Enda ku bidi'mo

Enda ku kifunka

KIFUNDWA 37

Yehova Wesambe na Samwele

Yehova Wesambe na Samwele

Edi, Kitobo Mukatampe, wādi na bana babidi bana-balume bādi bengila bu babitobo ku kipema. Majina abo i ba Hofini ne Finease. Kebādipo bakōkele bijila bya Yehova, kadi bādi basusula bantu bibibibi. Bene Isalela pobādi bāya kwela bitapwa kudi Yehova, ba Hofini ne Finease bādi betongela’mo mwita muyampe. Edi wāivwene bino byādi bilonga bandi bana, ino aye wibatala bitupu. Le Yehova wādi wa kuleka bino bintu byendelele kulongeka?

Nansha Samwele byādi mwanuke kudi ba Hofini ne Finease, inoko kēbewilepo. Yehova wāsenswe Samwele. Difuku dimo bufuku Samwele wādi ulēle, wāivwana muntu umwita. Wālanguka, wāenda lubilo kudi Edi, wāitaba’mba: ‘Kalombo!’ Ino Edi wāmulondolola’mba: ‘Nkikwityilepo. Joka ukalāle.’ Samwele wākajokela pa butanda. Kupwa bāmwita monka. Samwele pa kwivwana bamwita musunsa wa busatu, Edi wājingulula’mba i Yehova wita Samwele. Edi wālombola Samwele amba shi abakwite dikwabo, nena’mba: ‘Nena, a Yehova. Mwingidi obe wivwene.’

Samwele wākajokela monka pa butanda. Kupwa wāivwana bamwita’mba: ‘Samwele! Samwele!’ Aye amba: ‘Nena, mwanda mwingidi obe wivwene.’ Yehova wāmusapwila’mba: ‘Sapwila Edi amba nsa kumupa mfuto, aye ne kisaka kyandi. I muyuke bintu bibi bilonga bandi bana ku kipema kyami, ino aye wibatala bitupu.’ Lubanga, Samwele wāshitula milango ya ku kipema monka mwashitwilanga nyeke. Samwele wādi na moyo pa kusapwila kitobo mukatampe byānenene Yehova. Ino Edi wāmwita kamwipangula’mba: ‘A mwanami, le Yehova wakusapwilanga bika? Nombole bintu byonso byaakusapwilanga.’ Ebiya Samwele wālombola Edi bintu byonso.

Samwele paādi wenda utama, Yehova wādi nandi nyeke. Mu ntanda yonso tamba ku ngalwilo kutūla ne ku mfulo, bene Isalela bonso bāyukile amba Yehova watonge Samwele ekale mupolofeto kadi mutyibi.

“Nanshi, vuluka Umpangi obe Mukatakata mu mafuku a busongwalume bobe.”​—Musapudi 12:1