Enda ku bidi'mo

Enda ku kifunka

 KISHINTE KYA KWIFUNDA 45

Mwa Kukwashisha Bakwetu Balame Misoñanya ya Kidishitu

Mwa Kukwashisha Bakwetu Balame Misoñanya ya Kidishitu

“Nanshi, endai mukalonge bana ba bwanga . . . , mwibafundijei kulama byonso byonemusoñenye.”​—MAT. 28:19, 20.

LWIMBO 89 Teja, Kōkela, Amba Weselwe

BIDI MU KISHINTE *

1. Mungya Mateo 28:18-20, le Yesu wāletele musoñanya’ka?

YESU pa kupwa kusanguka, wāmwekēle bandi bana ba bwanga bādi bebungile mu Ngadilea. Wādi na kintu kya mvubu kya kwibalombola. Le i kintu’ka? I binenwa byandi bidi mu Mateo 28:18-20.​—Tanga.

2. Le i bipangujo’ka byotusa kwisambila’po?

2 Musoñanya wa Yesu wa kulonga bana ba bwanga utala ne mwingidi ense wa Leza dyalelo. Nanshi, twisambilei pa bipangujo bisatu bikwatañene na mwingilo witupele Yesu. Kibajinji, kutentekela pa musoñanya wa Leza wa kufundija bana ba bwanga bapya, le tufwaninwe kulonga bika? Kya bubidi, le basapudi bonso ba mu kipwilo bakakwasha’ko namani amba bantu befunda Bible bendelele? Kya busatu, le i muswelo’ka otubwanya kukwasha banabetu kebakingilanga bashilule monka kwingila mwingilo wa kulonga bana ba bwanga?

MWIBAFUNDIJEI BALAME MISOÑANYA

3. Le mu musoñanya wa Yesu, mudi bulombodi’ka?

3 Bulombodi bwa Yesu budi patōka. Tufwaninwe kufundija bantu bintu byaāsoñenye. Inoko, ketufwaninwepo kwilwa kintu kya mvubu. Yesu kānenenepo amba: ‘Mwibafundijei byonso byonemusoñenye.’ Ino wānenene amba: Mwibafundijei “kulama byonso byonemusoñenye.” Pa kwingidija buno bulombodi kitatyi kyotufundija muntu Bible, tufwaninwe kwikala bafundiji ne kumulombola bya kulonga. (Bil. 8:31) Mwanda waka tufwaninwe kulonga namino?

4. Le kulama musoñanya kushintulula bika? Leta kimfwa.

4 “Kulama” musoñanya i kwiukōkela. Le i muswelo’ka otubwanya  kufundija muntu alame nansha kukōkela bintu byāsoñenye Kidishitu? Tulangulukilei pa kino kimfwa. Le mwadimu ufundijanga bashofele, wibafundijanga namani balame bijila bya dishinda? Mwadimu ukokeja kwibafundija dibajinji bijila bya dishinda mu kalasa. Inoko, pa kufundija bana ba masomo muswelo wa kukōkela bino bijila, ufwaninwe ne kulonga kintu kikwabo. Ufwaninwe kwenda nabo ne kwibaludika pobendeja motoka mu dishinda, ne pobalonga bukomo bwa kwingidija byobefundile. Le i ñeni’ka yotuboila ku kino kimfwa?

5. (a) Mungya Yoano 14:15; 1 Yoano 2:3, le tufwaninwe kufundija botwifunda nabo Bible balonge bika? (b) Leta bimfwa bilombola muswelo otubwanya kuludika botwifunda nabo.

