Ñimbo ya Mitōto 33:1-22
33 Banwe boloke, elai nsadi ya tusepo pa mwanda wa Yehova.+
I kyendele’mo boloke swā bamutendele.
2 Mufwijei’ko Yehova na lunsense;Mwimbilei mitendelo* na kyombanwa kya myonji dikumi.
3 Mwimbilei lwimbo lupya;+Ombai nzenze senene, pamo ne nsadi ya tusepo.
4 Mwanda kinenwa kya Yehova i kyoloke swā,+Kadi bintu byonso byalonga i bikulupilwa.
5 Aye usenswe boloke ne bululame.+
Ntanda i miyule buswe bwa ndamatyidile bwa Yehova.+
6 Madiulu apangilwe ku kinenwa kya Yehova,+Ne bintu byonso bidi’mo* nabyo ku mushipiditu* wa kyakanwa kyandi.
7 Ubuñanga mema a dijiba pamo bwa mumba;+Utūlanga mu bibīko mema atūta.
8 Ntanda yonso ityine Yehova.+
Bekadi bonso ba ntanda ya bumeni bamukwatwe nzuba.
9 Mwanda wesambile, nakyo kyalongeka;+Wasoñenye, nakyo kyaimana pototo.+
10 Yehova wavutakanya nkuku* ya mizo;+Wakankaja mpango* ya bantu.+
11 Ino butyibi* bwa Yehova bukemananga nyeke;+Milangwe ya mutyima wandi i ya ku nkongo ne nkongo.
12 Muzo wa nsangaji i owa udi na Leza wao Yehova,+Bantu batongele bu kintu kyandi.+
13 Yehova utalanga panshi aye momwa mūlu;Umonanga bana bonso ba bantu.+
14 Tamba mu kīkalo kyandi,Ubandilanga bekadi ba ntanda.
15 I aye uloñanga mityima ya bonso;Ubandaulanga mingilo yabo yonso.+
16 I kutupu mulopwe upandijibwa na kibumbo kikatampe kya divita;+Muntu mukomokomo kapandijibwangapo na bukomo bwandi bukatampe.+
17 Kabalwe i lukulupilo lwa bubela lwa lupandilo;*+Bukomo bwako bukatampe kebupandijangapo.
18 Talai! Diso dya Yehova ditalanga boba bamwakaminwe,+Boba batengele buswe bwandi bwa ndamatyidile,
19 Mwanda wa kwibakūla ku lufuNe kwibalama bōmi mu kitatyi kya kipupo kya nzala.+
20 Batwe* tukungilanga Yehova.
I mukwashi wetu ne ngabo yetu.+
21 Mityima yetu imusangedile,Mwanda tukulupile mu dijina dyandi dijila.+
22 Buswe bobe bwa ndamatyidile bwikale potudi, a Yehova,+Pano potukutengele.+
Kunshi kwa Dyani
^ Nansha’mba “Mombelei minjiki.”
^ Kishima pa kishima i, “bibumbo byao byonso.”
^ Nansha’mba “umpuya.”
^ Nansha’mba “milangwe.”
^ Nansha’mba “madingi.”
^ Nansha’mba “madingi.”
^ Nansha’mba “lwa bushindañani.”
^ Nansha’mba “Muya wetu.”
