Kupituluka mu Bijila 17:1-20
17 “Kufwaninwepo kulambula kudi Yehova Leza obe kitapwa kya ñombe nansha mukōko udi na kabulema nansha na kintu kyo-kyonso kibi, mwanda kikekala kya munyanji kudi Yehova Leza obe.+
2 “Shi kubatanwa mwana-mulume nansha mwana-mukaji mu bukata mobe, mu kibundi kya mu bibundi byobe bikupa Yehova Leza obe, ulonga bibi ku meso a Yehova Leza obe ne kujilula kipwano kyandi,+
3 kadi wasāsuka katōta baleza bakwabo ne kwivukwila kobadi, nansha ku dyuba nansha ku kweji nansha ku bibumbo byonso bya mūlu,+ kintu kyonkisoñenyepo.+
4 Shi abakulombola mwanda’wa nansha shi ubewivwana, nabya ukakimba senene mwanda’wa. Shi kudi bubinga bulombola’mba kino kintu kya munyanji i kilongeke+ bine mu Isalela,
5 nankyo mwana-mulume nansha mwana-mukaji walonga kino kintu kibi ukamulupwila panja pa bibelo bya kibundi, kadi mwana-mulume nansha mwana-mukaji’wa ufwaninwe kwaswa mabwe ne byafwa.+
6 Yewa ufwaninwe kufwa’wa, ukafikijibwa ku lufu pa bukamoni* bwa batumoni babidi nansha batumoni basatu.+ Kafwaninwepo kufikijibwa ku lufu pa bukamoni bwa kamoni umo.+
7 Maboko a batumoni o akekala mabajinji kumwasa mabwe afwe, ebiya maboko a bantu bonso kealonda. Abe ufwaninwe kutalula kibi mu bukata mobe.+
8 “Shi kubatambe mwanda mu kibundi kimo kya mu bibundi byobe mukukomene bininge kutyiba, ekale i mwanda utala kumwanga mashi+ nansha utala kyepelo kya muntu nansha kilongwa kya butomboki kilongelwe nansha myanda mikwabo ya kwipatanya, ukemana ne kwenda ku kifuko kitonga Yehova Leza obe.+
9 Enda kudi babitobo bene Levi ne kudi mutyibi+ wingila mu mene mafuku’a, wibepangule nabo bakakulombola butyibi bwa kukwata.+
10 Ebiya ukalongela mungya butyibi bobakakulombola ku kifuko kitonga Yehova. Tá mutyima ulonge mungya byonso byobakulombola.
11 Ukalonga mungya kijila kyobakulombola ne mungya butyibi bobakusapwila.+ Kokasāsuka butyibi bobakulombola, ku lundyo nansha ku lunkuso kwine.+
12 Muntu ulonga bintu na ditatu,* upela kwivwana kitobo wingidila Yehova Leza obe nansha mutyibi, ufwaninwe kufwa.+ Ufwaninwe kutalula kibi mu Isalela.+
13 Penepo bantu bonso bakevwana ne kukwatwa moyo, kadi kebakalongapo monka bintu na ditatu.*+
14 “Shi ubatwela mu ntanda ikupa Yehova Leza obe, ubeiyata ke yobe koshikete’mo, konena’mba, ‘Leka nami netūdile’ko mulopwe pamo bwa mizo injokolokele,’+
15 nabya, ukatūla’ko binebine mulopwe utonga Yehova Leza obe.+ Ufwaninwe kutūla mulopwe wa mu banabenu. Wi mupelejibwe kutūla mweni ke mwanenupo.
16 Inoko kafwaninwepo kwivudijija tubalwe+ nansha kujokeja bantu mu Edipito, bakakimbe tubalwe tungitungi,+ mwanda Yehova wemulombwele amba, ‘Kemufwaninwepo nansha dimo kujokela monka mu dino dishinda.’
17 Kafwaninwepo kusonga bakaji bavule kutyina’mba mutyima wandi wakasāsuka;+ kadi kafwaninwepo kwivudijija ndalama ne olo.+
18 Shi washikata pa lupona lwa bulopwe bwandi, ukatentwila mu wandi mukanda* bino Bijila, biyetwe mu byobya bilaminwe na babitobo bene Levi.+
19 “Ukekala nao nyeke, kadi ufwaninwe kutanga’mo mafuku onso a būmi bwandi,+ amba efunde kutyina Yehova Leza wandi ne kulama binenwa byonso bya mu bino Bijila, ne ino misoñanya ne kwibilonda.+
20 Nabya mutyima wandi keukezunzulapo pangala pa banababo, kadi kakasāsukapo mbila shi ku lundyo shi ku lunkuso, amba ekale mafuku mangi mu bulopwe bwandi, aye ne bandi bana mu Isalela.
Kunshi kwa Dyani
^ Kishima pa kishima i, “kyakanwa.”
^ Nansha’mba “na kibutakwe.”
^ Nansha’mba “na kibutakwe.”
^ Nansha’mba “muvungo.”
