Myaka 17 ibapite’po na padi Yesu na myaka 12 wipangula bafundiji ku tempelo. Tudi pano ku muketeko wa mwaka 29 Yesu ke mwiye. Kudi bavule besambila padi Yoano, mubutule wa Yesu, mwine usapula mu ntanda yonso ku mutamba wa kushika kwa Munonga wa Yodano.

Yoano udi na mumwekelo ne muneneno usangaja bantu. Bivwalwa byandi i bya myoya ya ngamedia, ne mukaba wa kiseba mu kifuka. Udyanga njie​—muswelo kampanda wa batete​—ne būki. Le i musapu’ka wadi nao? I wa amba: “Mwisāsei, mwanda Bulopwe bwa mūlu bubafwena pabwipi.”​—Mateo 3:2.

Musapu wa Yoano ubatulumuja boba baiya kumwivwana. Bavule abayuka’mba bafwaninwe kwisāsa, ko kunena’mba, kushinta mwikadilo ne mwiendelejo wabo, baleke bilongwa byabo bibi bya kala. Bantu baiya kwadi batambanga ku “Yelusalema ne mu Yudea yense ne mu ntanda yonso ya kufulakufula kwa Yodano.” (Mateo 3:5) Bavule baiya kudi Yoano abesāsa. Webabatyija na kwibatokenya mu mema a Yodano. Mwanda waka?

Ubatyijanga bantu bu kilomboji nansha kiyukeno kya kwisāsa kwa na mutyima onso kwabo ku bubi bwa kutyumuna kipwano kya Bijila bya Leza. (Bilongwa 19:4) Inoko ke bonsopo babwenye bisakibwa. Kitatyi kyaiya bendeji bamo ba bipwilo, Bafadiseo ne Basadusea kudi Yoano, webete bu “lutundu lwa bampidi.” Kaebanena’mba: “Pai bipa bifikīle pa kwisāsa. Kemwakilangai ne kunena banwe bene amba, ‘Tata wetu i Abalahama.’ Mwanda nemusapwila’mba, Leza ubwanya kulupwila Abalahama bana ku ano mabwe’a. Kasolwa i katūlwe kala pa muji wa mityi. Nanshi mutyi onso keupepo bipa bilumbuluke usa kutetwa ne kwelwa mu mudilo.”​—Mateo 3:7-10.

Bantu byobenda bavule kudi Yoano, kadi musapu wandi nao wa bukomo, ne kubatyija kwabatyija bantu bavule, babitobo ne bene Levi abatumwe kukamwipangula amba: “Le abe wi ani?”

Yoano amba, “Ami nkidipo Kidishitu.”

Abo nabo’mba, “Le penepo i namani? Lelo wi Ediya?”

Aye amba: “Aa!”

Abamwipangula’mba, “Le wi Mupolofeto?” ko kunena’mba Mupolofeto mukatampe wānenene Mosesa amba ukāyanga.​—Kupituluka 18:15, 18.

Yoano amba, “Aa!”

Abamwipangula monka amba: “Le abe wi ani? Witulombole amba netu tumone mwa kukalondolwela boba betutumine. Le abe mwine unenanga’mba wi ani?” Yoano amba: “Ami ne diwi dya muntu wela lubila mu ntanda mutuputupu amba, ‘Ololai dishinda dya Yehova,’ monka mwānenene mupolofeto Isaya.”​—Yoano 1:19-23.

Kebakimbe kuyuka na kwipangula’mba, “Penepo mwanda waka ubatyija shi abe kudipo Kidishitu nansha Ediya nansha Mupolofeto?” Webalondolola biyampe amba: “Muntu umo wimene mu bukata mwenu okemuyukilepo, yewa wiya kunyuma kwami.”​—Yoano 1:25-27.

Bine Yoano uyukile amba uteakanyanga dishinda na kulongolola bantu bekale na mutyima utōka mwa kwitabijija Meshiasa wālailwe, mwine wa kwikala Mulopwe. Yoano wanena pa mwanda wandi amba: “Yewa unonda kunyuma i mukomo kuntabuka, onkifwaninwepo nansha kuvūla bikwabilo byandi.” (Mateo 3:11) Yoano wanena’nka ne kunena’mba: “Yewa wiya kunyuma kwami wampite kumeso, mwanda wāikele’ko kumeso kwami.”​—Yoano 1:15.

Nanshi musapu wa Yoano wa amba, “Mwisāsei, mwanda Bulopwe bwa mūlu bubafwena pabwipi,” i mufwaninwe. (Mateo 3:2) Ubaikala bwa kiyukeno ku bantu bonso kilombola amba mwingilo wa Yesu Kidishitu, Mulopwe wa Yehova wiya’ko keudi pabwipi.