Enda ku bidi'mo

Enda ku kifunka

KIFUNDWA 80

Yesu Watonge Batumibwa Dikumi ne Babidi

Yesu Watonge Batumibwa Dikumi ne Babidi

Yesu pa kupwa kusapula mu bula bwa kintu kya mwaka umo ne kipindi, wādi na butyibi bukatampe bwa kukwata. Le i bāni baādi wa kutonga bu ba kwingila nandi? Le i bāni baādi wa kufundija mwanda wa batangidile kipwilo kya bwine Kidishitu? Pa kutonga bano bantu, Yesu wāsakile Yehova amuludike. O mwanda wāendele ku lūlu kwa bunka bwandi, wālombela bufuku bonso ne bukata. Lubanga, Yesu wāita bandi bana ba bwanga bamo wātonga’mo batumibwa bandi 12. Le ubavuluka majina abo? Kwādi Petelo, Andele, Yakoba, Yoano, Fidipa, Balatelemi, Tomase, Mateo, Yakoba mwanā Afesa, Tadeusa, Shimona, ne Yudasa Isakadiota.

Andele, Petelo, Fidipa, Yakoba

Bano ba Dikumi ne Babidi ye bādi benda na Yesu. Yesu pa kupwa kwibafundija, wēbatumine bakasapule abo bene. Yehova wēbapele bukomo bwa kupanga bandemona ne kubelula bantu babela.

Yoano, Mateo, Balatelemi, Tomase

Yesu wāityile bano ba Dikumi ne Babidi bu balunda nandi, kadi wādi wibakulupile. Bafadiseo bādi bamona bano batumibwa bu bantu bampikwa kufunda, bantu ba bitupubitupu. Inoko Yesu wēbafundije mwa kwingidila mwingilo wabo. Bāikele na Yesu mu bitatyi bya kasekuseku bya būmi bwandi, kimfwa kumeso kwa aye kufwa ne pa kupwa kwa kusangulwa’ye. Bavule mu bano ba Dikumi ne Babidi bādi bene Ngadilea, pamo bwa Yesu. Bamo bādi basonge.

Yakoba mwanā Afesa, Yudasa Isakadiota, Tadeusa, Shimona

Bano batumibwa bādi bantu bampikwa kubwaninina, bādi balonga ne bilubo. Kyaba kimo bādi besamba pampikwa kulanga kadi bādi bakwata ne butyibi bubi. Kyaba kikwabo bādi babulwa kitūkijetyima. Bēpotomeje’nka ne kwipotomeja mwanda wa kufwila bukata. Nansha nankyo, bādi bantu bayampe basenswe Yehova. Abo, bo bāikele ke kyalwilo kya kipwilo kya bwine Kidishitu pāendele Yesu.

“Nemwite bu balunda, mwanda nemuyukija bintu byonso byonaivwene kudi Tata.”​—Yoano 15:15