Ezekyele 9:1-11
9 Penepo wangela lubila na diwi dikatampe mu matwi ami amba: “Ita boba ba kuletela kibundi mfuto, muntu ne muntu na kyabulwi kyandi kya bonakani mu kuboko kwandi!”
2 Namona bana-balume basamba batamba dya ku kibelo kya pangala+ kitadidile kungala, muntu ne muntu na kyabulwi kyandi kya kulalakanya nakyo mu kuboko kwandi; kadi kwadi ne muntu umo mu bukata mwabo wadi uvwele bukonge, ne kakibīko ka bwīno ka mulembi* mu kifuka kyandi, batwela, baimana kubwipi na kisōkelo kya mukuba.+
3 Penepo ntumbo ya Leza wa Isalela+ yataluka poyadi peulu pa bakelubi, yaenda ku lukala lwa pa kibelo kya njibo,+ kadi kaite muntu wadi uvwele bukonge, yewa wadi na kakibīko ka bwīno ka mulembi mu kifuka kyandi.
4 Yehova wamunena’mba: “Pita mu kibundi, mu Yelusalema, kadi tūla kayukeno pa mapala a bantu batompola ne kubinza+ pa mwanda wa bintu byonso bya munyanji bilongwa mu kibundi.”+
5 Kadi wanena bakwabo mu matwi ami amba: “Pitai mu kibundi mumulonde, mukupile bantu. Diso dyenu kedyakebevwanina bulanda, nansha kwibakwatyilwa lusa.+
6 Mufwaninwe kwipaididila mununu, nsongwalume, mujike, mwana mutyetye, ne bana-bakaji.+ Ino kemwakafwenai muntu ense udi na kayukeno.+ Mukashilwila ku kipandulwe kyami.”+ Ebiya bashilula na bakulumpe badi ku meso a njibo.+
7 Kupwa webanena’mba: “Subijai njibo ne kuyuja batapwe mu bipango.+ Endai!” Penepo baenda, baipaya bantu mu kibundi.
8 Pobadi bebepaya, nashele bunka bwami, napona mpala panshi kendila’mba: “Yō, a Mfumu Mwinē Lupusa Lonso Yehova! Le usa konakanya bashele’ko bonso ba Isalela pano popungulwila bukalabale bobe pa Yelusalema?”+
9 Ebiya waunena’mba: “Kilubo kya njibo ya Isalela ne Yuda i kikata, kikata bininge.+ Ntanda ibayula kumwanga mashi,+ kadi kibundi i kiyule bubi.+ Mwanda banenanga’mba, ‘Yehova washiye ino ntanda, kadi Yehova kamwenepo.’+
10 Ino ami, diso dyami kedikebevwaninapo bulanda, kadi nkikebafwilapo lusa.+ Nkebaletela pa mutwe wabo byobya bilupuka ku dishinda dyabo.”
11 Penepo namona muntu wadi uvwele bukonge ne kakibīko ka bwīno mu kifuka kyandi, unena’mba: “Nalonga enka mowaunsoñaninye.”
Kunshi kwa Dyani
^ Nansha’mba “mulamwanga bwīno bwa musonekeji.”
