Enda ku bidi'mo

Enda ku kifunka

 KISHINTE KYA KWIFUNDA 12

Buswe Bwitukwashanga Tūminine Mushikwa

Buswe Bwitukwashanga Tūminine Mushikwa

“Nemusoñanya bino’bi, amba mwisanswe banwe bene na bene. Shi ino ntanda ibemushikwe, muyukile amba yanshikilwe bidi amiwa kumeso kwa kwimushikwa banwe.”​—YOA. 15:17, 18.

LWIMBO 129 Tūmininei Nyeke

BIDI MU KISHINTE *

1. Mungya Mateo 24:9, mwanda waka ketufwaninwepo kutulumuka shi ino ntanda i mitushikwe?

YEHOVA wētupangile na mutyima wa kusanswa ne kuswibwa. O mwanda shi muntu wetushikwe, bitusansanga kadi padi twaivwana enka ne moyo. Kimfwa, kaka umo witwa bu Georgina ushikatanga mu Bulaya unena’mba: “Ponadi na myaka 14, mama wanshikilwe pa mwanda wa kwingila konadi ñingidila Yehova. Nemwene bu mwelwe, ebiya nashilula kutatana shi ndi muntu muyampe.” * Tutu umo witwa bu Danylo walembele amba: “Pankupile basola, bantuka mutonko ne kunzakaja mwanda’po’tu ne Kamoni wa Yehova, nazakele ne kwivwana bumvu.’’ Kwitushikwa uno muswelo kwitusansanga, inoko kekwitutulumujangapo. Mwanda Yesu wālaile kala’mba baketushikwa.​—Tanga Mateo 24:9.

2-3. Mwanda waka bantu ba ino ntanda i bashikwe balondi ba Yesu?

2 Ntanda ishikilwe balondi ba Yesu. Mwanda waka? Mwanda pamo bwa Yesu, netu ‘ketudipo ba ino ntanda.’ (Yoa. 15:17-19) O mwanda nansha byotulēmekele imbikalo ya bantu, tupelanga kwiitōta nansha kutōta bintu byoyelekejibwe nayo. Tutōtanga Yehova kasuku kandi. Tukwatakanyanga lupusa lwa Leza lwa kuludika muzo wa muntu​—lupusa lwine lobalwa kudi Satana ne “lutundu” lwandi. (Ngo. 3:1-5, 15) Tusapulanga’mba enka Bulopwe bwa Leza kete bo bukapwa makambakano a muzo wa muntu, ne amba buno Bulopwe busa konakanya panopano ponka balwana nabo bonso. (Dan. 2:44; Kus. 19:19-21) Uno musapu i myanda miyampe ku boba betyepeje, inoko myanda mibi ku babi.​—Ñim. 37:10, 11.

 3 Kadi bantu i betushikwe mwanda tulondanga misoñanya myoloke ya Leza mu būmi bwetu. Ino misoñanya i mishile kulampe na ngikadila myoneke ya ino ntanda. Kimfwa, dyalelo bantu ke betabije patōkelela bilongwa bya disubi na byobya byālengeje Leza onakanye Sodoma ne Ngomola! (Yude 7) Batwe byotulondanga misoñanya ya mu Bible pa bino bilongwa, bantu bavule betuzawilanga ne kwitumona bu bantu ba kasumalomo.​—1 Pe. 4:3, 4.

4. Le i ngikadila’ka itukomejanga kitatyi kitushikwa bantu?

4 Le i bika bibwanya kwitukwasha tūminine shi bantu abetushikwe ne kwitutuka? Tufwaninwe kukulupila bininge amba Yehova uketukwasha. Pamo bwa ngabo, lwitabijo lwetu lubwanya ‘kubula miketo yonso ya mudilo ya yewa mubi.’ (Ef. 6:16) Inoko kutentekela pa lwitabijo, tusakilwa ne kintu kikwabo. Tufwaninwe kwikala ne na buswe. Mwanda waka? Mwanda buswe “kebukelwangapo bulobo.” Butyumwinanga mu manwi ne kūminina bintu byonso bisansa. (1 Ko. 13:4-7, 13) Pano tutalei muswelo ubwanya kwitukwasha kusanswa Yehova, kusanswa banabetu mu lwitabijo, kusanswa ne balwana tūminine mushikwa.

