Musapudi 1:1-18
1 Binenwa bya nkonga-bantu,*+ mwanā Davida, mulopwe mu Yelusalema.+
2 Nkonga-bantu unena’mba: “Kya bitupu kikatampe kutabuka!Kya bitupu kikatampe kutabuka! Kintu kyonso i kya bitupu!”+
3 Lelo muntu umwenanga bika mu mwingilo wandi onso mukomoMwine waingila munshi mwa dyuba?+
4 Lukongo lwenda, kadi lukongo lwiya,Inoko ntanda ikele’ko* nyeke.+
5 Dyuba ditambanga,* kadi dyuba diponanga;Kupwa dyajokela* lubilo pa kifuko podisa kutamba monka.+
6 Luvula lwendanga kunshi kadi lujokolokela dya kungala;Lujokoloka kadi lwendelela kujokoloka; luvula lujokolokanga’nka kujokoloka.
7 Tuminonga tonso tukukilanga mu dijiba, ino dijiba kuyula mpika.+Pa kifuko pakukilanga tuminonga,* tujokelanga’po kukuka monka.+
8 Bintu byonso bipungijanga;Kekudipo muntu ubwanya’nka ne kwisamba’byo.
Diso keditondwangapo kumona;Nansha kutwi kuyula kwivwana.
9 Byobya bidi’ko byo bikekala’ko,Kadi byobya bilongwa byo bikalongwa monka;Kekudipo kipya munshi mwa dyuba.+
10 Lelo kudi kintu kibwanya kunena muntu amba, “Tala kino’ki—i kipya”?
Kyadi’ko kala tamba kala;Kyadi’ko kala kumeso kwa kyetu kitatyi.
11 Kekudipo muntu uvuluka bantu ba mu bitatyi bya kalaNansha ukavuluka boba bakekala’ko mwenda mafuku.
Nansha abo kukavulukwa na boba bakekala’ko monka mwenda mafuku.+
12 Amiwa, nkonga-bantu, ne mulopwe pa Isalela mu Yelusalema.+
13 Natele mutyima wami ku kufunda ne kutala na tunangu+ bintu byonso bilongwa munshi mwa madiulu+—mwingilo wa malwa upēne Leza ku bana ba bantu amba bengile’o.
14 Namwene mingilo yonso yadi ilongwa munshi mwa dyuba,Ino tala! kintu kyonso kyadi kya bitupu, kupanga luvula.+
15 Kyokya kikondame kekibwanyapo kōlolwa,Kadi kyokya kibudilwe’ko kekibwanyapo kubalwa.
16 Penepo nanena mu mutyima wami amba: “Tala! Naikala na tunangu tukatampe, kutabuka muntu ense wadi’ko kumeso kwami mu Yelusalema,+ kadi mutyima wami wamwene tunangu ne buyuki buvule mpata.”+
17 Natele mutyima wami ku kuyuka tunangu ne kuyuka bulubi* ne kuyuka buvila,+ kadi kino nakyo i kupanga luvula.
18 Mwanda tunangu tuvule tuletanga njia mivule,O mwanda yewa ense uvudija buyuki uvudijanga misanshi.+
Kunshi kwa Dyani
^ Nansha’mba “mukongakani; ubunga bantu.”
^ Kishima pa kishima i, “imene.”
^ Nansha’mba “dyeñenyanga.”
^ Nansha’mba “dītola dyesakana.”
^ Nansha’mba “tuminonga twa mu buyo; tuminonga twa mu kitatyi.”
^ Nansha’mba “bulembakane bukatampe.”
