Ñimbo ya Mitōto 74:1-23
Mashikile* a Asafa.+
74 A Leza, mwanda waka ubetwela lonso?+
Mwanda waka bulobo bobe budyendyemukila* luombe lwa mu madyo obe?+
2 Vuluka bantu* bowatongele tamba kala,+Kisaka kyowakūdile bu bupyani bobe.+
Vuluka Lūlu lwa Ziona, mowashikete.+
3 Ludikila matabula obe ku masala a lonso.+
Walwana waonakanya bintu byonso mu kifuko kijila.+
4 Boba bakushikilwe babulumanga mu kifuko kyobe kya kubungakena’ko.*+
Abashimika’mo malwembela abo bu biyukeno.
5 Badi pamo bwa bantu bengidija tusolwa mu ditó dīpase.
6 Batyumunanga bifwatulo byakyo+ na tusolwa ne mingwala.
7 Abaela kipandulwe kyobe mu mudilo.+
Abakobakanya kipema kiselele dijina dyobe, abekiponeja pa nshi.
8 Abo ne lutundu lwabo kebanena mu mityima yabo amba:
“Bifuko byonso bya kupwidila’mo bya Leza* mu ntanda’ya bifwaninwe kusōkwa.”
9 I kutupu biyukeno bya batwe kumona;Kekukidipo monka mupolofeto nansha umo,Kadi i kutupu nansha umo motudi uyukile kitatyi kyobikeja.
10 A Leza, le kinkwa ukakukolomona kufika ne kitatyi’ka?+
Le walwana ukapunika dijina dyobe nyeke?+
11 Mwanda waka ukoka kuboko kobe, kuboko kobe kwa lundyo?+
Talula’ko mu kyadi* kyobe wibafudije.
12 Ino Leza i Mulopwe wami tamba kala,Aye uloñanga bilongwa bya lupandilo pano pa ntanda.+
13 Abe wajininye dijiba na bukomo bobe;+Walalakenye mitwe ya bipangwa bikatampe bya lui bidi mu mema.
14 Wavingakenye mitwe ya Leviatane;*Wapa’ye bantu ke byakudya, boba bekalanga mu ntanda mutuputupu.
15 Washitwidile masulo a mema ne tuminonga bibelo;+Waūmije minonga ikuka milungu.+
16 Mwinya i obe, ne bufuku bwine.
Walongele kitōkeji* ne dyuba.+
17 Watūdile’ko mikalo yonso ya ntanda;+Walongele bushipo ne buyo.+
18 A Yehova, vuluka kukolomona kukukolomona walwana,Mupunikila bantu balembakane dijina dyobe.+
19 Kokapāna būmi bwa kakutyikutyi kobe ku banyema ba ntanda.
Kokelwa nyeke būmi bwa* bantu bobe bamweshibwa malwa.
20 Vuluka kipwano,Mwanda mu bifuko bifīta bya pa ntanda mubayula bīkalo bya lūma.
21 Yewa muvingakanibwe kakijoka mutyumukwe mutyima;+Yewa mupēlulwe ne mulanda batendele dijina dyobe.+
22 A Leza imana, winenene mu kisambo kyobe.
Vuluka mukukolomwena mulembakane difuku dyonso dituntulu.+
23 Kokelwa byobya binena bakushikilwe.
Kyungwe kya boba bakupunika kikandanga nyeke.
Kunshi kwa Dyani
^ Tala Nshintulwilo ya Bishima.
^ Kishima pa kishima i, “bufitukila.”
^ Kishima pa kishima i, “kitango kyobe.”
^ Nansha’mba “kifuko kyobe kya kitango.”
^ Nansha’mba “Bifuko byonso bitōtelwanga’po Leza.”
^ Nansha’mba “mu kisandi kyobe.”
^ Tala Nshintulwilo ya Bishima.
^ Nansha’mba “kimuni.”
^ Nansha’mba “muya wa.”
