Mwimaniji wa Banki ya Ntanda Yonso wadyumwine mu lapolo ya Kweji 6, 2022 amba, “Misokwe ya ntanda yonso ibaikala monka mu kyaka. Mu kino kitatyi bintu bibakanda bei bininge, inoko bantu na lupeto lutyetye.”

 Fonds monétaire international yanenene amba, “Esanse ne byakudya bibakanda bei bukidibukidi, kino kibasusula bininge bantu ba mu matanda malanda.”

 Bible witukwasha twivwanije mwanda waka kudi ano makambakano a misokwe, muswelo wa kulwa nao, ne lukulupilo lwa mukapwijibwa uno mwanda lonso.

•   Bible utela bino bitatyi byotudi’mo bu “mafuku a mfulo.”—2 Temote 3:1.

•   Yesu wālaile amba “binkumbulu bilenga moyo,” nansha binkumenkume bizakaja, bikalongeka mu kino kitatyi. (Luka 21:11) Kukanda kwa bintu kuleta moyo. Bantu bazumbijanga mutyima pa būmi bwabo bwa kumenso, kebalangalanga shi bakabwanya kuvuija bisakibwa bya byabo bisaka.

•   Mukanda wa Kusokwelwa wālaile amba byakudya bikakanda bei mu kino kitatyi. “Naivwana ne diwi . . . dinena’mba: . . . makilo asatu a ōloje ku lufuto lwa pa difuku dimo!”—Kusokwelwa 6:6, Dibuku Dijila.

 Pa kuyukila’ko bivule pa “mafuku a mfulo” ne pa bupolofeto budi mu mukanda wa Kusokwelwa, tala video inena’mba Tamba mu 1914, Ntanda I Mishinte ne kutanga kishinte “Ba pa Tubalwe Baná—Le I Bāni?”

•   “Bakobakanga mobo ne kwikala’mo, kadi bakadimanga madimi a mañanza ne kudya bipa byao. Kebakobakapo amba muntu ungi ekale’mo, nansha kudima’mba bantu bakwabo badye.”—Isaya 65:21, 22.

•   “Kukekalanga miseke mivule pa ntanda; ikekalanga mingimingi pangala pa ngulu.”—Ñimbo ya Mitōto 72:16.

•   “‘Pa mwanda wa bamweshibwa malwa basusulwa, pa mwanda wa kubinza kwa mulanda, nkemananga kulonga’po kintu,’ i Yehova unena.”—Ñimbo ya Mitōto 12:5. a

 Panopano ponka Leza usa kutalula’ko makambakano a misokwe, ke enkapo mu ntanda imo, inoko ntanda yonso. Pa kuyuka mwakeatalwila’ko, tanga kishinte “Le Bibwanika Kupwa Bukondame mu Myanda ya Misokwe?”

 Inoko tamba’nka pano, Bible ubwanya kukukwasha mwa kulwila na makambakano a kukanda kwa bintu. Muswelo’ka le? Mu Bible mudi madingi a kamweno a mwa kwingidijija lupeto na tunangu. (Nkindi 23:4, 5; Musapudi 7:12) Pa kuyukila’ko bivule, tanga kishinte “Kinga Misokwe Yobe” ne “Mwa Kwiendejeja na Lupeto Lutyetye mu Būmi.”