Enda ku bidi'mo

Enda ku kifunka

MUTWE WA MWANDA WA PA KIBALU | BAMWIKEULU​—LELO BADI’KO BINE? KYOWIKADILE MWANDA WA MVUBU

Lelo Kudi Bamwikeulu Babi?

Lelo Kudi Bamwikeulu Babi?

En-en, badi’ko. Le bātambile kwepi? Vuluka, Leza wāpangile bamwikeulu na kyabuntu kya bwanapabo bwa kwitongela. Abo ba mwana-mulume ne mwana-mukaji babajinji, ba Adama ne Eva bapwa’tu kupangibwa, kipangwa kimo kibwaninine kya ku mushipiditu kyāingidije bibi bwanapabo bwakyo bwa kwitongela ne kulengeja butomboki pano pa ntanda. Kyālengeje ba Adama ne Eva batombokele Leza. (Ngalwilo 3:1-7; Kusokwelwa 12:9) Bible katelelepo dijina dya kino kipangwa kya ku mushipiditu nansha mu mulongo mokyādi momwa mūlu kumeso kwa kutomboka. Ino akyo pa kupwa kutomboka, Bible wēkityile pa dijina dikifwaninwe dya bu Satana, kushintulula ko kunena’mba “Kinkwa,” ne dya bu Dyabola, dishintulula’mba “Vubavuba.”​—Mateo 4:8-11.

Inoko i kya bulanda, mwanda butomboki bobātombokele Leza kebwāfudilepo’nka pene’pa. Mu mafuku a Noa namo bamwikeulu bampikwa kuyukana buvule bāshile “kīkalo kyabo kine kibafwaninwe” mu kisaka kya Leza kya momwa mūlu. Bāiya pano panshi ne kuvwala ngitu ya misunya kebalonga bilongwa bibi ne busekese, bintu kebikwatañenepo na kipangila kyabo.​—Yude 6; Ngalwilo 6:1-4; 1 Petelo 3:19, 20.

Le i bika byāfikile bano bamwikeulu babi? Leza pa kuleta dilobe dya ntanda yonso mwanda wa kutōkeja pano pa ntanda, bano bamwikeulu babi bāvūdile imbidi ya misunya ne kujokela mu kīkalo kya ku mushipiditu. Inoko, Leza kālekelepo bano bamwikeulu bajokele pa “kyaba kyabo kibajinji.” Ino, wēbatakikīle mu ngikadilo ya bulanda ya ku mushipiditu, mu “bīna bya fukutu bwī,” bine biyukene bu Talataluse. (Yude 6; 2 Petelo 2:4) Bano bandemona bāketūdile abo bene mu lupusa lwa Satana Dyabola, “mulopwe wa bandemona,” mwine “wiinanyanga bu mwikeulu wa kitōkeji.”​—Mateo 12:24; 2 Kodinda 11:14.

Bible ufundija’mba Bulopwe bwa Leza bupelwe Meshiasa, umbikalo wa momwa mūlu, bwashimikilwe mu 1914. * Kinondanonda’tu na kino kinkumenkume kikatampe, Satana ne bandemona bandi bapangilwe mūlu ne kwelwa pano pa ntanda. Kuvula kwa bibi ne busekese bine bisusula bantu pano pa ntanda i bilupuke ku bukalabale ne ku lupusa lwabo lubi.​—Kusokwelwa 12:9-12.

Inoko, kuvula kwa bintu bibi ne bukalabale bwa malwa kulombola’mba pano lupusa lwabo lubi keludi pabwipi ne kufula. Panopano ponka, bino bipangwa bya ku mushipiditu kebisapo kwikala na bukomo bwa kulonga kintu. Ebiya Bulopwe bwa Leza pa kupwa kuludika pano pa ntanda mu bula bwa myaka 1000, ino mishipiditu mibi ikapebwa mukenga wa mfulo mu kakitatyi katyetye wa kutompa muzo wa muntu. Kupwa ikonakanibwa lonsololo.​—Mateo 25:41; Kusokwelwa 20:1-3, 7-10.

^ mus. 6 Shi usaka kuyukila’ko bivule pa Bulopwe bwa Leza, tala shapita 8 wa dibuku Lelo I Bika Bine Bifundija Bible? dilupwilwe na Batumoni ba Yehova. Ditūdilwe ne pa www.jw.org