Enda ku bidi'mo

Enda ku kifunka

 KIFUNDWA 67

Mumbu ya Yelusalema

Mumbu ya Yelusalema

Tujokei bidi myaka mityetye kunyuma. Mwine Isalela umo witwa bu Nehemia, mwingidi wa Mulopwe Alatazelekishishi, wādi ushikata mu Shushane, kibundi kya bene Peleshia. Mwanabo na Nehemia umo mwana-mulume, wāile na musapu mubi wa ku Yuda wa amba: ‘Bantu baendele kukajokela ku Yelusalema kebakingilwepo. Mumbu ya kibundi ne bibelo byaonakenye bene Babiloni kebyaubakulwilwe nansha dimo.’ Nehemia wāvutakanibwe ñeni. Aye pa kusaka kwenda kukebakwasha ku Yelusalema, wālombela bidi, mwanda wa mulopwe āmuleke ende.

Kupwa, mulopwe wājingulula’mba Nehemia udi na bulanda. Mulopwe wāmunena’mba: ‘Kashā, nkyakumwene nankyo. Le kudi mwanda?’ Nehemia nandi amba: ‘Le ngikala’tu biyampe namani, papo Yelusalema kibundi kyami mu masala?’ Mulopwe wāmwipangula’mba: ‘Lelo usaka nkulongele bika?’ Ponka na ponka, Nehemia wālombela mundamunda. Kupwa wānena mulopwe amba: ‘Nakwisāshila, ndeke bidi ñende nkōbakulule mumbu ya Yelusalema.’ Mulopwe Alatazelekishishi wāsoñanya Nehemia ende, kadi mulopwe wālonga bukomo mwanda wa Nehemia ende biyampe lwendo lwandi lulampe. Kadi wātūdile Nehemia bu mbikavu wa Yuda, wāmupa ne mityi ya kūbakulula nayo bibelo bya kibundi.

Pāfikile Nehemia ku Yelusalema, wābandawile bidi mumbu. Kupwa, wābungila pamo babitobo ne baludiki, wēbasapwila’mba: ‘Kino i kintu kibi mpata. Tufwaninwe kwikwata’ko na mingilo.’ Bantu bāitabija, bāanza kūbakulula mumbu.

Inoko bantu bamo balwana na bene Isalela bādi bebazawila’mba: ‘Nansha ke mukenge ubwanya kupomona lubumbu lomūbaka’lo.’ Bene Isalela bāsūdile byobādi bebatuka, abo bāendelela’nka na kūbaka. Lubumbu lwālepele, lwāikala lukomo.

Balwana nabo bākwata mulangwe wa kwiila ku mitamba mikwabo mwanda wa kutamba Yelusalema divita mu kitulumukila. Bayuda pobāivwene uno mulangwe, bāzakele. Ino Nehemia wēbanena’mba: ‘Kemwakikwatwai moyo. Yehova udi netu.’ Ebiya Nehemia wātūla’ko balami ba kukinga bengila, balwana bākomenwa kwiya kwibatamba divita.

 Mwingilo wa kūbakulula mumbu ne bibelo wāpwile mu mafuku’tu 52. Nehemia wāityije bene Levi bonso bāye mu Yelusalema mwanda wa kufikidija mumbu. Wēbabenye mu bibumbo bibidi bya batuimba. Bākandile pa lubumbu na kukandila pa nkala ya ku Kibelo kya Nsulo, kibumbo kimo kyāanza kwendela ou mutamba kikwabo nakyo mutamba mukwabo, kēbajokoloka kibundi. Bāimbīle Yehova na bimpungidi, membo, ne nsense. Ezela wāendele na kibumbo kimo, Nehemia nandi na kibumbo kikwabo, kufika ne byobākesambakenine ku tempelo. Bantu bonso—bana-balume, bana-bakaji, ne bana—bālambwile bitapwa kudi Yehova ne kusoba masobo. Mawi abo a nsangaji āivwenwe’nka ne kulampe.

“I kutupu kyabulwi nansha kimo kikupungīlwe kikalonga kintu.”​—Isaya 54:17