Enda ku bidi'mo

Enda ku kifunka

 KIFUNDWA 14

Mwanda Waka Leza Udi na Bulongolodi?

Mwanda Waka Leza Udi na Bulongolodi?

1. Mwanda waka Leza wātūdile’ko bulongolodi mu Isalela wa kala?

Leza wālongolwele bana ba mukulutuba Abalahama bekale ke muzo ne kwibapa bijila. Wāityile muzo’wa bu “Isalela” ne kwibapa butōtyi bwa bine ne kinenwa kyandi bu kishi kyabo. (Ñimbo ya Mitōto 147:19, 20) Mu uno muswelo, mizo yonso yādi ya kumwena mudi Isalela.​—Tanga Ngalwilo 22:18.

Leza wātongele bene Isalela bekale bu bandi batumoni. Mānga yabo ilombola bantu mobādi bamwena dyese mu kukōkela bijila bya Leza. (Kupituluka 4:6) Nanshi bantu bakwabo bādi ba kuyuka Leza wa bine kupityila ku bene Isalela.​—Tanga Isaya 43:10, 12.

2. Mwanda waka bene Kidishitu ba bine i balongololwe?

Mwenda mafuku, muzo wa Isalela wājimije dyese dya kwitabijibwa na Leza, wapingakanibwa na kipwilo kya bwine Kidishitu. (Mateo 21:43; 23:37, 38) Dyalelo, pa kyaba kya bene Isalela, bene Kidishitu ba bine bengilanga bu batumoni ba Yehova.​—Tanga Bilongwa 15:14, 17.

Yesu wālongolwele balondi bandi bakasapule ne kulonga bana bwanga mu mizo yonso. (Mateo 10:7, 11; 24:14; 28:19, 20) Uno mwingilo i munane dyalelo ku mfulo kwa ino ngikadilo ya bintu. Yehova i mubungile bantu ba mizo yonso mu butōtyi bwa bine mu muswelo kewamwekele kashā. (Kusokwelwa 7:9, 10) Bene Kidishitu ba bine i balongololwe mwanda wa kukankamika ne kukwasha bakwabo. Ku kupwila kwabo, badi na mpangiko ya muswelo umo ya bufundiji bwa mu Bible ntanda yonso.​—Tanga Bahebelu 10:24, 25.

 3. I muswelo’ka washilwile bulongolodi bwa Batumoni ba Yehova ba mu kino kyetu kitatyi?

Mu myaka ya 1870, kakisumpi katyetye ka Befundi ba Bible kashilwile kusokola bubine bwa mu Bible bwadi bujimine tamba kala. Pa kuyuka’mba Yesu wālongolwele kipwilo kya bwine Kidishitu mwanda wa kusapula, o mwanda bashilwile kampanye kakatampe ka kusapula Bulopwe ntanda yonso. Baselele dijina dya bu Batumoni ba Yehova mu 1931.​—Tanga Bilongwa 1:8; 2:1, 4; 5:42.

4. I muswelo’ka ulongolwelwe Batumoni ba Yehova?

Mu myaka katwa kabajinji, bipwilo bya bene Kidishitu mu matanda mavule byāmwenine mu kitango kyendeji kyādi kilēmekele Yesu amba ye Mutwe wa kipwilo. (Bilongwa 16:4, 5) Mo monka ne dyalelo, Batumoni ba Yehova bamwenanga mu Kitango Kyendeji kya bakulumpe ba bwino. Kitalanga mabilo a misambo a Batumoni ba Yehova alamuna ne kwabanya mabuku a kwifunda nao Bible mu ndimi 800 ne musubu. Nanshi, Kitango Kyendeji kipānanga bwendeji ne kukankamika bantu na Bisonekwa mu bipwilo 100 000 ne kupita kujokoloka ntanda yonso. Mu kipwilo ne kipwilo mudi bana-balume babwenye bisakibwa bengila bu bakulumpe nansha bu batadi. Bano bana-balume balamanga na buswe luombe lwa Leza.​—Tanga 1 Petelo 5:2, 3.

Batumoni ba Yehova i balongololwe mwanda wa kusapula myanda miyampe ne kulonga bana ba bwanga. Pamo bwa batumibwa, netu tusapulanga ku njibo ne njibo. (Bilongwa 20:20) Kadi twitabijanga kwifunda Bible na bantu ba mityima myoloke basenswe bubine. Inoko Batumoni ba Yehova ke bulongolodipo’tu bitupu, mhm. Twi kisaka kidi na Tata umo wa buswe. Twi batutu ne bakaka betele mutyima. (2 Tesalonika 1:3) Bantu ba Yehova byobalongolwelwe mwanda wa kusangaja Leza ne kukwasha bakwabo, i babunde kisaka kya nsangaji kutabuka bisaka byonso bya pano pa ntanda.​—Tanga Ñimbo ya Mitōto 33:12; Bilongwa 20:35.