Yesu padya kwa Mufadiseo, bantu tununu ne tununu bamwilaije panja. Ye mobamulongēle ne dikwabo mu Ngadilea. (Mako 1:33; 2:2; 3:9) Ino muno mu Yudea, bavule basakanga kumumona ne kumwivwana, abalombola’mba ngikadila yabo i mishile na ya Bafadiseo badya nabo.

Byanena Yesu dibajinji bidi na buluji bwa pa bula ku bana ba bwanga amba: “Dyumukai kiyujo kya Bafadiseo, i buzazangi.” Yesu waletele ne dikwabo kino kidyumu, ino byaamona paadi udya, bibamulengeja apituluke’kyo monka bukidibukidi. (Luka 12:1; Mako 8:15) Bafadiseo babwanya kufya bubi bwabo na kulombola lusa, ino baleta kyaka kifwaninwe kusokolwa patōka. Yesu washintulula’mba: “Ino kekudipo kintu kifye pafīta kekikasokolwapo ne kintu kifibwe kekikayukanapo.”—Luka 12:2.

Padi mu bantu bavule badi mu kibumbo kijokolokele Yesu mudi bene Yudea kebadi’kopo ku Ngadilea paadi ufundija. O mwanda, wapituluka myanda mikatampe ya byaafundije mafuku kunyuma. Wasoñanya bonso bamuteja amba: “Kemwakityinai boba bepaya umbidi, ino kupwa kino kebabwanyapo kulonga kintu kikwabo.” (Luka 12:4) Monka mwaalongele’kyo dikwabo, walombola bandi bana ba bwanga mvubu ya kukulupila amba Leza ukavuija bisakibwa byabo. Bafwaninwe kadi ne kuyuka Mwanā muntu ne kujingulula’mba Leza ubwanya kwibakwasha.​—Mateo 10:19, 20, 26-33; 12:31, 32.

Ponka’po muntu umo mu kibumbo waiya na wandi mwanda amba: “A Mufundiji, nenene mwanetu twiabile nandi bupyani.” (Luka 12:13) Bijila binena amba mwana umbedi ukapyana bipindi bibidi, nanshi kekudipo ne kya kufwila kine. (Kupituluka 21:17) Ino, bimweka bu uno muntu usakanga bivule kutabuka binenenwe mungya bijila. Yesu wapele kwikuja mu myanda yabo. Wamwipangula’mba: “Abe muntu, i ani wantonga ami bu mutyibi nansha wa kwimwabanya bintu banwe bubidi?”​—Luka 12:14.

Kupwa Yesu wadyumuna bantu bonso amba: “Pūtulai meso kadi dyumukai makomwa-meso a miswelo yonso, mwanda nansha shi muntu udi na bintu bingi, būmi bwandi kebutambangapo ku bintu byadi nabyo.” (Luka 12:15) Nansha shi muntu udi na bupeta bwa muswelo’ka, le kabwanyapo kufwa ne kushiya’bo? Yesu wakomeneja uno mwanda na kyelekejo kekidibwapo kilombola mvubu ya kwilongela dijina diyampe kudi Leza amba:

“Ntanda ya mpeta umo yamwitabile byakudya senene. Penepa washilula kulanguluka munda mwandi amba, ‘Pano nkikidipo na mwa kungwija byangulwa byami, le nsa kulonga namani?’ Ebiya kanena’mba, ‘Nsa kulonga nenki: Nsa kupomona bibīko byami nshimike bikata kutabuka, mwine’mwa nsa kungwija’mo miseke yami yonso ne bintu byami byonso, penepa nkenena ami mwine amba: “Kodi na bintu bingi biyampe bilundike bya myaka mivule; kokilanga’ko, dya, toma, wisangaje.”’ Ino Leza wamunena’mba, ‘Abe wampikwa ñeni, buno bufuku buno’bu basa kukulomba būmi bobe. Penepo i ani le usa kuyata bintu byowaungwije’bi?’ Ye mobikadile ne ku muntu wibīkila byabulēme ino kwikala mpeta kudi Leza mpika.”​—Luka 12:16-21.

Bana ba bwanga ba Yesu ne bakwabo bamuteja babwanya kupya mu dikinga dya kukimba bupeta ne kwilundikila’bo. Kukimba kulama būmi kubwanya kwibalengeja basūle mwingilo wa Yehova. O mwanda Yesu wapituluka madingi mayampe aapēne mu Busapudi bwa ku Lūlu pano ke padi kintu kya mwaka umo ne kipindi amba:

“Lekai kuzumbija mityima pa mwanda wa būmi bwenu amba tukadya bika nansha pa mwanda wa imbidi yenu amba tukavwala bika. . . . Bandilai binkombe: Kebikusangapo nkunwa nansha kwangula  kwine; kebidipo na kitala nansha na kibīko kine; ino Leza wibidishanga. Mwene banwe mupityile toni bulēme? . . . Talai mutaminanga maluba: Keaputumangapo na mingilo nansha kujinga kwine mpika; ino nemulombola’mba, nansha ke Solomone mwine mu ntumbo yandi yonso kāvwelepo bya kufwaninwa pamo bwa diluba dimo dya mu ao. . . . Nanshi lekai kukimba byomukadya nansha byomukatoma, kadi lekai kusela mutyima kūlu . . . Shenu uyukile amba musakilwa bino bintu. . . . Kimbai nyeke Bulopwe bwandi, ne bino bintu bikemutentekelwa’ko.”​—Luka 12:22-31; Mateo 6:25-33.

I ani ukakimba Bulopwe bwa Leza? Yesu walombola’mba bantu batyetye kete, “kaluombe katyetye,” ka bantu ba kikōkeji bo bakakimba’bo. Mwenda mafuku byayukene’mba kano kaluombe kadi na bantu’tu 144 000. Le i bika bibabīkīlwe? Yesu i mwibakulupije amba: “Shenu waloelelwa kwimupa Bulopwe.” Bano bantu kebakatepo mutyima ku kukimba bya bulēme bya pano pa ntanda, padi bangivi ba kwibiba. Ino, abo bakata mutyima wabo ku “byabulēme byampikwa kupwa momwa mūlu,” mwine mobakabikala na Kidishitu.​—Luka 12:32-34.