Enda ku bidi'mo

Enda ku kifunka

KIFUNDWA 102

Kusokwelwa Kudi Yoano

Kusokwelwa Kudi Yoano

Mutumibwa Yoano paādi ukutyilwe pa kisanga kya Patamosa, Yesu wāmulombwele bimonwa 16 nansha’mba byelekejo bya myanda ya mu mafuku a kumeso. Bino bimonwa byādi bilombola mukapandwilwa dijina dya Yehova, kwiya kwa Bulopwe bwandi, ne mukalongekela kiswa-mutyima kyandi pano pa ntanda pamo na momwa mūlu.

Mu kimonwa kimo, Yoano wamone Yehova pa lupona lwandi lwa ntumbo momwa mūlu, mujokolokwe na bakulumpe 24 bavwele bivwalwa bitōka tō ne bilukwa bya olo ku mitwe yabo. Mapeni ne mawi a mikungulo atamba mu lupona. Bano bakulumpe 24 bevukwilanga ku meso a Yehova ne kumutōta. Mu kimonwa kikwabo, Yoano wamone kibumbo kikatampe kitambile mu mizo yonso, bantu bonso, ne mu ndimi yonso kitōta Yehova. Kana ka Mukōko, ko kunena’mba Yesu, kebakumba ne kwibatwala ku mema a būmi. Kupwa, mu kimonwa kikwabo, Yesu washilula kuludika bu Mulopwe momwa mūlu, pamo na bakulumpe 24. Mu kimonwa kilonda’ko, Yoano wamone Yesu ulwa na mpumina, ko kunena’mba Satana, ne bandemona bandi. Yesu webapanga mūlu, ne kwibela pano pa ntanda.

Kupwa, Yoano wamone kimonwa kiyampe mpata kya Kana ka Mukōko ne bantu 144 000 bemene pa Lūlu lwa Ziona. Kadi wamone mwikeulu umo wipapa pa ntanda yonso, usapwila bantu batyine Leza ne Kumupa ntumbo.

Mu kimonwa kilonda’ko, divita dya Amakedona dibalwibwa. Pa dino divita, Yesu ne kibumbo kyandi kya divita abashinde ntanda mibi ya Satana. Mu kimonwa kya mfulo, Yoano wamone bumo bubwaninine mūlu ne pano pa ntanda. Satana ne lutundu lwandi abaonakanibwa lonso. Bantu bonso mūlu ne pano pa ntanda abamone dijina dya Yehova bu dijila ne kumutōta’nka aye kete.

“Nkatūla lwana pa bukata bwa abe ne mwana-mukaji ne pa bukata bwa lutundu lobe ne lutundu lwandi. Ukasonsakanya mutwe obe, nobe ukamusanshija ku kapondo.”​—Ngalwilo 3:15