Enda ku bidi'mo

Enda ku kifunka

Batumoni ba Yehova

Tonga Ludimi Kiluba

 MUTWE WA MWANDA WA PA KIBALU | LELO LEZA UMWENE MAVITA NAMANI?

Mwādi Mumwena Leza Mavita mu Myaka Katwa Kabajinji

Mwādi Mumwena Leza Mavita mu Myaka Katwa Kabajinji

Bantu bādi basusuka. Pamo bwa bankambo babo, Bayuda ba mu myaka katwa kabajinji bādi nyeke balomba Leza ebakwashe, pobādi basusulwa na Umbikalo wa Loma. Kadi, bāivwene batela Yesu. Lelo Yesu ye wādi wa kwikala bu Meshiasa wālailwe? Ke kya kutulumukapo, bantu bavule bādi bakulupile’mba “uno muntu ye wadi utungīlwe kunyongolola Isalela” ku balwana nabo bene Loma. (Luka 24:21) Inoko kebānyongolwelepo. Ino, mu mwaka wa 70 Yesu Kemwiye, bashidika bene Loma baiya kutūta Yelusalema ne tempelo mine.

Byafula kwepi? Mwanda waka Leza kālwidilepo Bayuda, na mwaādi ulwila pa kala? Ne mwanda waka kebasoñenyepo balwe mwanda wa kwinyongolola mu kano kasusu? Le mumweno wa Leza pa mavita wāshintyile? Mhm. Ino bintu bimo byāshintyile bininge pa mumweno wa Bayuda. Bāpelele kwitabija Yesu, Mwanā Leza, bu Meshiasa. (Bilongwa 2:36) Mu uno muswelo, uno muzo wājimije kipwano kyabo kya pa bula na Leza.​—Mateo 23:37, 38.

Muzo wa Bayuda ne Ntanda yabo ya Mulao kebādipo bākilamwa na Leza, kadi Bayuda kebādipo bakilwa mavita kupityila ku bukomo bwa Leza. Monka mwālaile’kyo Yesu, madyese a kwitabijibwa na Leza āyetwe muzo wa Isalela wa ku ngitu apebwa muzo mukwabo, Isalela wa ku mushipiditu, wayukene mwenda mafuku mu Bible bu “Isalela wa Leza.” (Ngalatea 6:16; Mateo 21:43) Kipwilo kya bene Kidishitu bashingwe māni a mushipiditu ye Isalela wa ku mushipiditu wa Leza. Na bubine, mu myaka katwa kabajinji bēbasapwidile amba: ‘Ino pano mubaikala bantu ba Leza.’​—1 Petelo 2:9, 10.

Tamba mu myaka katwa kabajinji bene Kidishitu bāikele ke “bantu ba Leza,” lelo Leza wēbalwidile mwanda wa kwibanyongolola ku masusu a bene Loma? Ne kadi, le wēbasoñenye kulwa na balwana nabo? Mhm. Mwanda waka? Mwanda kitatyi kyādi kisoñanya Leza kulwa divita, i Leza mwine wādi utonga kitatyi kya kulwa na mokilombwedilwe mu kishinte kibadikile. Nanshi Leza kādipo ulwila bene Kidishitu ba mu myaka katwa kabajinji, nansha kwibasoñanya balwe mavita a bantu. I kimweke patōka amba, mu myaka katwa kabajinji kekyādipo kitatyi kya Leza kulwa na babi ne boba basusula bakwabo.

Pamo enka na bengidi ba Leza ba pa kala, bano bene Kidishitu ba mu myaka katwa kabajinji bādi banenwe kukungila kufika enka ne kitatyi Leza kyākatalula’ko babi ne masusu. Mu kino kitatyi, Leza kebāsoñenyepo kulwa na balwana nabo. Yesu wālombwele kino patōkelela mu bufundiji bwandi. Kimfwa, kātonwenepo balondi bandi kulwa mavita, ino wēbasapwidile amba: “Sanswai nyeke balwana nenu ne kulombelela boba bemupangapanga.” (Mateo 5:44) Yesu wālombwele kitatyi bashidika bene Loma kyōbakonakanya Yelusalema mu myaka katwa kabajinji, ne kudyumuna bana bandi ba bwanga baleke kulwa ino banyeme​—nabo balongela monka.​—Luka 21:20, 21.

Kadi, mutumibwa Polo wāsonekele kupityila ku bukomo bwa mushipiditu amba: “Kemwakīlubwilai kinongo banwe bene, . . . mwanda i kilembwe amba: Kinongo i kyami; i ami ukajokeja, e mwanenena Yehova.” (Loma 12:19) Polo wāpitulukile mu  binenwa bya Leza byāsonekelwe myaka tutwa kunyuma bidi mu Levi 19:18 ne mu Kupituluka 32:35. Monka motwekimwenine mu kishinte kishele kunyuma, muswelo umo Leza wādi ulwila bantu bandi ba pa kala ina kwibakwasha balwe na balwana nabo. Bino binenwa bya Polo bilombola’mba mumweno wa Leza pa mavita keushintyilepo. Mu myaka katwa kabajinji, Leza wādi umwene mavita bu muswelo muyampe wa kulwila bengidi bandi ne kutalula’ko bibi ne masusu. Inoko, enka mokyādi kikadile pa kala, Leza mwine ye wādi utonga kitatyi kya kulwa divita ne mwine ufwaninwe kulwa.

Na bubine, Leza kasoñenyepo bene Kidishitu ba mu myaka katwa kabajinji kulwa mavita. Le dyalelo nadyo le? Lelo Leza usoñanyanga kisumpi kampanda kya bantu dyalelo kulwa mavita? Nansha kino kyo kitatyi kya Leza kya kulwila bengidi bandi? Lelo Leza umwene namani mavita dyalelo? Kishinte kya mfulo kya mu bino bishinte kikalondolola bino bipangujo.