KUSANSWA YEHOVA KWITUKWASHANGA TŪMININE MUSHIKWA

5. Le Yesu wābwenye kulonga bika pa mwanda wa buswe bwaādi usenswe Shandi?

5 Bufuku, kumeso’tu kwa balwana kwipaya Yesu, wālombwele balondi bandi ba kikōkeji amba: “Nsenswe Tata, [o mwanda] noñanga monka munsoñaninye Tata kulonga.” (Yoa. 14:31) Yesu byaādi usenswe Yehova, wābwenye kūminina matompo makatampe. Buswe botusenswe Yehova bubwanya kwitukwasha netu tūminine.

6. Mungya Bene Loma 5:3-5, le bengidi ba Yehova bamonanga namani kūminina mushikwa wibashikilwe ino ntanda?

6 Kusanswa Yehova Leza kukwashanga nyeke bengidi bandi bōminine kupangwapangwa. Kimfwa, kidye kikatampe kya Bayuda pokyākankeje batumibwa baleke kusapula, kusanswa Leza kwēbalengeje ‘bakōkele Leza bu mulopwe kupita’ko bantu.’ (Bil. 5:29; 1 Yo. 5:3) Kadi buno buswe bukatampe bulengejanga banabetu bavule dyalelo bemanije, pobapangwapangwa na imbikalo ya kasusu kadi ya bukomo. Pa kyaba kya kutyumukwa mutyima, tumonanga’mba i dyese kūminina mushikwa witushikilwe ino ntanda.​—Bil. 5:41; tanga Bene Loma 5:3-5.

7. Shi bantu ba mu kisaka betulwa, le ketufwaninwepo kwibamona namani?

7 Padi kulwibwa na bantu ba mu byetu bisaka i ditompo dikatampe. Kitatyi kyotushilula kwifunda bubine, bantu bamo mu kisaka babwanya kulanga’mba tubaongolwa. Bakwabo nabo babwanya kulanga’mba ñeni ibetujina. (Dingakanya na Mako 3:21) Babwanya enka ne kwitulwa bininge. Kuno kwitulwa, kekufwaninwepo kwitutulumuja. Mwanda Yesu wānenene amba: “Balwana na muntu bakekalanga bantu ba mu njibo yandi.” (Mat. 10:36) Na bubine, nansha shi bantu botubutulwa nabo abetumone namani, batwe ketwibamonengapo bu balwana netu. Inoko potwenda tusanswa Yehova bininge, tusanswanga ne bantu. (Mat. 22:37-39) Shako, ketukajilulapo nansha dimo misoñanya ne bijila bya mu Bible mwanda’tu wa kusangaja bantu.

Shako tubwanya kususuka kyaba kimo, Inoko Yehova ukekala netu nyeke mwanda wa kwitusenga ne kwitukomeja (Tala musango 8-10)

8-9. Le i bika byakweshe kaka umo emanije nansha byobadi bamulwa bininge?

8 Georgina otwatelanga kala wabwenye kwimanija nansha byobadi bamulwa bininge  kudi inandi. Georgina ushintulula’mba: “Ami ne mama twashilwile kwifunda Bible na Batumoni. Ino myeji isamba pa kupita’po, ponadi nsaka kwenda ku kupwila mama washilula kundwa. Najingulula’mba mama wadi wisamba na batupondo, ne kwingidija milangwe yabo potwisamba nandi. Kadi wadi untuka, unkoka mu nywene, umfina lukono ne kungelela bitabo. Ami pa kubwanya myaka 15 nabatyijibwa. Mama wadi ulonga bukomo bwa kunkankaja ndeke kwingidila Yehova, waunsela wakantūla ku njibo imo kobadi batūdile bankasampe batomboke, bamo badi batoma dyamba kadi bankuma-bibi. Nakampata kulwibwa kwikalanga kukomo kūminina shi mwine ukulwa’wa i muntu ufwaninwe kukusanswa ne kukuta mutyima.”

