Ñimbo ya Mitōto 16:1-11
Mikitame* ya Davida.
16 A Leza, nkinge’po, mwanda nanyemena modi.+
2 Nanena Yehova amba: “Abe wi Yehova, Nsulo yami ya buyampe.
3 Kadi bajila pano pa ntanda,Bantu bakatampe, bandetelanga kuloelelwa kukatampe.”+
4 Boba balondalonda baleza bakwabo bavudijanga malwa abo.+
Ami nkikapungululapo nansha dimo byamulambu byabo bya bitomibwa bya mashi,Nansha milomo yami kutela majina abo.+
5 Yehova i kipindi kyami, kyepelo kyami kimpelwe,+ ne kitomeno kyami.+
Abe ulamanga bupyani bwami.
6 Bifuko bisangaja bibampiminwa.
Bine, ndoelelwe bupyani bwami.+
7 Nkatendelanga Yehova, mwine waumpa madingi.+
Enka ne bufuku bwine, milangwe yami ya munda* ingololanga.+
8 Natūla Yehova ku meso ami nyeke.+
Mwanda aye udi ku kuboko kwami kwa lundyo, nkikatenkanapo nansha dimo.*+
9 O mwanda mutyima wami ubasepelela, ami ense* nasangala.
Kadi ngikele* na mutyima-ntenke.
10 Mwanda kukanshiyepo mu* Kibundu.*+
Kukalekapo muntu obe wa lulamato amone kīna.*+
11 Ubandyukija kashinda ka būmi.+
Ku meso obe* kudi nsangaji mivule;+Kudi nyeke katōkwe* ku kuboko kobe kwa lundyo.
Kunshi kwa Dyani
^ Tala Nshintulwilo ya Bishima.
^ Nansha’mba “milangwe yami mifyame.” Kishima pa kishima i, “mfyo yami.”
^ Nansha’mba “nkikalundukapo nansha dimo (kutelententa).”
^ Kishima pa kishima i, “ntumbo yami.”
^ Nansha’mba “ngitu yami ikele.”
^ Nansha’mba “kukalekapo muya wami ku.”
^ Nansha’mba “Sheole,” ko kunena’mba, kibundu kya bantu bonso. Tala Nshintulwilo ya Bishima.
^ Bibwanika padi i, “amone bubole.”
^ Kishima pa kishima i, “Na mpala yobe.”
^ Nansha’mba “nsangaji.”