5 Kitatyi kyotwifunda Bible na bakwetu, twibafundijanga byobya bitusakila Leza. Inoko tufwaninwe kulonga bivule. Tufwaninwe kufundija botwifunda nabo Bible bengidije mu būmi bwabo byobya byobefunda. (Tanga Yoano 14:15; 1 Yoano 2:3.) Kimfwa, tubwanya kulombola botwifunda nabo muswelo wa kwingidija misoñanya ya mu Bible ku masomo, ku kaji, nansha pobepwija mukose. Tubwanya kwibasekunwina bintu byetutene mu būmi mwanda wa kwibalombola’mba, kwingidija binena Bible kwitukiñanga ku bibi ne kwitukwasha tukwate butyibi bwa tunangu. Potudi nabo, tubwanya kulomba Yehova ebaludike na mushipiditu ujila.​—Yoa. 16:13.

6. Le i bika bikwabo byotufwaninwe kulonga potufundija bakwetu balame misoñanya ya Yesu?

6 Le i bika bikwabo byotufwaninwe kulonga pa kufundija bakwetu balame misoñanya ya Yesu? Tufwaninwe kukwasha botwifunda nabo Bible bekale na mutyima wa kulonga bana ba bwanga. Bantu bamo befunda Bible babwanya kwikala na moyo wa kusapula. O mwanda tufwaninwe kwibatūkijija mutyima kitatyi kyotwibapa bulombodi bukebakwasha bevwanije bubine bwa mu Bible, bwine bukatenga mityima yabo ne kwibalengeja basapule. Le i bika byotubwanya kulonga pa kukwasha botwifunda nabo bekale na mutyima wa kusapwila bakwabo myanda miyampe?

7. Le i muswelo’ka otubwanya kukwasha otwifunda nandi ekale na mutyima wa kusapwila bakwabo myanda miyampe?

7 Tubwanya kwipangula otwifunda nandi Bible bipangujo pamo bwa bino: “Le kwitabija musapu wa Bulopwe i kulumbulule namani būmi bobe? Molangila, bakwenu nabo bafwaninwe kwivwana uno musapu? Le i bika byobwanya kulonga pa kwibakwasha?” (Nki. 3:27; Mat. 9:37, 38) Lombola omwifunda nandi matrakte a mu Bingidilwa Byetu bya Kufundija Nabyo, atonge’po oa amona’mba akasangaja bantu babutulwa nabo, balunda nansha bobengilanga nabo. * Mupe matrakte mavule. Mulombole mwa kupānina trakte na bunwa. Bine, shi otwifunda nandi waitabijibwa bu musapudi wa kubulwa kubatyijibwa, tufwaninwe kusapula nandi mwanda wa kumukwasha.—Mus. 4:9, 10; Luka 6:40.

MUSWELO UKWASHANGA KIPWILO BANTU BEFUNDA BIBLE BENDELELE

8. Mwanda waka i biyampe botwifunda nabo Bible basanswe Leza ne bakwabo bininge? (Tala kapango kanena’mba, “ Mwa Kukwashisha Botwifunda Nabo Bible Basanswe Leza Bininge.”)

8 Tuvulukei amba Yesu wētulombwele kufundija bakwetu “kulama byonso” byaāsoñenye. Mu bino bintu mubadilwa ne misoñanya ibidi mikatampe; wa kusanswa Leza ne kusanswa bakwetu, kadi yonso ibidi ikwatañene bininge na mwingilo wa kusapula ne kulonga bana ba bwanga. (Mat. 22:37-39) Le i kukwatañana’ka kudi’po? Kintu kikatampe kyotusapwilanga i  buswe​—buswe botusenswe Leza ne bakwetu. Shako bantu bamo botwifunda nabo Bible, babwanya kwivwana moyo wa kusapula. Ino tubwanya kwibakulupija’mba, bakabwanya kunekenya moyo wa kutyina bantu na bukwashi bwa Yehova. (Ñim. 18:1-3; Nki. 29:25) Kapango kadi mu kino kishinte kalombola byotubwanya kulonga pa kukwasha otwifunda nandi Bible asanswe Leza bininge. Ino le i bika bikwabo bibwanya kulonga kipwilo mwanda wa kukwasha bana ba bwanga bapya balombole buswe bininge?

