Enda ku bidi'mo

Enda ku kifunka

 KISHINTE KYA KWIFUNDA 30

Sanswa Kifuko Kyobe mu Kisaka kya Yehova

Sanswa Kifuko Kyobe mu Kisaka kya Yehova

“Abe wamutūkije munshi [bityetye] mwa bamwikeulu, kadi wamuvwika kilukwa kya ntumbo ne buya bwa dyangi.”—ÑIM. 8:5, kunshi kwa dyani.

LWIMBO 123 Tukōkelelelei ku Ndudi ya Leza

BIDI MU KISHINTE *

1. Le i bipangujo’ka byotubwanya kwiipangula potulangulukila pa byonso bipangile Yehova?

SHI TULANGULUKILE pa byonso bipangile Yehova, tubwanya kwiivwana na mwēivwanine Davida, mulembi wa Mitōto wāipangwile mu milombelo amba: “Ami pomonanga madiulu obe, mingilo ya minwe yobe, kweji ne ñenyenye byoteakenye, lelo muntu wa kufwa nandi i waka amba umulange, ne mwanā muntu amba umute mutyima?” (Ñim. 8:3, 4) Pamo bwa Davida, tubwanya kutulumuka bininge pa kuta kwitutele Yehova mutyima, mwanda twi batyetye bininge shi twidingakanye na byonso byapangile. Ino enka motusa kwikimwena, Yehova wātele bantu babajinji mutyima, ba Adama ne Eva kadi wēbatweja mu kisaka kyandi.

2. Le Yehova wākwatyile bandi bana babajinji ba pano panshi mpango’ka?

Ba Adama ne Eva bādi bana babajinji ba Yehova ba pano panshi, Yehova nandi wādi Shabo wa mūlu wa Buswe. Wādi usaka bano ba mulume ne mukaji babutule bana. Leza wēbanenene amba: “Butulai mwivudijei, muyuje ntanda ne kwiinekenya.” (Ngo. 1:28) Bādi ba kubutula bana ne kulama ntanda kīkalo kyabo. Shi ba Adama ne Eva beēndeje na kikōkeji mungya ino mpango yēbakwatyile Yehova, abo ne babo bana bādi ba kwikala nyeke mu kisaka kya Leza.

3. Mwanda waka tubwanya kunena’mba ba Adama ne Eva bāpelwe kifuko kilumbuluke mu kisaka kya Yehova?

3 Ba Adama ne Eva bādi na kifuko kilumbuluke mu kisaka kya Yehova. Mungya Ñimbo ya Mitōto 8:5 ne kunshi kwa dyani, Davida wānenene pa muntu wāpangilwe na Yehova amba: “Abe wamutūkije munshi [bityetye] mwa bamwikeulu,  kadi wamuvwika kilukwa kya ntumbo ne buya bwa dyangi.” Na bubine, Yehova kāpelepo bantu bukomo, ñeni, ne bwino pamo na bwa bamwikeulu. (Ñim. 103:20) Ino nansha nankyo, bantu badi’tu “munshi [bityetye]” mwa bano bamwikeulu ba bukomo. Bine, i kya kutendelwa! Na bubine, Yehova wāpele bambutwile betu babajinji būmi bulumbuluke.

4. Lelo i bika byāfikīle ba Adama ne Eva pobālekele kukōkela Yehova, ne i bika byotusa kwisambila’po mu kino kishinte?

 4 Ino i kya bulanda, mwanda ba Adama ne Eva bājimije kino kifuko kyabo mu kisaka kya Yehova. Kulonga namino, kwāletēle bandi bana makambakano makatampe, enka na motusa kwikimwena mu kino kishinte. Inoko, mpango ya Yehova keishintyilepo. Usakanga bantu ba kikōkeji bekale bandi bana nyeke. Dibajinji, twisambilei pa muswelo ulombwele Yehova amba witukwete na bulēme. Kupwa tusa kwisambila pa byotubwanya kulonga tamba’nka pano, pa kulombola’mba tusakanga kwikala mu kisaka kya Leza. Ku mfulo tusa kwisambila pa madyese a nyeke akeselwa bana ba Yehova ba pano panshi.

