Yesu walonga bivule mu mwingilo wandi mukatampe mu Ngadilea. Ino panena’mba, “Mfwaninwe kusapula myanda miyampe ya Bulopwe bwa Leza ne mu bibundi bikwabo namo,” Yesu kalañangapo’nka Ngadilea. O mwanda waenda “kusapula mu mashinankonka a mu Yudea.” (Luka 4:43, 44) I kyendele’mo, mwanda pano ke ku muketeko kadi masobo a mu Yelusalema abafwena.

Shi tudingakanye byobya byotuyukile pa mwingilo wa Yesu mu Ngadilea, tukamona’mba Maevanjile i manene’tu bityetye pa mwingilo wandi mu Yudea. Nansha shi bantu ba mu Yudea kebasangelapo musapu, ino kino kekikankejepo Yesu kusapula bininge ne kulonga mingilo miyampe konso kwadi.

Pano Yesu kaenda mu kibundi kikatampe kya Yudea, ke Yelusalema kadi, kukatanwa ku Pashika wa mu 31 Yesu ke mwiye. Mu kifuko kya bantu bangi, kubwipi na Kibelo kya Mikōko, kudi kijiba kya bukōnde bukatampe kitwa bu Betezata. Bantu babela, bampofu, ne bilema bāyanga ku kino kijiba. Mwanda waka? Mwanda bantu bavule bakulupile amba babwanya kundapwa na kwiela mu kijiba patenkana mema.

Mu dya Sabato, Yesu wamone muntu ku kino kijiba udi na misongo ke myaka 38. Yesu wamwipangula’mba: “Le usaka kukoma?” Muntu ubela’wa wamulondolola’mba: “A Mfumwami, nkidipo na muntu wa kungela mu kijiba kitatyi kitenkana mema, ino ami shi kengiya mukwabo umpitanga kala kumeso weela’mo.”​—Yoano 5:6, 7.

Yesu wanena kintu kyatulumuja uno muntu ne bonso bekivwana, amba: “Imana, tekuna kakitanda kobe wende.” (Yoano 5:8) Nandi awa wimana. Wakomenenena, wasela kakitanda kandi kaenda!

Bayuda pa kyaba kya basangale pa kintu kya kutendelwa kyalongeka, abo bamona muntu’wa kebamutopeka’mba: “Dyalelo i dya Sabato, i kijidikwe abe kusela kakitanda.” Muntu walondolola’mba: “Yewa wankomejanga ye waunenanga’mba, ‘Tekuna kakitanda kobe wende.’” (Yoano 5:10, 11) Bano Bayuda batopekanga yewa wabelula muntu mu dya Sabato.

Pa kukimba kumuyuka abaipangula’mba: “Le i ani yao wakulombolanga’mba, ‘Tekuna’ko wende’?” I kika kyobamwipangwila? I mwanda Yesu “wajimine mu kibumbo kyadi’po,” kadi muntu wabelwilwe kayukilepo dijina dya Yesu. (Yoano 5:12, 13) Ino uno muntu usa kwitana monka na Yesu. Kitatyi kityetye pa kupita’po, papo ke mu tempelo, muntu’wa wetana na Yesu wayuka mwine wamubelwile ku kijiba.

Muntu wabelwilwe waenda kudi Bayuda badi bamwipangula mwanda wa kubelulwa kwandi. Webasapwila amba i Yesu. Bayuda pa kuyuka’mba i Yesu, abaenda kwadi. Le abaenda mwanda wa kuyuka i na bukomo’ka bulonga nabo Yesu bino bintu bya kutendelwa? Aa. Ino i mwanda wa kumutopeka pa bintu biyampe byaalonga mu dya Sabato. Abashilula ne kumupangapanga!