9. Mu kimfwa kya muntu wifunda kwendeja motoka, le uno muntu wefunde namani bintu bya mvubu byabwanya kwingidija?

9 Langulukila monka pa kimfwa kya muntu wifunda kwendeja motoka. Le i muswelo’ka wakefunda paendeja motoka koku mwadimu wandi ushikete umutala? I na kuteja mwadimu wandi ne kutala bashofele bakwabo. Kimfwa, mwadimu ukokeja kumulombola shofele muyampe upityija motoka mukwabo kumeso. Nansha padi kumufunkila shofele utyepeja mudilo wa malampi a motoka wandi mwanda wa kutyina kwela bashofele bāya kumeso kwandi kafi. Bino bimfwa bikafundija yewa obafundija motoka, bintu biyampe byabwanya kwingidija paendeja motoka.

10. Le i bika bikakwasha yewa wifunda Bible endelele ku mushipiditu?

10 Muswelo umo onka, yewa wifunda Bible ushilula kwenda mu dishinda dya būmi, nandi kaboilangapo ñeni enka kudi yewa umufundija, ino i ne ku bimfwa biyampe bya bengidi bakwabo ba Yehova. Le penepa, i bika bikakwasha bantu befunda Bible bendelele ku mushipiditu? I kutanwa ku kupwila kwetu. Mwanda waka? Mwanda bufundiji bwa mu Bible bobetufundijanga’ko bukavudija buyuki bwabo, kukomeja lwitabijo lwabo, ne kwibakwasha basanswe Leza bininge. (Bil. 15:30-32) Ne kadi, ku kupwila, boba bebafundija Bible babwanya kwibafikija kudi batutu ne bakaka badi mu ngikadilo na yobadi’mo. Le i bimfwa’ka bya buswe bwa bwine Kidishitu bibwanya kwimwena yewa wifunda Bible mu Kipwilo? Tulangulukilei bidi pa myanda ilonda’ko.

11. Le i bimfwa’ka bibwanya kumona yewa wifunda Bible mu kipwilo, ne bibwanya kumukwasha namani?

11 Muntu umo wifunda Bible ulelele bana kasuku ubwanya kumona kaka ulelele bana kasuku. Ubwanya kutengwa ku mutyima pa kumona bukomo bulonga kaka bwa kwiya ku Njibo ya Bulopwe na bandi bana batyetye. Yewa wifunda Bible wikonda pa kuleka kutoma mfwanka ubwanya kwiyuka na musapudi wadi na ano makambakano, ino weanekenya. Musapudi ubwanya kusapwila yewa wifunda Bible amba kusanswa Yehova bininge kwamukweshe akōkele misoñanya ya Leza. (2 Ko. 7:1; Fid. 4:13) Pa kupwa kwivwana bimusekunwina musapudi, yewa wifunda Bible ukokeja kukulupila bininge pamukulupija tutu amba, “nobe ubwanya kwiileka.” Nkasampe umo mwana-mukaji wifunda Bible, ubwanya kumona kaka umo nkasampe Kamoni udi na nsangaji mu būmi. Yewa wifunda Bible pa kumona uno kaka nkasampe na nsangaji, ukokeja kusaka kuyuka kine kilengeja uno kaka ekale na nsangaji.

12. Mwanda waka tubwanya kunena’mba muntu ense mu kipwilo udi na mwingilo wa kukwasha boba befunda Bible?

12 Shi bantu befunda Bible abayuka basapudi ba kikōkeji, baboilanga ñeni ku bimfwa byabo bya mwa kulamina musoñanya wa Kidishitu wa kusanswa Leza ne bakwabo. (Yoa. 13:35; 1 Tm. 4:12) Kadi monka motwekimwenanga kala, yewa wifunda Bible ubwanya kuboila ñeni ku basapudi badi na makambakano na amutene. Yewa  wifunda ukaboila ñeni ku bino bimfwa amba, nandi ubwanya kushinta, waikala ke mwanā bwanga wa Kidishitu. (Kup. 30:11) Muntu ense mu kipwilo ubwanya kulonga’po kintu mu miswelo mishileshile mwanda wa kukwasha boba befunda Bible bendelele. (Mat. 5:16) Le uloñanga bukomo’ka mwanda wa kukankamika boba befunda Bible bāya ku kupwila?

