Yehova i mupe bana-balume ne bana-bakaji ino ntanda. Ntanda i kīkalo kyetu. Nanshi, mwana-mulume ne mwana-mukaji umbajinji, ba Adama ne Eva, kebāpangilwepo mwanda wa kukayuja mūlu​—mwanda Leza wāpangile kala bamwikeulu ba kwikala’mo. (Yoba 38:4, 7) Inoko Leza, wātūdile muntu umbajinji mu paladisa ya dyangi itwa bu Edena. (Ngalwilo 2:15-17) Yehova wāmupele aye pamo ne bana bandi dyese dya kwikala na būmi bwa kubulwa mfulo pano pa ntanda.​—Tanga Ñimbo ya Mitōto 37:29; 115:16.

Ku ngalwilo, budimi bwa Edena kete yo yādi paladisa. Ba mulume ne mukaji babajinji bādi ba kubutula bana ne kuyuja ntanda. Mwenda mafuku, bādi ba kunekenya ntanda yonso ne kwiyalamuna ke paladisa. (Ngalwilo 1:28) Ino nshi keikonakanibwapo nansha dimo. Ikashadidila bu kīkalo kya muzo wa muntu.​—Tanga Ñimbo ya Mitōto 104:5.

Tala video Mwanda Waka Leza Wāpangile Ntanda?

Ba Adama ne Eva bātombokele, kupwa Yehova wēbapangila panja pa budimi. Paladisa yājimina, kadi kekudipo muntu wābwenye kwiijokeja. Bible unena’mba: “Ntanda i mipebwe yewa mubi.”—Yoba 9:24.​—Tanga Ngalwilo 3:23, 24.

Le Yehova wālekele mpango yandi imbajinjibajinji itala bantu? Mhm! Aye i Mwinē Bukomo Bonso. Kakankalwangapo. (Isaya 45:18) Ukajokejeja bantu ku būmi bwaādi wibasakila.​—Tanga Ñimbo ya Mitōto 37:11, 34.

Paladisa ikajokejibwa pano pa ntanda’nka shi Yesu kaludika bu Mulopwe utongelwe na Leza. Ku divita ditwa bu Amakedona, Yesu ukendeja bamwikeulu ba Leza ne konakanya  balwana na Leza bonso. Kupwa Yesu ukakuta Satana mu kifungo mu bula bwa myaka 1 000. Bantu ba Leza bakapanda ku bonakani, mwanda Yesu ukebendeja ne kwibakinga. Bakamona būmi bwa nyeke mu Paladisa pano pa ntanda.​—Tanga Kusokwelwa 20:1-3; 21:3, 4.

Le i kitatyi’ka kikafudija Leza bubi pano pa ntanda? Yesu wāletele “kiyukeno” kilombola kufwena kwa mfulo. Ngikadilo ya ntanda dyalelo itūlanga būmi bwa bantu pa katele bulenda, kadi ilombola’mba tudi ku “mvuyo ya ngikadilo ya bintu.”​—Tanga Mateo 24:3, 7-14, 21, 22.

Umbula bwa umbikalo wa myaka 1 000, Yesu ukafudija masusu onso. (Isaya 9:6, 7; 11:9) Kutentekela pa kwingila bu Mulopwe, Yesu ukengila ne bu Kitobo Mukatampe ukafundwila kulampe bubi bwa boba baswele Leza. Mu uno muswelo, Leza, kupityila kudi Yesu, ukapwija misongo, bununu, ne lufu.​—Tanga Isaya 25:8; 33:24.

Bantu bakōkele Leza bo bakekala mu Paladisa. (1 Yoano 2:17) Yesu wātumine balondi bandi kukakimba bantu batūkanye ne kwibafundija bya kulonga pa kwitabijibwa na Leza. Dyalelo, Yehova uteakanyanga midiyo ne midiyo ya bantu mwa kukekadila’bo mu Paladisa pano pa ntanda. (Zefenia 2:3) Ku Njibo ya Bulopwe ya Batumoni ba Yehova, bantu befundanga’ko mwa kwikadila balume, bashabana, bakaji ne bainabana balumbuluke. Bana ne bambutwile batōtelanga’ko pamo, ne kwifunda muswelo wa kumwena mu myanda miyampe.​—Tanga Mika 4:1-4.