9 Le i bika byakweshe Georgina ōminine? Aye mwine unena’mba: “Difuku dyashilwile mama kundwa, ye difuku dyonapwile kutanga Bible yense mutuntulu. Nadi kendi mukulupile na mutyima umo amba nasokola bubine, kadi nadi nemwene bu kendi pabwipi bininge na Yehova. Nadi mulomba kitatyi ne kitatyi, kadi nandi wadi ungivwana. Ponadi nshikete ku mine njibo’ya, kaka umo waungita ku yandi njibo, ebiya twefunda Bible pamo. Mu kino kitatyi, batutu ne bakaka badi bakankamika ku Njibo ya Bulopwe. Badi bamwene’nka na wa mu byabo bisaka. Nemwenine amba Yehova i mukomo kutabuka balwana netu, nansha shi i bāni.’’

10. Le tubwanya kukulupila amba Yehova Leza wetu ubwanya kulonga bika?

10 Mutumibwa Polo wālembele amba, i kutupu kintu nansha kimo kibwanya “kwitusansanya na buswe bwa Leza budi mudi Kidishitu Yesu Mfumwetu.” (Loma 8:38, 39) Nansha kyaba kimo byotubwanya kususuka, ino Yehova ukekala netu nyeke mwanda wa kwitusenga ne kwitukomeja. Kadi monka mulombwela’kyo mwanda watene Georgina, Yehova witukwashanga ne kupityila ku batutu ne bakaka.

KUSANSWA BANABETU MU LWITABIJO KWITUKWASHANGA TŪMININE MUSHIKWA

11. Le buswe bwātelele Yesu mu Yoano 15:12, 13, bwākweshe bandi bana ba bwanga namani? Leta kimfwa.

11 Mu bufuku bukya ke lufu lwandi, Yesu wāvulwije bandi bana ba bwanga besanswe abo bene na bene. (Tanga Yoano 15: 12, 13.) Wādi uyukile amba buswe bwa kwipāna bukebakwasha bekale nyeke mu bumo ne kūminina mushikwa wa ino ntanda. Tulangulukilei bidi pa kimfwa kya kipwilo kya Tesalonika. Pokyāshimikilwe, batutu ne bakaka ba mu kino kipwilo bāpangilwepangilwe. Nansha nankyo, bano batutu ne bakaka bāshile kimfwa kya bululame ne buswe. (1 Ts. 1:3, 6, 7) Polo wēbakankamikile bendelele kwisanswa “pakatampe pene.” (1 Ts. 4:9, 10) Buswe bwādi bwa kwibalengeja basenge banyoñame pa mityima ne kukwatakanya bazoze. (1 Ts. 5:14) Bālondele ano madingi a Polo, mwanda mu mukanda wandi wa bubidi wālembelwe kintu kya mwaka umo pa kupita’po, Polo wēbanenene’mo amba: “Buswe bomwisenswe banwe bonso umo ne umo bwendanga buvula.” (2 Ts. 1:3-5) Buswe bobādi besenswe bwēbakweshe bōminine masusu ne kupangwapangwa.

Buswe bwa bwine Kidishitu bubwanya kwitukwasha tūminine mushikwa (Tala musango 12) *

12. Le batutu ne bakaka ba mu kibundi kimo, belombwele namani buswe abo bene na bene mu kitatyi kya divita?

12 Tulangulukilei bidi pa mwanda watene Danylo otwatelanga kala ne wandi mukaji. Mu kyabo kibundi pomwatwelele divita, baendelele kupwila, kusapula mungya bukomo bwabo ne kwiabila byakudya byobadi nabyo na batutu ne bakaka. Difuku dimo, basola belumbile byabulwi baiya ku njibo ya Danylo. Danylo unena’mba: “Baunena ntune lwitabijo lwami. Ami pa kupela bankupila, bantunga buta ku mutwe kebakimbe kungasa. Kumeso kwa kutaluka banzakaja’mba basa kujoka balāle na wami mukaji ku bukomo. Ino banabetu betusela bya bukidi, baketutūla ku kudiye twaenda ku kibundi kikwabo. Nkikelwapo nansha dimo buswe bwa bano banabetu baswe. Potwafikile mu kine kibundi’kya, banabetu betupa bya kudya ne kunkwasha nsokole kaji ne njibo. Pa kino, netu twabwanya kutundaila Batumoni bakwabo badi banyema divita.” Ino myanda ilombola’mba buswe bwa bwine Kidishitu bwitukwashanga tūminine mushikwa.

