Bana-balume bamo abatambe Kutunduka. I babuka na ñenyenye—i bantu befundile mumwekelo wa ñenyenye, kebalanga’mba kulonda’yo kwibakwashanga bashintulule myanda ipita mu būmi bwa bantu. (Isaya 47:13) Abo pobadi kwabo Kutunduka, bamwene “luñenyenye” belulonda mu makilometele mavule, ke na kwendapo ku Betelema ino i ku Yelusalema.

Babuka’ba pa kufika’ko, abaipangula’mba: “Lelo i kwepi kudi yewa wabutwilwe bu mulopwe wa Bayuda? Mwanda twamwene lwandi luñenyenye potwadi Kutunduka, netu tubaiya kumufukatyila.”—Mateo 2:1, 2.

Heloda mulopwe wa Yelusalema pa kwivwana’byo walobe bininge. Ebiya waityija babitobo bakulu ne bendeji bakwabo ba bipwilo bya Bayuda kaebepangula kwadi kwa kubutwilwa Kidishitu. Abalondolola mungya Bisonekwa amba: “I mu Betelema.” (Mateo 2:5; Mika 5:2) Ponka’pa, Heloda waityija mu bufyafya babuka na ñenyenye, webasoñanya’mba: “Endai mukakimbe biyampe shē yao mwana mutyetye, shi mubamusokola mundyukije, amba nami ñende nkamufukatyile.” (Mateo 2:8) Inoko na bubine Heloda kyakimbila mwana mutyetye’wa i mwanda wa kumwipaya!

Babuka na ñenyenye pa kwenda, kubamweka kintu kitulumuja. “Luñenyenye” lobamwene pobadi Kutunduka lubebatangidila monka kumeso. Bine, luno ke luñenyenyepo lwa bine, ino lwalupwilwe mwanda’tu wa kwibaludika. Babuka na ñenyenye abelulonda kufika ne byolwaimana nkū lolokele pa njibo idi’mo ba Yosefa ne Madia pamo ne wabo mwana mutyetye.

Babuka na ñenyenye pa kutwela mu njibo, abatana Madia ne mwana wa lukeke—ke Yesu kadi. Ponka’pa, babuka na ñenyenye kebevukwila kwadi. Kupwa abamupe ne byabuntu bya olo, ensense itōka, ne mpakwa. Pobadi kebakimbe kujokela kudi Heloda, Leza webadyumuna mu kilotwa baleke kujokela’ko. O mwanda abakajokela kwabo ne kwenda dishinda dingi.

Molangila i ani waletele “luñenyenye” lwadi luludika babuka na ñenyenye? Vuluka’mba, kelwebaludikilepo kwine kudi Yesu, ku Betelema. Ino lwebatwele bidi ku Yelusalema kobakemwene na Mulopwe Heloda, wadi usaka kwipaya Yesu. Shi Leza kadyumwinepo ne kukankaja babuka na ñenyenye, badi ba kukalombola Heloda kokwa kudi Yesu. Nanshi, i Satana, walwana na Leza wadi usaka kwipaya Yesu, ye waingidije ano manwa mwanda wa kufikidija kitungo kyandi.