KWASHAI BOBA KEBAKINGILANGA BASAPULE MONKA

13-14. Le Yesu wāmwene batumibwa bandi batyumukwe mutyima namani?

13 Tusakanga kukwasha batutu ne bakaka kebakingilanga banze kusapula monka ne kwingila mwingilo wa Kidishitu wa kulonga bana ba bwanga. Muswelo obālongēle batumibwa batyumukwe mutyima bintu kudi Yesu, ulombola bintu byotubwanya kulonga dyalelo.

14 Ku mfulo kwa mwingilo wa Yesu wa pano pa ntanda, kumeso’tu kwa kwipaibwa, batumibwa, “bonso bamushiya banyema lubilo.” (Mako 14:50; Yoa. 16:32) Le Yesu wāmwene batumibwa bandi namani pobatyumukilwe mutyima mu kitatyi kityetye? Aye’tu pa kupwa kusanguka, Yesu wāsapwidile balondi bandi bamo amba: “Kemwakikwatwai moyo! Endai, kasapwilei banabetu amba [nasanguka].” (Mat. 28:10a) Yesu kāpelelepo batumibwa bandi. Nansha byobāmunyemene, wādi wibeta’nka bu “banabetu.” Pamo bwa Yehova, Yesu wādi na lusa ne lulekelo.​—2 Ba. 13:23.

15. Le twiivwananga namani pa boba ke baleke’byo kusapula?

15 Muswelo umo onka, netu tutele mutyima bininge boba ke baleke’byo kusapula. I batutu ne bakaka, kadi twibasenswe! Tukivulukanga mwingilo waingile bano banabetu na buswe pa kala​—padi bamo mu myaka mivule. (Bah. 6:10) Bine, twibalañanga! (Luka 15:4-7) Shi tusaka kwiula Yesu, le i mu miswelo’ka motubwanya kulombola’mba twibatele mutyima?

16. Le i muswelo’ka otubwanya kulombola’mba tutele mutyima batutu ne bakaka kebakingilanga?

16 Mwibetei na kanye. Muswelo umo obākankamikile batumibwa batyumukwe mutyima kudi Yesu, i na kwibeta bakebunge. (Mat. 28:10b; 1 Ko. 15:6) Ne dyalelo nadyo, tubwanya kukankamika boba kebakingilanga bāye ku kupwila shi kebakiyānga’kopo. Tuyukile amba, tusakilwa padi kwibeta misunsa mivule pa kusaka bāye batanwe’ko. Bine, Yesu wāsangele pa kumona bandi bana bwanga baitabija lwito lwandi.​—Dingakanya na Mateo 28:16 ne Luka 15:6.

17. Le tukalonga namani shi mwanetu kakingilanga waiya ku kupwila?

17 Mwibatundailei na nsangaji. Yesu wākweshe bandi bana ba bwanga bamone amba webatundaila na nsangaji paētene nabo; wāendele kobadi kaesambe nabo. (Mat. 28:18) Le tukalonga namani shi yewa kakingilanga waiya ku Njibo ya Bulopwe? Tufwaninwe kubadikila kumulubula na kyanga. Dibajinji, tubwanya padi kulanga’mba ketuyukilepo bya kunena. Inoko, pa kyaba kya kumufwija bumvu, tubwanya’tu kumulombola’mba twi basangale pa kwimona nandi.