KUSANSWA BALWANA NETU KWITUKWASHANGA TŪMINE MUSHIKWA

13. Le mushipiditu ujila witukwashanga namani tūminine mu mwingilo wa Yehova enka ne kitatyi kitushikwa bantu?

13 Yesu wāsapwidile balondi bandi basanswe balwana nabo. (Mat. 5:44, 45) Le bipēla kwibasanswa? Aa, nansha dimo! Inoko, bibwanika na bukwashi bwa mushipiditu ujila wa Leza. Mu kipa kya mushipiditu  ujila wa Leza mudi buswe, kitūkijetyima, kanye, kutalala ne kwīfula. (Ngt. 5:22, 23) Ino ngikadila itukwashanga tūminine mushikwa. Balwana bavule bashintyile mwanda’tu wa mulume mwitabije, mukaji, mwana, nansha mulondakani walombwele ino ngikadila ya bwine Leza. Balwana bavule bafikile ne ku kwikala ke batutu ne bakaka baswe. Nanshi shi ubakomenwa kusanswa boba bakushikilwe pa mwanda’tu wa Yehova oingidila, lomba mushipiditu ujila. (Luka 11:13) Kadi kulupila’mba mashinda a Leza i mayampe nyeke.​Nki. 3:5-7.

14-15. Le Bene Loma 12:17-21, wakweshe Yasmeen namani asanswe wandi mulume nansha byaadi umulwa bininge?

14 Tulangulukilei pa kimfwa kya kaka umo witwa bu Yasmeen. Pawaikele ke Kamoni wa Yehova, wandi mulume walangile amba waongolwa, ebiya kamukankaja aleke kwingidila Leza. Wadi umutuka, ebiya wasoñanya babutule, bendeji ba bipwilo ne muntu wa maleñanya bamuzakaje ne kumunena’mba wakalañanya kisaka. Wandi mulume wadi ukatuka enka ne banabetu kobapwila! Yasmeen wadi’nka udila, mwanda wamususwile bininge.

15 Yasmeen paadi wenda ku Njibo ya Bulopwe, batutu ne bakaka badi bamukankamika ne kumusenga. Bakulumpe nabo bamunenene alonde madingi adi mu Bene Loma 12:17-21. (Tanga.) Yasmeen unena’mba: “Kebyadipo bipēla. Ino nalomba Yehova ankwashe, kupwa nalonda binena Bible. Ebiya, wami mulume paadi wela ku nshikani busala mu mpishi, nadi nebukomba. Paadi untuka, nadi nondolola na butūkanye. Kadi paabelele, namukwatakenye.”

Shi tusanswa boba betupangapanga, tubwanya kunekenya mityima yabo (Tala musango 16-17) *

16-17. Le i ñeni’ka yowaboila ku kimfwa kya Yasmeen?

16 Yasmeen bamwesele pa mwanda wa kusanswa wandi mulume. Unena’mba: “Wami mulume washilwile kunkulupila bininge mwanda wamwene amba nadi nena nyeke bubine. Washilwile kunteja na bulēme pomulombola myanda ya kipwilo, kadi waitabija twikale mu ndoe ku njibo. Pano unkankamikanga ñende ku kupwila. Ketudi biyampe mu kisaka kadi twikele ku matwi talala. Nkulupile amba wami mulume usa kwitabija bubine ne kwingidila Yehova pamo nami.”