YEHOVA UKWETE BANTU NA BULĒME

Le i mu miswelo’ka mwālombwele Yehova amba witukwete na bulēme? (Tala musango 5-11) *

5. Le tubwanya kutumbija Leza namani pa kwitupanga kwaetupangile mu kyelekejo kyandi?

5 Yehova wētukwete na bulēme pa kwitupanga mu kyelekejo kyandi. (Ngo. 1:26, 27) Byotupangilwe mu kimfwa kya Leza, tubwanya kutamija ngikadila yandi mivule miyampe ne kwiimwekeja, kimfwa buswe, lusa, lulamato ne boloke. (Ñim. 86:15; 145:17) Kitatyi kyotutamija ino ngikadila, tutumbijanga Yehova ne kumulombola’mba tumufwijanga’ko. (1 Pe. 1:14-16) Kitatyi kyotwiendeja mu muswelo usangaja Tata wetu wa mūlu, netu tusangalanga ne kuloelelwa. Kadi Yehova pa kwitupanga mu kyelekejo kyandi, wētupele mukenga wa kwikala bantu basaka mu kisaka kyandi.

6. Le Yehova wālombwele namani amba ukwete bantu na bulēme kitatyi kyaāteakenye ntanda?

6 Yehova wētuteakeninye kifuko kilumbuluke. Kumeso kwa kupanga muntu mubajinji, Yehova wāteakeninye bantu ntanda. (Yoba 38:4-6; Yel. 10:12) Yehova byadi na kanye ne buntu, wētupele bintu bivule bilumbuluke mwanda wa twikale na nsangaji. (Ñim. 104:14, 15, 24) Kyaba kimo wālangulukīle pa byaāpangile “wāmona’mba i biyampe.” (Ngo. 1:10, 12, 31) Byaādi ukwete bantu na bulēme, wēbanenene ‘babikadile’ bintu byonso bya kutendelwa byaāpangile pano pa ntanda. (Ñim. 8:6) Leza wādi usaka bantu babwaninine balame nyeke bino bipangwa bya kutendelwa. Lelo ufwijanga’ko Yehova kitatyi ne kitatyi pa uno mulao wa kutendelwa?

7. Le kisonekwa kya Yoshua 24:15, kilombola namani amba muntu udi na bwanapabo bwa kwitongela?

7 Yehova i mwitupe kyabuntu kya bwanapabo bwa kwitongela. Tubwanya kutonga bya batwe kulonga mu būmi. (Tanga Yoshua 24:15.) Buno bukomo bwa kutonga bwitwanga bu bwanapabo bwa kwitongela. Leza wetu wa buswe usangalanga kitatyi kyotutonga kumwingidila. (Ñim. 84:11; Nki. 27:11) Tubwanya kwingidija biyampe bwanapabo bwetu bwa kwitongela mu bintu bivule. Tulangulukilei bidi pa kimfwa kyāshile Yesu.

8. Le i mwanda’ka umo wāingidije’mo Yesu bwanapabo bwandi bwa kwitongela?

8 Tubwanya kulonda kimfwa kya Yesu, na kutonga kubadikija bisakibwa bya bakwetu kumeso kwa byetu. Difuku dimo Yesu ne batumibwa bandi pobākōkele bininge, bāendele ku kifuko kya talala mwanda wa kukōkolokwa. Inoko kebākōkolokelwepo. Kibumbo kya bantu kyēbalondele’ko, kadi bano bantu  bādi basaka Yesu ebafundije. Yesu kālobelepo, ino wākwatyilwe bano bantu lusa. Penepa Yesu wālongele’po namani? “Washilula kwibafundija bintu bivule.” (Mako 6:30-34) Shi twiula Yesu na kwingidija bukomo ne kitatyi kyetu mwanda wa kukwasha bakwetu, tutumbijanga Tata wetu wa mūlu. (Mat. 5:14-16) Kadi tulombolanga Yehova amba tusakanga kwikala mu kisaka kyandi.

