Bilongwa bya Mafuku wa Bubidi 4:1-22
4 Kupwa walonga kisōkelo kya mukuba,+ kya maboko 20 mu bula, maboko 20 mu bunkimbwa, ne maboko 10 mu bwimwa.
2 Walonga Dijiba*+ dya byuma bisungululwe. Dyadi dijokoloke, tamba ku mulomo umo kutūla ku mulomo mukwabo dyadi na maboko 10, ne maboko 5 mu bwimwa, byadi bilomba lukamba lwa kupima nalo lwa bula bwa maboko 30 pa kwidijokoloja.+
3 Kadi kwadi bidyangulwa bya myungu+ kunshi kwao, bijokoloke ku mulomo onso, dikumi mu bula bwa kuboko kumo bijokoloke Dijiba dyonso. Myungu yadi mu milongo ibidi misungululwe pamo nadyo bu kintu kimo.
4 Dyadi ditentamine pa bañombe 12,+ bañombe 3 batadidile kungala, 3 batadidile kushika, 3 batadidile kunshi, ne 3 batadidile kutunduka; kadi Dijiba dyadi ditenteke pobadi, ne bya matako byabo byonso byadi bitadidile pa bukata.
5 Kadi mutyika wadyo wadi na bula bwa bunkimbwa bwa dikasa;* ne milomo yadyo nayo yadi mipunge pamo bwa milomo ya kitomeno, pamo bwa maluba metoyole. Kibīko kya mema kyadi kibwanya kutweja* mabate* 3 000.
6 Ne kadi, walonga byoilo dikumi bya koya’mo, watūla bitano ku lundyo ne bitano ku lunkuso.+ Badi bakenda’mo bintu byadi bingidijibwa pa kulambula kyamulambu kisōkwe.+ Inoko Dijiba dyadi dya koya’mo babitobo.+
7 Kupwa walonga bitūlwa-binanu dikumi bya olo,+ monka mokilombwedilwe,+ webitūla mu tempelo, bitano ku lundyo ne bitano ku lunkuso.+
8 Walonga ne mameza dikumi, weatūla mu tempelo, atano ku lundyo ne atano ku lunkuso;+ walonga ne ngeso 100 ya olo.
9 Kupwa walonga ne kipango+ kya babitobo+ ne kipango kikatampe*+ ne milango ya kipango, walamika mukuba ku milango yabyo.
10 Watūla Dijiba ku lundyo, dya pa bukata bwa kunshi ne kutunduka.+
11 Kadi Hilama wapunga ne bininga bya buto, bipawa, ne ngeso.+
Enka nenki Hilama wapwa mwingilo wawaingidile Mulopwe Solomone ku njibo ya Leza wa bine:+
12 bikomo bibidi+ ne mitwe ya bikomo idi bwa ngeso yadi pangala pa bikomo bibidi’bya; makonde abidi+ a kupūta mitwe ibidi idi bwa ngeso yadi pangala pa bikomo;
13 bipa bya mangelenade 400+ bya ku makonde abidi, milongo ibidi ya bipa bya mangelenade bya ku bukonde ne bukonde bwa kupūta mitwe ibidi ya bikomo idi bwa ngeso yadi pa bikomo;+
14 matempa* dikumi ne byoilo dikumi pa matempa;+
15 Dijiba ne bañombe 12 munshi mwadyo;+
16 ne bininga bya buto, ne bipawa, ne nkanya,+ ne bipungwa byabyo byonso bya mukuba mukundule byobalongēle Mulopwe Solomone kudi Hilama-Abiva+ pa mwanda wa njibo ya Yehova.
17 Mulopwe webisungulwila mu dilongo dya mutyika mu kipindi kya ntanda ya Yodano pa bukata bwa Sukote+ ne Zeleda.
18 Solomone walonga bino bingidilwa byonso bipite’byo bungi; bulēmi bwa mukuba kebwadipo buyukene.+
19 Solomone wapunga bipungwa byonso+ bya njibo ya Leza wa bine: kisōkelo kya olo;+ mameza+ patūlwe mikate milombolwe;+
20 Bitūlwa-binanu ne binanu byabyo bya olo yonkayonka,+ bya kwakija kumeso kwa kyumba kya munda bininge mungya misoñanya;
21 ne maluba, ne binanu, ne tunkwato,* byonso bya olo, olo yonkayonka’tu;
22 ne mikashi ya kubula nayo mudilo, ngeso, bitomeno, ne bininga bya mudilo, byonso bya olo yonkayonka; ne kibelo kya njibo, milango yakyo ya munda ya Kijila Nakampata,+ ne milango ya njibo ya tempelo, byonso bya olo.+
Kunshi kwa Dyani
^ Nansha’mba “kibīko kya mema.”
^ Kintu kya masantimetele 7,4. Tala Mbwejo B14.
^ Nansha’mba “mwadi mubwana.”
^ Bate umo i malitele 22. Tala Mbwejo B14.
^ Nansha’mba “lupango lukatampe.”
^ Nansha’mba “bilandala-ñombe bya mema.”
^ Nansha’mba “mapenshi.”
