Ezekyele 14:1-23
14 Ebiya bakulumpe bamo ba Isalela baiya, bashikata ku meso ami.+
2 Penepo kinenwa kya Yehova kyaiya kondi amba:
3 Mwanā muntu, bano bantu i basumininwe kulonda bilezaleza byabo bya mukenye,* kadi abatūla kikukaja kya kulongeja bantu bubi. Lelo nebaleke bangipangule?+
4 Pano wisambe nabo wibasapwile amba, ‘Mfumu Mwinē Lupusa Lonso Yehova wanena namino amba: “Shi mwine Isalela i musumininwe kulonda bilezaleza byandi bya mukenye ne kutūla kikukaja kya kulongeja bantu bubi, kupwa kaiya kwipangula mupolofeto, ami, Yehova, nkamulondolola mobyendele mungya bilezaleza byandi bivule bya mukenye.
5 Mwanda nkaleta luzakalo mu mityima ya njibo ya Isalela* mwanda abo bonso abansonsoloka, kebalonda bilezaleza byabo bya mukenye.”’+
6 “O mwanda sapwila njibo ya Isalela amba, ‘Mfumu Mwinē Lupusa Lonso Yehova wanena namino amba: “Jokai, muvundamine bilezaleza byenu bya mukenye ne kwalamuka ku bilongwa byenu byonso bya munyanji.+
7 Mwanda shi mwine Isalela ense nansha mweni wa kibundi ushikete mu Isalela wapaluka aye mwine kondi kadi i musumininwe kulonda bilezaleza byandi bya mukenye ne kutūla kikukaja kya kulongeja bantu bubi, kupwa kaiya kwipangula mupolofeto wami,+ ami, Yehova, nkamulondolola ami mwine.
8 Nkapela yao muntu ne kumutūla bu kiyukeno kya kudyumukila’po ne bu lukindi, kadi nkamutyiba’ko mu bantu bami;+ penepo mukayuka’mba ami ne Yehova.”’
9 “‘Ino shi mupolofeto waongolwa, walondolola, i amiwa Yehova waongola yao mupolofeto.+ Nkōlola kuboko kwami pādi ne kumonakanya mu bantu bami bene Isalela.
10 Bakasela mambo abo; mambo a yewa wipangula akekala amo onka na mambo a mupolofeto,
11 amba njibo ya Isalela ileke kulumbakana kulampe nami kadi ileke kwisubija na kujilula kwabo konso. Abo bakekala bantu bami, nami nkekala Leza wabo,’+ i Mfumu Mwinē Lupusa Lonso Yehova unena.”
12 Kadi kinenwa kya Yehova kyaiya monka kondi amba:
13 “Mwanā muntu, shi ntanda ibampi mambo na kulonga bintu pampikwa kikōkeji, nkeyolwela kuboko kwami ne konakanya bibīko byayo bya byakudya,*+ kadi nkeitumina kipupo kya nzala+ ne kutyiba’ko muntu ne nyema mwine.”+
14 “‘Nansha shi bano bantu basatu—Noa,+ Danyele+ ne Yoba+—badi’mo, badi bakokeja kwipandija’nka abo bene* pa mwanda wa boloke bwabo,’+ i Mfumu Mwinē Lupusa Lonso Yehova unena.”
15 “‘Nansha, fwatakanya shi napityija mu ntanda’ya banyema ba ntanda ba budyani, kadi abaipaya’mo bantu* ne kwiyalamuna ke mu ntanda mutuputupu mwa kubulwa muntu upita’mo pa mwanda wa banyema ba ntanda.+
16 Bine ne byondi mūmi,’ i Mfumu Mwinē Lupusa Lonso Yehova unena, ‘nansha shi bano bantu basatu badi’mo, kebadipo ba kupandija babo bana bana-balume nansha babo bana bana-bakaji; badi ba kwipandija’nka abo bene, kadi ntanda yadi ya kwikala masala.’”
17 “‘Nansha, fwatakanya shi naleta kipete pa ntanda’ya+ ne kunena’mba: “Kipete kipite mu ntanda’ya,” kadi natyibe’mo muntu ne nyema mwine,+
18 nansha shi bano bantu basatu badi’mo, bine ne byondi mūmi,’ i Mfumu Mwinē Lupusa Lonso Yehova unena, ‘kebadipo ba kupandija babo bana bana-balume nansha babo bana bana-bakaji; badi ba kwipandija’nka abo bene.’”
19 “‘Nansha, fwatakanya shi natume kipupo kya misongo mu ntanda’ya+ ne kupungulwila bulobo bwami pa ayo na kumwanga mashi mwanda wa kutyiba’mo muntu ne nyema mwine,
20 nansha shi ba Noa,+ Danyele+ ne Yoba+ badi’mo, bine ne byondi mūmi,’ i Mfumu Mwinē Lupusa Lonso Yehova unena, ‘kebadipo ba kupandija babo bana bana-balume nansha babo bana bana-bakaji; badi ba kwipandija’nka abo bene* pa mwanda wa boloke bwabo.’”+
21 O mwanda Mfumu Mwinē Lupusa Lonso Yehova wanena namino amba: ‘Ye mobikekadila shi natume mfuto yami iná*+—kipete, kipupo kya nzala, nyema wa ntanda wa budyani, ne kipupo kya misongo+—pa Yelusalema mwanda wa kutyiba’mo muntu ne nyema mwine.+
22 Ino bamo bashele’mo bakapanda ne kutambijibwa panja,+ bana bana-balume ne bana bana-bakaji. Bāyanga komudi, kadi shi mubamone mashinda abo ne bilongwa byabo, mukasengibwa bya binebine ku kyamalwa kyonaletēle Yelusalema, ku bintu byonso byonamulongele.’”
23 “‘Abo bakemusenga shi mubamone mashinda abo ne bilongwa byabo, kadi mukayuka’mba ponalongele bintu byonadi mfwaninwe kwikilongela ke bitupupo,’+ i Mfumu Mwinē Lupusa Lonso Yehova unena.”
Kunshi kwa Dyani
^ Kishima kya Kihebelu kibwanya kukwatañana na kishima “tuvwi” kadi i kingidijibwe mu muneneno wa kafutululo.
^ Kishima pa kishima i, “lukakwata njibo ya Isalela mu mutyima wabo.”
^ Kishima pa kishima i, “kutyumuna mikombo yobe ya mikate.” Ifunkila padi pa mikombo yadi ingidijibwa pa kubīka mikate.
^ Nansha’mba “muya wabo.”
^ Nansha’mba “abeipaila bana.”
^ Nansha’mba “muya wabo.”
^ Nansha’mba “bilongwa byami biná bisansa bya butyibi.”
