Bilongwa bya Mafuku wa Bubidi 22:1-12
22 Penepo bekadi ba Yelusalema babikika Ahazia mukala wandi bu mulopwe pa kyandi kyaba, mwanda kibumbo kya bañonaona kyaile na Balabu ku nkambi kyaipaile batame bonso.+ Ebiya Ahazia mwanā Yeholama waanza kubikala bu mulopwe wa Yuda.+
2 Ahazia wadi na myaka 22 paabikele, wabikele mwaka umo mu Yelusalema. Dijina dya inandi i Atadia+ munkanā* Omidi.+
3 Aye nandi wanangīle mu mashinda a njibo ya Ahaba,+ mwanda inandi waikele ke mudingidi wandi mu kulonga bibi.
4 Wadi ulonga nyeke bibi ku meso a Yehova, pamo bwa njibo ya Ahaba, mwanda pafwile shandi, baikele ke badingidi bandi, amba onakanibwe.
5 Walondele madingi abo, waenda na Yeholama mwanā Ahaba mulopwe wa Isalela kukalwa divita na Hazaele+ mulopwe wa Shidea ku Lamote-Ngileade,+ kobatapile Yeholama bilonda kudi boba bela miketo.
6 Wajokela ku Yezelele+ kukeundapija bilonda byobamutapile ku Lama paakalwile na Hazaele mulopwe wa Shidea.+
Ahazia* mwanā Yeholama+ mulopwe wa Yuda watūkila ku Yezelele kukatala Yeholama+ mwanā Ahaba, mwanda wadi mutapwe bilonda.*+
7 Ino Leza waletēle Ahazia kupona aye pa kwiya kudi Yeholama; kadi pawaile, watambile na Yeholama kukasambakana Yehu+ munkanā* Nimishi, obashingile māni kudi Yehova mwanda wa kutukija* njibo ya Ahaba.+
8 Yehu pa kwanza kufikidija butyibi pa njibo ya Ahaba, watene bamfumu ba Yuda ne bana ba banababo na Ahazia, bengidi ba Ahazia, webepaya.+
9 Penepo wakimba Ahazia; bamukwata mu Samadia mwaadi ufyeme, bamuselela kudi Yehu. Ebiya bamwipaya, bamujīka,+ mwanda banenene amba: “Aye ye munkanā Yehoshafata, wakimbile Yehova na mutyima wandi onso.”+ Kekwadipo muntu nansha umo wa mu njibo ya Ahazia wadi na bukomo bwa kubikala.
10 Atadia+ inandya Ahazia pa kumona’mba wandi mwana wafu, wataluka wakonakanya musuku onso wa bulopwe wa* njibo ya Yuda.+
11 Ino Yehoshabeate mwanā mulopwe mwana-mukaji wasela Yehoashe+ mwanā Ahazia wamunyemeja mu bana ba mulopwe badi ba kwipaibwa, wamutūla aye ne muledi wandi mu kyumba kya kulāla’mo kya munda. Yehoshabeate mwanā Mulopwe Yeholama+ (wadi mukaja Yehoyada+ kitobo kadi wadi mwanabo na Ahazia) walonga buninge bwa kufya’ye Atadia, kutyina wakamwipaya.+
12 Washikata nabo myaka isamba, mufibwe mu njibo ya Leza wa bine, papo Atadia uludika ntanda’ya.
Kunshi kwa Dyani
^ Kishima pa kishima i, “mwana mwana-mukaji wa.”
^ Nansha’mba “wadi ubela.”
^ Mu bilembwa bimo bya Kihebelu i, “Azadia.”
^ Kishima pa kishima i, “mwana mwana-mulume.”
^ Kishima pa kishima i, “kutyiba’ko.”
^ Kishima pa kishima i, “lukunwa lonso lwa bulopwe lwa.”
