Ñimbo ya Mitōto 69:1-36
Kudi mukulu wa bañomba; pa “Maluba.” Lwimbo lwa Davida.
69 A Leza, mpandije, mwanda mema abazakaja būmi bwami.*+
2 Nejīka mu bitoto bilampe, mwampikwa nshi myūmu.+
Naiya mu mema malamala,Kadi mulungu wa munonga ubampitula.+
3 Nakōka kwela lubila;+Mudibu ubañume.
Meso ami abapungila pontengele Leza wami.+
4 Boba banshikilwe pampikwa mwanda+I bavule kutabuka ne nywene ya ku mutwe wami.
Boba basaka kungipaya,Balwana nami banzazangi,* abavula.
Bauningīle kuleta bintu byonkyaibilepo.
5 A Leza, abe uyukile biyampe bulembakane bwami,Kadi mambo ami keakufīlwepo.
6 Boba bakulupile modi kebakafwijibwa bumvu pa mwanda wami,A Mfumu Mwinē Lupusa Lonso, Yehova wa bibumbo.
Boba bakukimba kebakapēlulwa pa mwanda wami,A Leza wa Isalela.
7 Natukwe mutonko pa mwanda obe;+Kufwijibwa bumvu kubapūta mpala yami.+
8 Kendi mweni ku banabetu,Muntu ungi ku bana ba mama.+
9 Bupyasakane mwanda wa njibo yobe bubandi,+Kadi mutonko wa boba bakutuka ubamponena ami.+
10 Ponetyepeje ami mwine* ne kushikilwa na nzala,*Natukilwe’po mutonko.
11 Ponalongele masāka ke bivwalwa byami,Naikele kendi kintu kya kuzobejibwa* kobadi.
12 Kendi wa kunenwa na boba bashikete mu kibelo kya kibundi,Ne bankolwankolwa abangalamuna kendi wa kwimbwa mu ñimbo yabo.
13 Inoko milombelo yami ifike kodi,A Yehova, mu kitatyi kitabijibwe.+
Mu bungi bwa buswe bobe bwa ndamatyidile, abe Leza,Nondolole na bilongwa byobe bya bine bya lupandilo.+
14 Nkūle ku bitoto;Kokandeka nejīke.
Nkūle ku boba banshikilweNe ku mema malamala.+
15 Kokaleka mulungu wa mema a dilobe umpitule,+Nansha kuleka mema malamala kumina,Nansha kuleka mushimwa* unshityile mu kyakanwa kyao.+
16 A Yehova, nondolole, mwanda buswe bobe bwa ndamatyidile i buyampe.+
Vundamukila kondi mwendele bungi bwa lusa lobe,+
17 Kadi kokafya mwingidi obe mpala yobe.+
Nondolole bukidibukidi, mwanda ngidi mu tusua.+
18 Mfwene pabwipi unkūle;*Nyongolole pa mwanda wa balwana nami.
19 Abe uyukile mutonko obantuka ne kuzobejibwa ne kufwijibwa bumvu kwami.+
Umwene bonso banshikilwe.
20 Mutonko ubantyumuna mutyima, kadi kilonda kekikomapo.*
Nadi nkulupile amba baketūla pa kyaba kyami, ino i kutupu nansha umo,+Ne ba kunsenga, ino nkimwenepo nansha umo.+
21 Ino pa kyaba kya byakudya baumpele bulembe,*+Kadi mwanda wa kyami kyumwa baumpa busuku busosoma amba ntome.+
22 Meza abo ekale ke kidiba kobadi,Ne bupeta bwabo, ke dikinga.+
23 Meso abo afīte kutyina bakamona,Kadi zakaja nyeke bifuka byabo.
24 Wibapungulwile kufītwa mutyima kobe,*Kadi bulobo bobe budyendyemuka bwibapete.+
25 Nkambi* yabo ikale masala;Kemwakekala mwikadi nansha umo mu mapema abo.+
26 Mwanda balondalondanga yewa owakupile,Kadi basekununanga masusu a boba bowatapile.
27 Bweja’ko mambo ku mambo abo,Kadi kokebamona bu boloke.
28 Bebabule mu mukanda wa bōmi,*+Kadi kebakalembwa umbukata mwa boloke.+
29 Ino ami namone malwa kadi ngidi na misanshi.+
A Leza, bukomo bobe bupandija bundame.
30 Nkembilanga dijina dya Leza mitendelo,Kadi nkamutumbijanga ne kufwija’ko.
31 Kino kikasangaja Yehova kupita ñombe.Kupita ñombe mwana wa masengo ne mikono.+
32 Betyepeje bakemwenanga ne kusangala.
Banwe bakimba Leza, mityima yenu ipumputumuke.
33 Mwanda Yehova wivwananga balanda,+Kadi kakafutululapo bantu bandi misungi.+
34 Diulu ne ntanda bimutendele,+Majiba ne byonso bijina’mo.
35 Mwanda Leza ukapandijanga Ziona+Kadi ukōbakululanga bibundi bya Yuda,Kadi nabo bakekalanga’mo ne kuyata’yo* ke yabo.
36 Lutundu lwa bengidi bandi lukapyananga’yo,+Kadi boba basenswe dijina dyandi+ bakekalanga’mo.
Kunshi kwa Dyani
^ Nansha’mba “abaiya ku muya wami.”
^ Nansha’mba “Balwana nami pampikwa mwanda.”
^ Nansha’mba “muya wami.”
^ Bibwanika padi i, “Ponadidile ne kushikilwa na nzala.”
^ Kishima pa kishima i, “lukindi.”
^ Nansha’mba “kīna.”
^ Nansha’mba “Fwena pabwipi na muya wami wiulombe.”
^ Nansha’mba “kadi kensa kutyumukwa mutyima.”
^ Nansha’mba “mutyi wa bulembe.”
^ Nansha’mba “bukalabale bobe.”
^ Nansha’mba “Nkambi idi mu mumbu.”
^ Nansha’mba “mukanda wa būmi.”
^ Ko kunena’mba, ntanda.
