Kibundi kya Betani kidi pa matelo a kutunduka kwa Lūlu lwa Impafu, ku kintu kya makilometele 3 na Yelusalema. (Yoano 11:18) Yesu waenda’ko ne kutwela mu njibo ya ba Mata ne Madia, bana na bana. Abo ne mwanabo mwana mulume, Lazalasa i balunda na Yesu kadi abamulubula na nsangaji.

Kupempulwa na Meshiasa i dyese. Mata usaka Yesu adye biyampe, o mwanda wepāna ku kumutēkela bidibwa bilumbuluke. Patēka Mata, mwanabo Madia ushikete ku maulu a Yesu umuteja. Kitatyi pa kupita’po, Mata wanena Yesu amba: “A Mfumwetu, le kumwenepo amba mwanetu wandeka ñingila byonso bunka bwami? Munene āye ankwashe’ko.”​—Luka 10:40.

Yesu pa kyaba kya kutopeka Madia, wadingila Mata pa kwikambakanya bininge na bintu bya ku ngitu, amba: “Mata, Mata, uzumbijanga mutyima ne kukamba na bintu bivule. Ino i bintu bityetye’tu bisakibwa, pakwabo kimo’tu kete. Madia aye watonge kintu kiyampe, kadi kekikamuyatwapo.” (Luka 10:41, 42) Eyo, Yesu walombola’mba ke kiyampepo kwela kitatyi kikatampe ku kutēka bidibwa bivule. Bidibwa’tu bityetye i bibwane.

Bisaka Mata ke bibipo. Usaka kulombola kizaji. Ino byaakambakena bidibwa wajimija bintu bya mvubu mpata, ke bufundiji bwa kamweno butamba kudi Mwanā Leza kadi! Yesu wanena’mba Madia watonge butongi buyampe, bwakamwena’mo byabuyabuya kebidi mfulo byotufwaninwe kuvuluka batwe bonso.

Difuku dikwabo, Yesu waiya na bufundiji bukwabo bwa kamweno. Mwanā bwanga umo wamwipangula’mba: “A Mfumwetu, witufundije mwa kulombelela, enka mwafundijije Yoano bandi bana ba bwanga.” (Luka 11:1) Yesu wafundije’byo kala mu Busapudi bwandi bwa ku Lūlu ke padi kintu kya mwaka umo ne kipindi. (Mateo 6:9-13) Ino, mobimwekela uno mwanā bwanga kadi’popo pafundije Yesu, o mwanda wamupitulukila myanda mikatampe. Kupwa waleta kyelekejo kilombola mvubu ya kutakamena mu milombelo.

“Langa shi umo pomudi’po udi na mulunda nandi, waenda kwadi pa bukata bwa bufuku kamunena’mba, ‘A mulunda, ngapwije’ko mikate isatu, mwanda mulunda nami wamfikila’nka panō udi mu lwendo, ino nkidipo na kantu ka kumupa.’ Ino yao muntu kamulondolola aye munda’mba: ‘Leka kunkambakanya. Mulango ke mushite kala, kadi bami bana batyetye balēle nami pa butanda. Nkibwanyapo kubūka kukupa kintu.’ Nemulombola’mba: Nansha shi kabūkilepo kumupa kintu mwanda i mulunda nandi, ino bine pa mwanda wa lupuñanya lwandi lukomo, usa kubūka kumupa byonso byasaka.”​—Luka 11:5-8.

Yesu kanenenepo amba Yehova kasangelangapo kumulomba kyaba kyonso, na mwalongela uno mulunda. Ino, walombola’mba, shi uno mulunda wadi bidi mupele, ino waitabija kumukwasha mwanda wa lupuñanya lwandi, nanshi Tata wetu wa mūlu wa buswe ukalondolola milombelo ya kyaba kyonso imulomba bengidi bandi ba kikōkeji! Yesu wabweja’ko amba: “Nemulombola’mba, lombai’nka kulomba, nabya mukapebwa; kimbai’nka kukimba, nabya mukamona; kokolai’nka kukokola nabya mukashitwilwa. Mwanda ense ulomba utambulanga, kadi ense ukimba umonanga, kadi ne ense ukokola nandi ukashitwilwa.”​—Luka 11:9, 10.

Yesu pa kupwididila mwanda, wesambila pa bashabana ba pano pa ntanda amba: “I shabana’ka momudi’mo, shi wandi mwana wamulombe mwita wa lui, ukamupa nyoka pa kyaba kya mwita wa lui, a? Nansha kadi shi wamulombe dii, le ukamupa kaminye? Penepo, shi banwe’ko, nansha byomudi babi, muyukile kupa benu bana byabuntu biyampe, le Shenu wa mūlu papo ke pepi, mwene ukapāna mushipiditu ujila ku boba bamulomba!” (Luka 11:11-13) Bine bikulupija’po pa kuyuka’mba Tata wetu udi na mutyima wa kwitwivwana ne kwitupa byotusakilwa!