Difuku dimo mu Dya Yenga ku kyolwa, Kenneth ne Filomena, bashikatanga mu Curasao, baendele kukapempula ba mulume ne mukaji bamo bobadi befunda nabo Bible.

Kenneth unena’mba, “Potwafikile, twatene kwinjibo kufunge, motoka nao patupu’o. Inoko kudi’nka na kintu kyansukumine ngite wandi mukaji ku telefone.”

Mukaji waungitaba ne kunombola’mba wandi mulume udi ku kaji. Inoko, aye pa kujingulula’mba i ba Kenneth ne Filomena badi panja, waiya kushitula mulango ne kwibatweja.

Na pano kala, bamumona’mba wadi udila. Kenneth pa kushilula kifundwa kya Bible na milombelo, lolo’wa waanza kudila monka. Ebiya ba Kenneth ne Filomena bamwipangula na kanye mwanda waadi nao ku mutyima.

Mwana-mukaji’wa walondolola’mba wadi mukwate mulangwe wa kwiipaya’nka mu kine kyolwa’kya, wadi kalembela wandi mulume mukanda wa kumulombola kine kyaeyoela, ino walekele’byo kulemba mukanda’wa pamwityile Kenneth ku telefone. Webasapwidile amba wikondanga na njia, kupwa nabo bamukankamika na mavese a mu Bible. Kukankamika kobamukankamikile kwapandije būmi bwandi.

Kenneth unena’mba “Twafwijije’ko Yehova pa kwitupa mukenga wa kukwasha uno lolo wadi mulēmenenwe na njia, nakampata pa kwitutonona twite ku telefone​—padi i kupityila ku mwikeulu nansha ku mushipiditu wandi ujila!” *

Lelo ba Kenneth ne Filomena badi na bubinga bwa kukulupidila’mba i Leza watengele’po kuboko, padi i kupityila ku mwikeulu nansha ku bukomo bwandi bwingila bwa mushipiditu ujila? Nansha’tu i mwanda Kenneth watubukile’po?

Na bubine ketuyukilepo. Inoko kyotuyukile i kino amba Leza wingidijanga bamwikeulu mwanda wa kukwasha bantu ku mushipiditu. Kimfwa, Bible unena’mba Leza wāingidije mwikeulu umo wāludika Fidipa, musapudi mwine Kidishitu amba akakwashe ntyikala mwine Efiopya wādi usakilwa bukwashi ku mushipiditu.​—Bilongwa 8:26-31.

Mitōtelo mivule ikulupile mu bipangwa bya ku mushipiditu bya bukomo bukatakata, ne amba bipangwa bimo bya ku mushipiditu bingilanga mwanda wa kufikidija kiswa-mutyima kya Leza ne kulama muntu ne muntu. Bantu bavule nabo kebakulupilepo’tu enka’mba bamwikeulu badi’ko, ino bakulupile kadi amba bino bipangwa bya ku mushipiditu bidi na lupusa pobadi mu muswelo kampanda. Inoko, bantu bakwabo bavule kebakulupilepo mu bamwikeulu.

Lelo bamwikeulu badi’ko bine? Shi badi’ko, le bātambile kwepi? Le i bubine’ka butala bamwikeulu? Lelo badi na lupusa pa būmi bobe? Lekai tubandaule’ko bubinga palapala.