9. Le i bika bifwaninwe kuvuluka bambutwile?

9 Yehova i mupe bantu bukomo bwa kubutula bana ne mwingilo wa kwibafundija bamusanswe ne kumwingidila. Shi wi mbutwile, le ufwijanga’ko pa kino kyabuntu kya pa bula? Nansha bamwikeulu byobeselwe bininge na Yehova, inoko kebapelwepo dino dyese. Nanshi shi wi bumbutwile, fwija’ko pa dyese dyodi nadyo dya kulela bana. Bambutwile i bebape mwingilo wa mvubu kadi ukola wa kutamija bana “na kwibalemununa ne kwibadyumuna bidyumu bya Yehova.” (Ef. 6:4; Kup. 6:5-7; Ñim. 127:3) Pa kukwasha bambutwile, bulongolodi bwa Leza bulupulanga bingidilwa bīsambila pa Bible, kimfwa mabuku, mavideo, minjiki, ne bishinte bya pa Entelenete. Na bubine, Tata wetu wa mūlu ne wandi Mwana basenswe bana. (Luka 18:15-17) Shi bambutwile bakulupila mudi Yehova ne kulonga bukomo bwa kulela babo bana balēme, Yehova usangalanga. Kadi bambutwile balonga uno muswelo, bapanga babo bana mukenga wa kwikala nyeke mu kisaka kya Yehova.

10-11. Lelo Yehova i mwitulongele bika kupityila ku kinkūlwa?

10 Yehova wetupele wandi mwana mulēme mwanda wa tubadilwe monka mu kisaka kyandi. Enka na motwanenenanga mu  musango wa buná, ba Adama ne Eva bājimije kifuko kyabo mu kisaka kya Yehova kadi bājimija ne kya babo bana bene. (Loma 5:12) Ba Adama ne Eva bātombokēle Leza ku kusaka, o mwanda bādi bafwaninwe kutalulwa mu kisaka kyandi. Ino le babo bana nabo le? Yehova wākwete’ko mpangiko ya buswe, mwanda wa boba bamukōkela betabijibwe mu kisaka kyandi. Wālongele kino kupityila ku kitapwa kya Yesu Kidishitu, wandi Mwana wa bunka. (Yoa. 3:16; Loma 5:19) Pa kitapwa kya Yesu, bantu ba kikōkeji 144 000 i betabijibwe bu bana ba Leza.​—Loma 8:15-17; Kus. 14:1.

11 Ne kadi bantu bakwabo ba kikōkeji midiyo ne midiyo, baloñanga kiswa-mutyima kya Leza. Badi na lukulupilo lwa kwikala lonso mu kisaka kya Leza pa kupwa kwa ditompo dya mfulo dya ku mfulo kwa Myaka Kanunu. (Ñim. 25:14; Loma 8:20, 21) Byobadi na luno lukulupilo, o mwanda betanga kala Yehova Umpangi wabo bu “Tata” tamba’nka pano. (Mat. 6:9) Boba bakasangulwa nabo, bakapebwa mukenga wa kwifunda byobya bibasakila Yehova. Boba bakakōkela bwendeji bwandi, nabo bakekala bantu ba mu kyandi kisaka.

12. Le i kipangujo’ka kyotusa kulondolola pano?

12 Monka motwekimwena, Yehova wālongele bintu bivule mwanda wa kulombola’mba ukwete bantu na bulēme. I mwitabije kala bashingwe māni bu bandi bana, kadi i mupe boba ba mu “kibumbo kikatampe” lukulupilo lwa kukekala bandi bana mu ntanda mipya. (Kus. 7:9) Penepa, i bika byotubwanya kulonga pa kulombola Yehova amba tusakanga kwikala nyeke mu kyandi kisaka?

LOMBOLA YEHOVA AMBA USAKANGA KWIKALA MU KYANDI KISAKA

13. Le i bika byotubwanya kulonga pa kwikala mu kisaka kya Leza? (Mako 12:30)

13 Lombola’mba usenswe Yehova na kumwingidila na mutyima obe onso. (Tanga Mako 12:30.) Mu bintu byonso bitupele Leza na kanye, padi kikatampe’mo kutabuka i bukomo  bwa kumutōta. Tulombolanga Yehova amba tumusenswe na ‘kulama mbila yandi.’ (1 Yo. 5:3) Mu misoñanya itusakila Yehova kukōkela, mudi owa wētusoñenye Yesu wa kulonga bana ba bwanga ne kwibabatyija. (Mat. 28:19) Ne owa waētusoñenye wa kwisanswa batwe bene na bene. (Yoa. 13:35) Yehova uketabija bantu ba kikōkeji mu kisaka kya batōtyi bandi ba ntanda yonso.​—Ñim. 15:1, 2.