17 Kimfwa kya Yasmeen kilombola’mba buswe “butyumwinanga byonso mu manwi, . . . bukulupilanga byonso, bumininanga byonso.” (1 Ko. 13:4, 7) Shako mushikwa ubwanya  kwikala na bukomo ne kusansa bininge, inoko buswe budi na bukomo kutabuka. Bunekenyanga mityima. Kadi busangajanga mutyima wa Yehova. Ino, tubwanya kwikala nyeke na nsangaji nansha shi balwana abaendelela kwitushikwa. Namani?

TWIKALEI NA NSANGAJI KITATYI KYOBETUSHIKWA

18. Mwanda waka tusangalanga kitatyi kyobetushikwa?

18 Yesu wānenene amba: “Mwi ba nsangaji kitatyi kyonso kyobemushikwa.” (Luka 6:22) Ketusakengapo kushikibwa. Kadi ketusangelangapo kupangwapangwa pa mwanda wa lwitabijo lwetu. Penepa mwanda waka twikalanga na nsangaji kitatyi kyobetushikwa? Tulangulukilei pa buno bubinga busatu. Bubajinji, kitatyi kyotūminina, twitabijibwanga na Leza. (1 Pe. 4:13, 14) Bwa bubidi, lwitabijo lwetu luniñanga ne kukomena’ko. (1 Pe. 1:7) Ne bwa busatu, tukatambulanga mpalo keidi na yoidingakene nayo​—ke būmi bwa nyeke kadi.​—Loma 2:6, 7.

19. Mwanda waka batumibwa bāsangele pa kupwa kukupilwa nsonde?

19 Yesu pa kupwa’tu kusanguka, batumibwa bēmwenine nsangaji yēsambīle’po Yesu. Pa kupwa kukupilwa nsonde, ne kwibakankaja kusapula, bāsangele. Manda waka? ‘Mwanda bemwene bu bantu bafwaninwe kufutululwa pa mwanda wa dijina dya Yesu.’ (Bil. 5:40-42) Buswe bobādi basenswe Mfumwabo, bwādi bukatampe kupita moyo obādi batyina mushikwa wa balwana nabo. Kadi bālombwele buno buswe na kusapula myanda miyampe ne “kuleka’byo mpika.” Banabetu bavule dyalelo bendelelanga kwingila na kikōkeji nansha ke mu makambakano. Bayukile amba Yehova kakelwapo mingilo yabo ne buswe bobasenswe dijina dyandi.​—Bah. 6:10.

20. Le i bika byotukesambila’po mu kishinte kilonda’ko?

20 Ponso pakidi’ko ino ngikadilo ya bintu, ntanda ikendelela kwitushikwa. (Yoa. 15:19) Inoko, ketufwaninwepo kukwatwa moyo. Monka motusa kwikimwena mu kishinte kilonda’ko, Yehova “ukakomeja . . . ne kukinga” bantu bandi ba lulamato. (2 Ts. 3:3) Shi ke pano, twendelelei kusanswa Yehova, kusanswa batutu ne bakaka ne kusanswa enka ne balwana netu. Shi tulonde ano madingi, tukekala nyeke mu bumo, tukekala bakomo ku mushipiditu, tukatumbija Yehova, kadi tukalombola’mba buswe budi na bukomo kutabuka mushikwa.

LWIMBO 106 Tutamijei Ngikadila ya Buswe

^ mus. 5 Mu kino kishinte, tusa kumona’mo muswelo witukwasha kusanswa Yehova, kusanswa banabetu mu lwitabijo, ne kusanswa enka ne balwana, tūminine mushikwa witushikilwe ino ntanda. Kadi tusa kumona’mo mwanda waka Yesu wānenene amba tubwanya kwikala na nsangaji kitatyi kyobetushikwa.

^ mus. 1 Majina i mashintwe.

^ mus. 58 NSHINTULWILO YA BIFWATULO: Basola pa kupwa kuzakaja tutu Danylo, banabetu abamukwasha aviluke aye ne wandi mukaji, ebiya banabetu ba kwawaenda abamutundaila na nsangaji.

^ mus. 60 NSHINTULWILO YA BIFWATULO: Mulumya Yasmeen wadi umulwa, ino bakulumpe abamupe madingi mayampe. Welombola bu mukaji muyampe ne kukwatakanya wandi mulume pabela.