MU NDIMI imbajinjibajinji, Bible wingidije kishima kya Kihebelu sheʼohlʹ ne kiifwene nakyo mu Kingidiki haiʹdes misunsa 70 ne kupita. Bino bishima bibidi bikwatañene na kishima lufu. Bashintuludi bamo ba Bible bashintulwile’byo bu “kibundu,” “kalunganyembo,” nansha “kina.” Inoko, mu ndimi mivule mine kemudipo kishima kifike’po kiselele buluji bonso bwa bino bishima bya Kihebelu ne Kingidiki. O mwanda Bible Bushintuludi bwa Ntanda Mipya wingidija bishima “Sheole” ne “Hadese.” Le bino bishima bidi na buluji’ka bwinebwine? Tutalei muswelo obingidijibwe mu mavese meshileshile a mu Bible.

Musapudi 9:10 unena’mba: “Kekudipo mingilo nansha kusambakanya bintu pamo miswelo ne miswelo, nansha kuyukidija, nansha ñeni mu kibundu [“Sheole,” NW] koenda’kwa.” Le ko kunena’mba Sheole pano ifunkila pa kibundu kampanda nansha kabudi pajīkilwe muswe wetu? Mhm. Kitatyi kisambila Bible pa kibundu nansha kabudi pajīkilwe’mo muntu, wingidijanga kishima kikwabo kya Kihebelu ne kya Kingidiki, kengidijangapo sheʼohlʹ nansha haiʹdes. (Ngalwilo 23:7-9; Mateo 28:1) Kadi, Bible kengidijangapo kishima “Sheole” pa kwisambila pa tubudi nansha malālo ajīkilwe’mo bantu bavule pamo, kimfwa ku tubudi twa kisaka nansha kina kijīkilwe’mo bantu bavule pamo.—Ngalwilo 49:30, 31.

Penepa “Sheole” ufunkilanga pa kifuko kya muswelo’ka? Kinenwa kya Leza kilombola amba “Sheole,” nansha “Hadese,” bifunkila pa kintu kitabukile bukata ne kibundu kijīkilwe’mo bantu bangi pamo. Kimfwa, Isaya 5:14 unena amba Sheole nansha kalunganyembo kabaijanga “kiswa-mutyima kyako, ne kwasamija kyakanwa kyako pululu’tu.” Kalunganyembo nansha Sheole ke mipwe kala kumina bafwile kebabadika, ino bimweka nyeke amba ikidi na nzala. (Nkindi 30:15, 16) Tubudi nansha malālo akokeja kujīkwa’ko bantu bafwile ba buvule kampanda ayula, ino Sheole nansha ‘kalunganyembo kekekutangapo nansha patye.’ (Nkindi 27:20) Bine, Sheole keiyulangapo. Kadi keidipo na mikalo. O mwanda Sheole nansha Hadese ko kunena’mba kalunganyembo ke kifukopo kimweka na meso kidi pantu kamukaya. Ino i kibundu kya bantu bonsololo bafwile, kifuko kyelekeja kokwa kulēle bantu bavule mu tulo twa lufu.

 Bufundiji bwa Bible butala pa lusangukilo bukwasha twimvwanije bininge buluji bwa kishima “Sheole” nansha “Hadese.” Kinenwa kya Leza kikwatañanya Sheole ne Hadese na muswelo wa lufu lukasangulwa’mo bafwile. * (Yoba 14:13; Bilongwa 2:31; Kusokwelwa 20:13) Ne kadi Kinenwa kya Leza kilombola amba mu boba badi mu Sheole, Hadese, ke mu kalunganyembo kadi, kemubadilwapo’nka bantu baingidile Yehova ino i ne bavule bene kebamwingidilepo. (Ngalwilo 37:35; Ñimbo 55:15) O mwanda Bible ufundija amba “kukekalanga lusangukilo lwa boloke ne bakondame bene kumo.”—Bilongwa 24:15.