Yesu ulēmekele bininge Yoano Mubatyiji, ino le bantu bavule nabo bamwene Yoano namani? Yesu wanena’mba, “Luno lukongo . . . ludi pamo bwa bana batyetye bashikete mu mansoko bela bakwabo bobakaya nabo mabila, amba: ‘Twadi twimwidila lushiba, ino banwe kuja mpika; twadi tuyoyokota miyoa, ino banwe kwiyaya bya bulanda mpika.’”​—Mateo 11:16, 17.

Le Yesu ukimba kunena bika? Watōkeja mulangwe amba: “Yoano waile kudya ne kutoma mpika, ino bantu kebamunena’mba, ‘Udi na ndemona.’ Mwanā muntu waile udya utoma, ino bantu kebanena’mba, ‘Talai! Muntu wa mudyopolo, utomatoma vinyu, mulunda wa basonkeji ba musonko ne babipya-mambo.’” (Mateo 11:18, 19) Ne kadi, Yoano wadi na būmi bupēla bu mwine Nazila, kutupu kutoma vinyu, ino luno lukongo ke lumunena’mba udi na ndemona. (Umbadilo 6:2, 3; Luka 1:15) Ino Yesu wadi na būmi’nka na bwa bantu bonso. Udya ne kutoma na bujalale, ino kebamutopeka amba wapityija’byo kipimo. Bibamweka bu bikomo kusangaja bantu.

Yesu wadingakanya lukongo na bana batyetye mu mansoko bapela kuja pebombela bana bakwabo lushiba, nansha kukwatwa bulanda payoyokota bakwabo. Yesu wanena’mba, “Nansha nankyo, tunangu tubingijibwanga na mingilo yato.” (Mateo 11:16, 19) Bine, “mingilo”​—ko kunena’mba, bukamoni buletelwe na Yoano ne Yesu​—bulombola’mba myanda ibalambikwa i ya bubela.

Yesu pa kutela luno lukongo bu lubi, watopeka na kutela pa dijina kibundi kya Kolezeni, Betesaida, ne Kapanama, mwalongelwe bilongwa bya bukomo. Yesu wanena’mba shi bino bilongwa bya bukomo byalongelwe mu bibundi bya bene Fenisea bya Tyila ne Shidona, longa bino bibundi byesāshile. Watela kadi ne Kapanama, kine kyadi kitako kya mwingilo wandi kitatyi kimo. Nansha ke mu kino kibundi mwine, bantu bapelele kwitabija. Yesu wanena kino kibundi amba: “Mu Difuku dya Butyibi, ntanda ya Sodoma ikapēlelwa kūminina kukutabuka.”​—Mateo 11:24.

Kupwa Yesu watendela Shandi, wafya bubine bwa ku mushipiditu “ku ba tunangu ne bafunde” ino wasokwela bino bintu ku betyepeje, badi bwa bana batyetye. (Mateo 11:25) Waite bano bantu lwito luyampe amba: “Iyai kondi banwe baputuma na mingilo ne balēmenenwe, nami nkemutūja. Selai lupungu lwami ne kuboila ñeni kondi, mwanda ngidi na ngikadila italala ne mutyima wa kwityepeja, kadi mukamona kutūja. Mwanda lupungu lwami i luyampe, ne kiselwa kyami nakyo i kipēla.”​—Mateo 11:28-30.

Yesu waleta kutūja namani? Bendeji ba bipwilo batwikile bantu biselwa bya bupika bwa bisela, kimfwa bijila bipite kipimo bya pa dya Sabato. Ino Yesu webatūja na kwibafundija bubine bwa Leza, bwampikwa kōnwa na bino bisela. Walombola kadi muswelo wa kusenga boba basonsakanibwe na ba lupusa ba politike ne boba balēmenwe na bubi. Bine, Yesu webalombola muswelo ubwanya kulekelwa bubi bwabo ne kwikala mu ndoe na Leza.

Bonso betabija lupungu luyampe lwa Yesu babwanya kwipāna abo bene kudi Leza ne kwingidila Tata wetu wa mūlu wa kanye ne lusa. Kumwingidila ke kiselwapo kilēma, mwanda bijila bya Leza kebilēmangapo nansha dimo.​—1 Yoano 5:3.