Yesu padi mu Yelusalema ku masobo a Pashika ya mu 30 Yesu ke mwiye, walonga biyukeno, nansha bingelengele bitulumukwa. Kino kibalengeja bavule bamwitabije. Nikodema, Mufadiseo umo kadi i wa mu kidye kikatampe kya Bayuda kitwa bu Sanedini watulumuka. Byasaka kuyukila’ko bivule, wakamone Yesu bufuku, padi i mwanda utyinanga bendeji bakwabo Bayuda bakōna ntumbo yandi shi abamumone.

Nikodema wanena’mba, “A Labi, tuyukile amba abe wi mutambe kudi Leza bu mufundiji, mwanda i kutupu muntu ukokeja kulonga bino biyukeno byolonga’bi shi Leza kadipo nandi.” Yesu walondolola Nikodema amba, pa kutwela mu Bulopwe bwa Leza, muntu ufwaninwe ‘kubutulwa monka.’​—Yoano 3:2, 3.

Nikodema waipangula amba Le muntu ubwanya kubutulwa monka namani? “Kakokejapo kutwela mu ndá ya inandi musungu wa bubidi ne kubutulwa, mwene i amo?”​—Yoano 3:4.

Kubutulwa monka ke kushintululapo nankyo. Yesu wamushintulwila amba: “Shi muntu kabutwilwepo ku mema ne ku mushipiditu, kakokejapo kutwela mu Bulopwe bwa Leza.” (Yoano 3:5) Yesu pa kubatyijibwa kadi mushipiditu ujila watūkila padi, ye po paabutwilwe “ku mema ne ku mushipiditu.” Pa kitatyi’kya, kwadi ne binenwa bitamba mūlu amba: “Uno’u i wami Mwana, muswedibwe, ondoelelwe.” (Mateo 3:16, 17) Mu uno muswelo, Leza walombola’mba waikadija Yesu bu mwana wa ku mushipiditu udi na kyepelo kya kutwela mu Bulopwe bwa mūlu. Mwenda mafuku, mu Pentekosa 33 Yesu ke mwiye, mushipiditu ujila usa kupungulwilwa bantu basa kubatyijibwa amba nabo babutulwe monka bu bana ba Leza ba ku mushipiditu.​—Bilongwa 2:1-4.

Nikodema kevwanijepo bimufundija Yesu pa mwanda utala Bulopwe. O mwanda Yesu wamusapwila’ko myanda mikwabo ya mwingilo wandi wa pa bula wa bu Mwana wa Leza pano panshi. Yesu wanena’mba: “Kadi monka mwātulwidile Mosesa nyoka mu ntanda mutuputupu, ne Mwanā muntu nandi ufwaninwe kutululwa’nka nabya, amba ense umwitabija amone būmi bwa nyeke.”​—Yoano 3:14, 15.

Mafuku kunyuma, bene Isalela bāsuminwe na banyoka ba bulembe, bādi bafwaninwe kutala nyoka wa mukuba pa kusaka kupanda. (Umbadilo 21:9) Bantu bonso nabo mo monka, bafwaninwe kulombola lwitabijo mudi Mwanā Leza pa kusaka kunyongololwa ku ngikadilo yabo ya lufu mwanda wa bamone būmi bwa nyeke. Pa kulombola buswe bulombwele Yehova mu ino mpango, Yesu wasapwila Nikodema amba: “Leza byaasenswe ino ntanda bikatampe mpata, wapēne wandi Mwana wa bunka, amba ense ulombola lwitabijo mudi aye kakyonakanibwa, ino amone būmi bwa nyeke.” (Yoano 3:16) I enka muno mu Yelusalema mwalombwele Yesu myeji isamba kupwa kwa kushilula mwingilo wandi amba aye dyo dishinda ya kupandila’mo bantu.

Yesu wasapwila Nikodema amba: “Leza katuminepo wandi Mwana mu ino ntanda mwanda wa kutyibila ino ntanda mambo.” Ko kunena’mba kamutuminepo mwanda wa kuponeja ntanda na nshikani, nansha kutyibila bantu lufu. Ino Yesu wanena’mba i mutumwe “mwanda wa kupandija ino ntanda kupityila kudi aye.”​—Yoano 3:17.

Nikodema waiyanga na moyo kudi Yesu bufuku. O mwanda i kyendele’mo Yesu afudije mīsambo yobesamba nandi na bino binenwa amba:  “Pano po pene pemanine butyibi: amba kitōkeji kyaile mu ino ntanda, ino bantu basanswa’ko fukutu kupita’ko kitōkeji, mwanda mingilo yabo yadi mibi. Mwanda yewa ense ulongalonga bintu bibi ushikilwe kitōkeji kadi kāyangapo ku kitōkeji, kutyina’mba mingilo yandi yakatopekwa. Ino yewa ense ulonga bya bine wiyanga ku kitōkeji, mwanda wa mingilo yandi isokokele patōka’mba ingilwanga umbumo na Leza.”​—Yoano 3:19-21.

Pano ke aye mwine Nikodema, Mufadiseo kadi mufundiji mu Isalela alangulukile pa byaaivwana pa mwingilo wa Yesu mu mpango ya Leza.