14. Le i muswelo’ka otukalombola’mba tusenswe bakwetu? (Mateo 9:36-38; Bene Loma 12:10)

14 Sanswa bakwenu. Buswe i ngikadila mikatampe ya Yehova. (1 Yo. 4:8) Yehova wetusenswe kumeso kwa batwe kumuyuka. (1 Yo. 4:9, 10) Tumwiulanga kitatyi kyotusanswa bakwetu. (Ef. 5:1) Muswelo muyampe otubwanya kulombola’mba tusenswe bantu, i kwibakwasha befunde myanda ya Yehova pano pakidi’ko kitatyi. (Tanga Mateo 9:36-38.) Shi tulonge namino, tukebapa mukenga wa kuyuka byobafwaninwe kulonga pa kwikala mu kisaka kya Leza. Shi muntu wabatyijibwa, tufwaninwe kwendelela kumusanswa ne kumulēmeka. (1 Yo. 4:20, 21) Le tukalonga kino namani? Dibajinji bidi, i na kuleka kutatana kukanina kwandi kwa mutyima. Kimfwa shi walonga kintu kyoketwivwanijepo, ketukamulangilapo amba walonga’kyo na kwisakila. Ino tukalombola amba tulēmekele mwanetu, shi tumumona’mba i mwitupite.​—Tanga Bene Loma 12:10; Fid. 2:3.

15. Le i bāni botufwaninwe kulombola lusa ne kanye?

15 Lombola lusa ne kanye ku bantu bonso. Shi tusaka kwikala nyeke mu kisaka kya Yehova, tufwaninwe kwingidija byobya binena Kinenwa kya Leza mu būmi bwetu. Kimfwa, Yesu wāfundije amba tufwaninwe kulombola lusa ne kanye ku bantu bonso, enka ne ku balwana netu bene. (Luka 6:32-36) Kyaba kimo tubwanya kumona’mba i bikomo kulonga uno muswelo. Shi ye motumwena, tufwaninwe kwifunda kulanga ne kulonga bintu pamo bwa Yesu. Kitatyi kyotulonga bukomo bwa kukōkela Yehova ne kwiula Yesu, tulombolanga Tata wetu wa mūlu amba tusakanga kwikala nyeke mu kisaka kyandi.

16. Le i muswelo’ka otubwanya kulama bulēme bwa kisaka kya Yehova?

16 Lama bulēme bwa kisaka kya Yehova. Mu kisaka, divule dine mwana mutyetye wiulanga byobya bilonga tutu wandi. Shi tutu wandi ulonda misoñanya ya mu Bible mu bwandi būmi, ukashila nkasandi kimfwa kiyampe. Ino shi tutu wandi ulonga bibi, nkasandi nandi ubwanya kulonda kimfwa kyandi kibi. Ye mobikadile ne mu kisaka kya Yehova. Shi mwine Kidishitu wadi na kikōkeji waikala ke kapondo nansha kalonga bintu bibi, bakwabo nabo babwanya kumwiula. Boba balonga bintu bya uno muswelo, bafutulwijanga kisaka kya batōtyi ba Yehova. (1 Ts. 4:3-8) Ketufwaninwepo kulonda bimfwa bibi, kadi ketufwaninwepo kuleka kintu kyo-kyonso kitupalule kudi Tata wetu wa buswe udi mūlu.

