga namani pamo bwa mbutwile wa kilelo?
[Kifwatulo pa paje 10]
Le i ñeni’ka yotwaboila ku kimfwa kya Ananaisa?
[Kifwatulo pa paje 11]
Lelo i bika biketukwasha twingidile nyeke Yehova na mutyima mubwaninine?