18. Le i muswelo’ka otubwanya kukulupija basapudi kebakingilanga?

18 Mwibakulupijei bya binebine. Padi bana ba bwanga ba Yesu bāmwene amba kebabwanyapo mwingilo wa kusapula ntanda yonso. Ino Yesu wākulupije balondi bandi, wānena’mba, “ngidi nenu mafuku onso.” (Mat. 28:20) Le bino byākweshe bana ba bwanga? En-en. Kitatyi’tu kityetye pa kupita’po, bekwata’ko na “kufundija ne kusapula . . . myanda miyampe.” (Bil. 5:42)  Basapudi kebakingilanga nabo basakilwa kukulupijibwa. Babwanya kwivwana moyo wa kushilula kusapula monka. Tubwanya kwibakulupija’mba kebakasapulapo bunka bwabo. Shi i beteakanye, tubwanya kukasapula nabo. Bine, bakasangela twibakwashe pobashilula kusapula myanda miyampe monka. Shi tulombola boba kebakingilanga’mba twibamwene bu batutu ne bakaka, batwe bonso tukekala na nsangaji mu kipwilo.

TUSAKANGA KUPWA MWINGILO OBETUPELE

19. Le tusakanga kulonga bika, ne mwanda waka?

19 Le tukendelela kulonga bana ba bwanga kufika ne kitatyi’ka? I kufika ne ku mfulo ya ino ngikadilo ya bintu. (Mat. 28:20; Tala Nshintulwilo ya Bishima, “Mfulo ya ngikadilo ya bintu.”) Le tukabwanya kuvuija uno mwingilo witupele Yesu? Twi basumininwe kwiuvuija! Tupānanga na nsangaji kitatyi kyetu, bukomo ne lupeto mwanda wa kusokola boba “badi na mutyima muyampe wa kukamona būmi bwa nyeke.” (Bil. 13:48) Shi tulonga namino, tulondanga kimfwa kya Yesu. Wānenene amba: “Byakudya byami i kulonga kiswa-mutyima kya yewa wantumine ne kupwa mwingilo wandi.” (Yoa. 4:34; 17:4) Netu ye byotusaka kulonga. Tusakanga kupwa mwingilo obetupele. (Yoa. 20:21) Kadi tusakanga bakwetu, kubadila’mo ne boba kebakingilanga, bendelele kwingila uno mwingilo pamo netu.​—Mat. 24:13.

20. Mungya Bene Fidipai 4:13, i kika kinenenwa’mba tubwanya kwingila mwingilo wētusoñenye Yesu kwingila?

20 Shako, kebipēlangapo kwingila mwingilo witupele Yesu kwingila. Inoko, ketwingilanga’opo batwe bene. Yesu wālaile amba ukekala netu. Twingilanga uno mwingilo wa kulonga bana ba bwanga bu “bengidi bengila pamo na Leza” ne “pamo na Kidishitu.” (1 Ko. 3:9; 2 Ko. 2:17) Nanshi, tubwanya kwiwingila. Bine, tudi na dyese ne nsangaji ya kwingila uno mwingilo ne kukwasha bakwetu nabo bengile’o!​—Tanga Bene Fidipai 4:13.

LWIMBO 79 Wibafundije Bemanije

^ mus. 5 Yesu wāpele balondi bandi mwingilo wa kulonga bana ba bwanga ne kwibafundija balame bintu byonso byaēbasoñenye. Kino kishinte kīsambila pa muswelo otubwanya kulonda bulombodi bwa Yesu. Myanda imo idi’mo imanine pa kishinte kyalupwilwe mu Kiteba kya Mulami kya 1 Kweji 7, 2004, paje 25-30.

^ mus. 7 Pano twisambilanga pa mwana-mulume wifunda Bible.

^ mus. 67 NSHINTULWILO YA KIFWATULO: Kaka umo paendeja kifundwa kya Bible, ushintulwila waefunda nandi byafwaninwe kulonga pa kusanswa Leza bininge. Kupwa, yewa wifunda Bible kaingidija madingi asatu amupele umufundijanga Bible.