17. Lelo i mulangilo’ka oketufwaninwepo kwikala nao, ne mwanda waka?

17 Kulupila mudi Yehova pa kyaba kya kukulupila bintu bya ku ngitu. Yehova i mwitulaye amba uketupa bya kudya, bivwalwa ne mwa kwikala shi tubadikile bidi kukimba Bulopwe bwandi ne kulonda misoñanya yandi myoloke. (Ñim. 55:22; Mat. 6:33) Pa kino ketufwaninwepo kulanga’mba bintu bya ku ngitu bya ino ntanda biketupa mutyima-ntenke ne nsangaji ya nyeke. Tuyukile amba muswelo umo kete otubwanya kwikala na ndoe ya mutyima i kulonga kiswa-mutyima kya Yehova. (Fid. 4:6, 7) Nansha shi tudi na bukomo bwa kupota bintu bivule, inoko tufwaninwe kubandaula shi bine tudi na kitatyi  ne bukomo bwa kwibingidija ne kwibilama. Lelo bino bintu bibwanya kwitudya kitatyi bininge? Tufwaninwe kuvuluka’mba Leza i mwitupe mwingilo wa kwingila mu kisaka kyandi. Kino kishintulula’mba ketufwaninwepo kwilabika batwe bene. Na bubine, ketusakengapo kwikala pamo bwa yewa nsongwalume wāpelele mukenga wa kwingidila Yehova ne wa kuketabijibwa bu wandi mwana—mwanda’tu wa buswe bwaādi usenswe bintu bityetye bya pano pa ntanda!​—Mako 10:17-22.

BINTU BIKEKALA NYEKE NA BANA BA YEHOVA

18. Le i ntumbo’ka ne i madyese’ka akekala nyeke na bantu ba kikōkeji?

18 Bantu ba kikōkeji bakekala na dyese dikatampe kutabuka—dyese dya kusanswa Yehova ne kumutōta nyeke! Boba badi na lukulupilo lwa kukekala pano pa ntanda, bakekala na nsangaji ya kulama ino ntanda milumbuluke yēbapangīle Yehova bu kīkalo kyabo. Panopano ponka, Bulopwe bwa Leza busa kulumbulula monka ntanda ne bintu byonso bidi’mo. Yesu ukapwa makambakano atambile ku butyibi bwākwete ba Adama ne Eva bwa kutamba mu kisaka kya Leza. Yehova ukasangula midiyo ne midiyo ya bantu ne kwibapa mukenga wa kwikala’ko nyeke, na bukomo bwa ngitu bubwaninine mu ino ntanda ikalamunwa ke paladisa. (Luka 23:42, 43) Bantu bengidila Yehova pobakekala babwaninine, abo bonso bakekala na “ntumbo ne buya bwa dyangi” yēsambīle’po Davida.​—Ñim. 8:5.

19. Le i bika byotufwaninwe kulama mu ñeni?

19 Shi udi mu “kibumbo kikatampe,” udi na lukulupilo lwa kutendelwa. Leza ukusenswe kadi usakanga wikale mu kisaka kyandi. Nanshi longa bukomo bwa kumusangaja. Difuku dyonso lama milao ya Leza mu ñeni ne mu mutyima obe. Sangela dyese dyodi nadyo dya kutōta Tata wetu wa buswe udi mūlu, kadi sanswa lukulupilo lodi nalo lwa kukamutumbija nyeke!

LWIMBO 107 Kimfwa kya Leza kya Buswe

^ mus. 5 Kisaka pa kwikala’kyo biyampe, muntu ense udi’mo ufwaninwe kuyuka bya aye kulonga kadi ufwaninwe kwingidila pamo na bakwabo mu kisaka. Shabana ufwaninwe kwendeja kisaka na buswe, inabana kumukwatakanya, bana nabo kwingidila pamo na bambutwile babo na kikōkeji. Ye mobikadile ne mu kisaka kya Yehova. Yehova i mwitukwatyile’ko mpango, kadi shi twiendeje nyeke mungya ino mpango, tukekala nyeke mu kisaka kya batōtyi ba Yehova.

^ mus. 55 NSHINTULWILO YA KIFWATULO: Kupangwa mu kyelekejo kya Leza, kubakwasha ba mulume ne mukaji besanswe ne kwifwila lusa kadi basanswe babo bana. Ba mulume ne mukaji basenswe Yehova. Bambutwile balombola’mba basenswe kyabuntu kyabo kya kubutula bana, na kwibafundija basanswe Yehova ne kumwingidila. Bambutwile batadija babo bana video mwanda wa kwibalombola kyobātumīne Yesu bu kinkūlwa kudi Yehova. Kadi bebafundija’mba mu Paladisa īya’ko, tukalama nyeke ntanda ne banyema.