Yesu, Petelo, Yakoba, ne Yoano pobatūka ku lūlu, abesambakana na kibumbo kikatampe. Kudi mwanda. Basonekeji abebungila kudi bana ba bwanga, kebepatanya nabo. Bantu abatulumuka pa kumona Yesu, abanyemena kwadi kukamwimuna. Yesu waipangula’mba: “Le mwipatanyanga nabo bika?”​—Mako 9:16.

Muntu umo watambe mu kibumbo ne kufukata ku meso a Yesu, kashintulula’mba: “A Mufundiji, nakuletela wami mwana mwana-mulume mwanda aye udi na mushipiditu wa bu kamāma. Ponso poumukwatyila, umuponejanga panshi, wamutambija kifulu ku kanwa, kashenkenya meno penepo bukomo bwamupwa. Nalombanga bobe bana ba bwanga beupange, ino abakomenwa.”​—Mako 9:17, 18.

Mobimwekela, basonekeji abafutulula bana ba bwanga mwanda abakomenwa kubelula nsongwalume, padi na kuzawila bukomo bobalonga. Yesu pa kyaba kya kulondolola mbutwile ukolejibwa, ino aye wanena kibumbo amba: “Yō, lukongo lwampikwa lwitabijo kadi lunyengakane, le nkendelela nenu kufika ne kitatyi’ka?” Na bubine bino binenwa bikomo bitalanga basonekeji badi bakambakanya bandi bana ba bwanga kitatyi kyaadi patupu’ye. Yesu waalamukila kudi mbutwile mukolejibwe wamunena’mba: “Ndetelei’ye kuno.”​—Mateo 17:17.

Uno nsongwalume pa kufwena kudi Yesu, ndemona umukwete wamutolela pa nshi ne kumufulubija bininge. Nsongwalume kaalañana pa nshi ne kifulu kibamutambe ku kanwa. Yesu waipangula shandya mwana amba: “Le byamwanjile tamba kitatyi’ka?” Nandi walondolola’mba: “Tamba’tu ku bwanuke, kadi divule umuponejejanga mu mudilo ne mu mema mwanda wa kumonakanya.” Muntu’wa wamuzenze amba: “Shi ukokeja kulonga’po kintu, nabya witufwile’ko lusa witukwashe’ko.”​—Mako 9:21, 22.

 Shandya mwana ñeni ibamufule, mwanda ne bana ba bwanga ba Yesu bene kebabwenyepo kumukwasha. Yesu pa kulondolola uno muntu mufulwe ñeni wamulomba bukwashi, wamukankamika na kikulupiji amba: “Byabyo binenwa, ‘Shi ukokeja’! I amo, bintu byonso bikokejika ku muntu udi na lwitabijo.” Ponka na ponka, shandya mwana waela lubila kanena’mba: “Ndi na lwitabijo! Nkwashe’ko popa ponsakilwa lwitabijo!”​—Mako 9:23, 24.

Yesu wamone bibumbo bibaiya kwadi lubilo. Yesu pa kumona nabya, wafunina ndemona amba: “Abe mushipiditu wa bu kamāma ne bu kitwi, nakusoñanya, mutambe’mo kadi kokamutwela’mo monka!” Pa kumutamba’mo, ndemona waeleja nsongwalume lwanji ne kumufulubija divule dine. Ebiya mwana waikala’nka bwa mufwe, penepo bantu bangi kebanena’mba: “Wafu!” (Mako 9:25, 26) Ino Yesu wakwata mwana ku kuboko ne kumwimika, ne kubeluka “wabeluka’nka mu mine nsá’ya.” (Mateo 17:18) Ke kya kutulumukapo shi bantu ababezemuka pa byalonga Yesu.

Mafuku kunyuma, Yesu paatumine bandi bana ba bwanga kukasapula, badi bapanga ne bandemona. Ino pobaenda kufula mwinjibo, abamwipangula’mba: “Mwanda waka tubakomenwanga kwiupanga?” Yesu webalombola’mba i pa mwanda wa kubulwa lwitabijo kwabo, wanena’mba: “Wa uno muswelo ubwanya kutamba’nka na milombelo.” (Mako 9:28, 29) Badi bafwaninwe kwikala na lwitabijo lukomo pamo ne milombelo pa kusaka bukomo bwa Leza bwibakwashe bapange uno ndemona mukomo.

Yesu wavuya na kunena’mba: “I bine nemulombola’mba, shi mudi na lwitabijo lwa bukata bwa luze lwa mutade, mukanena luno lūlu amba, ‘Taluka pano enda kokwa,’ nalo lwataluka, kadi i kutupu kintu kikemukomena.” (Mateo 17:20) Bine bilomba lwitabijo lukomo!

Bijika ne bikoleja bimika kwendelela kwa mwingilo wa Yehova bibwanya kumweka bu bikomo kebibwanyapo kutaluka pamo bwa lūlu. Ino shi tutamije lwitabijo, tubwanya kunekenya bino bijika ne bikoleja bidi pamo bwa lūlu.