Bilongwa bya Mafuku wa Bubidi 7:1-22
7 Solomone pa kupwa’tu kulombela,+ mudilo watūka mūlu,+ waloteja kyamulambu kisōkwe ne bitapwa, kadi ntumbo ya Yehova yayula mu njibo.+
2 Babitobo bakomenwa kutwela mu njibo ya Yehova mwanda ntumbo ya Yehova yayudile mu njibo ya Yehova.+
3 Kadi bantu bonso ba Isalela badi batala padi patūka mudilo ne padi ntumbo ya Yehova pa njibo, nabo bafukata mapala abo pa nshi palongolole kebevukwila ne kufwija’ko Yehova, “mwanda i muyampe; buswe bwandi bwa ndamatyidile bulādilanga nyeke.”
4 Penepo mulopwe ne bantu bonso balambula bitapwa ku meso a Yehova.+
5 Mulopwe Solomone walambula kitapwa kya bañombe 22 000 ne mikōko 120 000. Enka nenki mulopwe ne bantu bonso bafikidija njibo ya Leza wa bine.+
6 Babitobo badi bemene pa bifuko bya mingilo yabo, pamo ne bene Levi badi na byombanwa byombwanga pa kwimbila Yehova ñimbo.+ (Mulopwe Davida walongele bino byombanwa mwanda wa kufwija’ko Yehova—“mwanda buswe bwandi bwa ndamatyidile bulādilanga nyeke”—kitatyi kyadi kitendela Davida pamo nabo.*) Ebiya babitobo badi bēla bininge bimpungidi+ ku meso abo, papo bene Isalela bonso bemene.
7 Kupwa Solomone wapandula pa bukata bwa kipango kyadi ku meso a njibo ya Yehova, mwanda wadi wa kulambwila’po byamulambu bisōkwe+ ne bipindi binune bya bitapwa bya kipwano, mwanda kisōkelo kya mukuba+ kyapungile Solomone kekyadipo kya kubwana’po bitapwa bisōkwe, byamulambu bya miseke,+ ne bipindi binune.+
8 Mu kine kitatyi’kya Solomone wasoba masobo a mafuku asamba-abidi+ pamo na Isalela yense, kipwilo kikatampe mpata kutamba ku Lebo-Hamata* kufika ne ku Kinekaneka* kya Edipito.+
9 Ino mu difuku dya mwānda* balonga kitango kikola,+ mwanda bafikidije kisōkelo mu mafuku asamba-abidi, kupwa basoba masobo mu mafuku asamba-abidi.
10 Ebiya mu difuku dya 23 dya kweji wa busamba-bubidi, wajokeja bantu ku mobo abo basangale+ ne kusepelela ku mutyima pangala pa buyampe bonso bwalombwele Yehova kudi Davida ne kudi Solomone ne kudi bantu bandi bene Isalela.+
11 Enka nenki Solomone wapwa kūbaka njibo ya Yehova ne njibo* ya mulopwe;+ ne bintu byonso byadi bisaka mutyima wa Solomone kulonga pa mwanda wa njibo ya Yehova ne njibo yandi webilongele senene shē.+
12 Ebiya Yehova wamwekela Solomone+ bufuku kamunena’mba: “Naivwana milombelo yobe, kadi netongela kino kifuko ke njibo ya kitapwa.+
13 Shi nashite madiulu mvula kakinokepo, kadi shi nasoñanya batēte kudya ntanda ne shi natume kipupo kya misongo mu bantu bami,
14 shi bantu bami bene betyilwa’po dijina dyami+ abetyepeja+ kadi abalombe ne kukimba mpala yami ne kuvundamina mashinda abo mabi,+ nabya nkevwana ami mūlu ne kwibalekela bubi bwabo ne kubelula ntanda yabo.+
15 Penepo meso ami akapūtuka ne matwi ami akateja milombelo ilombelwa pa kino kifuko.+
16 Pano natonge ne kupandula ino njibo amba dijina dyami dikale’po lonso,+ kadi meso ami ne mutyima wami bikekala’po nyeke.+
17 “Ino abe, shi unange ku meso ami mwanangile shobe Davida na kulonga bintu byonso byonakusoñenye, ne kukōkela ku misoñanya yami ne butyibi bwami,+
18 nabya nkakomeja nyeke lupona lwa bulopwe bobe,+ monka monasambīle kipwano na shobe Davida,+ amba, ‘Kekukabulwepo nansha dimo muntu wa ku musuku obe wa kuludika Isalela.’+
19 Ino shi musāsuke ne kuleka bitungo byami ne mbila yami yonatūdile ku meso enu, ino kemwenda’ko kukengidila baleza bakwabo ne kwivukwila kobadi,+
20 nabya nkatukuna Isalela mu ntanda yami yonebapele,+ ne ino njibo yonapandula pa mwanda wa dijina dyami nkeifundula ku meso ami kadi nkeilonga ke kintu kya kuzobejibwa* ne kya kufutululwa mu bantu bonso.+
21 Kadi ino njibo ikekala ke milwi ya masala. Ense ukapityila’ko ukatala kyakanwa pululu+ kanena’mba, ‘Mwanda waka Yehova walonga ino ntanda ne ino njibo namino?’+
22 Penepo bakanena’mba, ‘I mwanda abaleka Yehova+ Leza wa bakulutuba babo mwine wēbatambije mu ntanda ya Edipito,+ kebalamata’ko baleza bakwabo ne kwivukwila kobadi ne kwibengidila.+ O mwanda webaletela bino byamalwa byonso.’”+
Kunshi kwa Dyani
^ Pakwabo kifunkila pa bene Levi.
^ Nansha’mba “kibelo kya Hamata.”
^ Tala Nshintulwilo ya Bishima.
^ Difuku dilonda’ko kupwa kwa masobo, nansha’mba difuku dya 15.
^ Nansha’mba “njibo mikatakata.”
^ Kishima pa kishima i, “lukindi.”
